पंक्तिप्रपंच
तुझं आवतणं दरवर्षी येतं तसं यंदाही आलं
चूलबंद आवतणं, पोरंटोरं सारं बिगीनं निघालं
बरोबर घेतल्या डोळं खोल गेलेल्या विहिरी
तापलेल्या जमीनीला भेगा पडलेल्या जिव्हारी
कणा मोडकी झोपडी अन् उपाशीतापाशी नरनारी
पोट खपाटी गेलेल्या गाई म्हशी, कुत्री, मांजरी
पंगती बसल्या, वाढपी आले, धुळवडलेलं पात्र पुसलं
पण कुठं वाढलं, कुठं नाही, तो पुंडलीक वरदा झालं
कुठं तुपाशी, कुठं उपाशी, कुठं कोरडं, कुठं ओलं
ज्यांचं भरलं ते ढेकरा देत गेलं, आमचं काय चुकलं
अरे पंक्तिप्रपंच तुही करावा, कसलं वैर साधलं
कुठं अजीर्ण झालं, तर कोणी भुकेनं व्याकुळलं