निर्विकार मी
अंधाराच्या आडूनही
धुंडत होतो प्रकाश मी,
मिट्ट झाले काहीदा पण
झालो नाही हताश मी!
प्रतिकुलतेच्या अरण्यातही
चालत होतो खुशाल मी,
नैराश्याची ठिणगी पडता
त्याची केली मशाल मी!
श्वापदांचे जत्थे भोवती
पण झालो नाही शिकार मी,
किंकाळ्यांनी गुंजले अंबर
पण मनातूनी निर्विकार मी!
तारांगणही विस्कटले जेव्हा
माझाच ठरवला ध्रुवतारा मी,
उत्तरेच्या शोधार्थ फिरवला
दक्षिणेचा वारा मी!