काव्यलेखन

आदिस्फोटाने अपार
ऊर्जा-द्रव्य ओसंडले
ज्ञेय-अज्ञेय द्वैताने
भवताल पछाडले

कृष्ण ऊर्जा, कृष्ण द्रव्य,
कोडी पल्याड तर्काच्या
हुलकावण्या देतात
काठावर अज्ञाताच्या

किती गुह्ये अद्यापही
चराचरात दाटली
वाटे एक सुटले तो
नवी पुढ्यात ठाकली

अंतहीन अज्ञाताचे
प्रज्ञा करी दोन भाग
एक ज्ञेय- कष्टसाध्य
दुजा अज्ञेय- अथांग

बिनधास्त उभा तो वाडा हळहळणारा
वर पिंपळ थकला तेथे सळसळणारा
ते जळमट काही प्रवेशद्वारापाशी
तृण उंच वाढले बिलगे तरु पर्णांशी

पोपडे जरासे भिंतीवरती ओले
अन् धाप टाकुनी उदास खिडकी बोले
निखळले कसे हे अलगद वासे काही
ते वैभव सारे जिथे द्यायचे ग्वाही

ती विहीर जेथे जमायचे बघ खेडे
वाजायाचे ते रहाट करकर वेडे
देव्हारा तिथला कसा पोरका झाला
चढविली कशी ना कुणी फुलांची माला

मी धावत सुटलो स्वप्नांच्या त्या पाठी
ना मिटली तरिही चिंतेची ती आठी
बैसतो स्मृतीच्या त्याच नदीच्या काठी
मी बालपणाला पुन्हा जगायासाठी

शिकवण प्राजक्ताची*

टपोरे शुभ्र प्राजक्त
फुलले मम अंगणी
किती मोहक रूपाने 
पाहता आनंद  मनी

देठ शोभते केसरी
शुभ्र पाकळ्या मोहक
 पडे  सहज भुवरी
सडा चित्ताला वेधक.

गर्द हरित पर्णात
शोभे प्राजक्त सुंदर
सडा पाहुनिया वाटे
वेचूया ओंजळभर 

अल्प काळाचे आयुष्य
आनंद देणे दुसऱ्यास
घ्यावी शिकवण त्याची
उपयोगी जगण्यास

वेचली प्राजक्त फुले
अर्पिली श्रीहरी चरणी
  दिसे शोभिवंत देवा-ही
आनंदात मनोमनी

वैशाली वर्तक
अहमदाबाद

मृत्यू 

जगी काहीच नाही निरंतर 
 नसे कसली शाश्वती 
जीवन पण ,असे क्षणभंगुर 
करिता विज्ञानाने कितीही प्रगती 

किती ही करा प्रयत्न 
टिकविण्याची जरी आस
प्रत्येक वस्तूला , व्यक्तीला
नाश हा असतोच खास 

उत्पत्ती वाढ  आणि  अंत 
या तीन्ही क्रिया होणार 
पण   हेच नित्य निरंतर 
 अमर्त्यची शाश्वती  नसणार

जलचरसृष्टी  पण नाही निरंतर 
ते पण नाही  शाश्वत 
जो पर्यंत श्वास चाले
जीवन असे अविरत

करा विचार जीवनाचा
क्षण क्षण चालला निसटून
काळ चालला सदैव पुढे 
जशी निसटते वाळू हातातुन

पंचप्राण हे झाले आतुर तुमच्या दर्शनासाठी

सगुण रुपाने येऊन द्यावे दर्शन या भक्तासाठी

पंचप्राण हे झाले आतुर तुमच्या दर्शनासाठी
किती जन्म मी तिष्ठलो स्वामी तुमच्या भेटीसाठी

पंचप्राण हे झाले आतुर तुमच्या दर्शनासाठी
फिरलो अगणिक कृष्णा तिरावर तुम्हास शोधण्यासाठी

पंचप्राण हे झाले आतुर तुमच्या दर्शनासाठी
तव दर्शनास आसुसल्या माझ्या नयनांच्या ज्योती

पंचप्राण हे झाले आतुर तुमच्या दर्शनासाठी
किती कोटी नाम जप केले तुम्हास भेटण्यासाठी

पंचप्राण हे झाले आतुर तुमच्या दर्शनासाठी
धाऊन या हो लवकर या भक्ताच्या प्रेमापोटी

*अजून स्वाभिमान जाज्वल्य आहे*

अभिमानी नसावे कधीच
स्व चा अभिमान असावा
भेद जाणू स्वाभिमानी व अभिमानीचा
गर्विष्ठ स्वभाव कधीच नसावा .

असता स्वभावे स्वाभिमानी
तयाचाच मान रहातो जगती
ताठ मानेने जगणे उचित
तरच होते जीवनी प्रगती.

अभिमानी नसावे कधीच
गर्वाने होतो पराजय
बलाढ्य असूनही रावण
मिळवू शकला नाही विजय.

मोडेन, पण नाही वाकणार
स्वाभिमानी वृत्ती असावी
विनयाने शोभावे जीवनी
पण, लाचारता कधी नसावी.

कवितेच्या वाटेवरती
कधी झुलतो मोरपिसारा
मोहवितो पांथस्थांच्या
पाणवल्या, दिपल्या नजरा

कवितेच्या वाटेवरती
कधी विफल, विरागी राख
दडलेले त्यात कधीचे
धुमसते निखारे कैक

कवितेच्या वाटेवरती
अर्थाचा वर्ख निखळतो
शब्दांचा अचपळ पारा
वाटेवर विखरुनी जातो

कोणी कुणाचे नाही*

आलो एकटेच जगी
वाढविले स्वखुषीत
दिले प्रेम पालकांनी
मोठे केले सोबतीत

भोगण्यास नाही कुणी
स्वकर्माचे कर्म फळ
मंत्र ठेवा सदा ध्यानी
हवे मनी आत्म बळ

वाचा पाढे स्वकर्माचे
नको कुकर्म जीवनी
भागीदार होत नाही
दुःख भोगण्या त्याक्षणी

कर्म सिध्दांत वदले
कृष्ण अर्जुनास रणी
कुणी नाही कुणासाठी
कर कर्म रणांगणी

आयुष्याच्या सांजवेळी
कुणी नाही कोणासाठी
आता तरी जगून घे
काही क्षण स्वतःसाठी

वैशाली वर्तक
अहमदाबाद