लेखनसुविधा

आभाळात आले किती .... काळे काळे ढग

आभाळात आले किती .... काळे काळे ढग
येना बाहेर लवकर आई ....बघ वर बघ

आरडाओरडा कित्ती यांचा .... गडाडगुडूम
वीज कशी मधूनच .....जाते सणाणून

वारे कसे घोंघावती .... आवाज करून
पाला पाचोळ्याने गेले .... आभाळ भरून

टपटप टपटप आले आई .... थेंब हे वरून
भिजू मस्त पावसात ..... गोल गोल फिरून

गाणे गाऊ पावसाचे ..... हात उंचावून
ये ना आई लगेच बाहेर .... काम दे सोडून

पाऊस आला पाऊस आला

गडगड गडगड कोण गरजले
लखलख लखलख कसे चमकले

टपटप टपटप थेंब टपोरे
रस्ते अंगण ओले सारे

सुगंध भारी कुठून आला
अरे हा तर वळिव पडला

तडतड तडतड गारा पडल्या
मजेत वेचू खाऊया चला

गाणे गाऊन नाचू या चला
पाऊस आला पाऊस आला

कार माझी लाले लाल

कार माझी लाले लाल
पळते भारी हे धमाल

आहे जरी छोटी फार
स्लीम स्लीक स्पोर्ट कार

बेडवरुन कपाटावर
जमिनीवरुन टेबलावर

दमत नाही अज्जिबात
अस्ली पळते ना सुसाट

पेट्रोल-बिट्रोल काही नको
हातात धरुन पळवतो

कित्ती नाचवतोस ती कार
आई ओर्डू नकोस फार

म्हणे लगेच आवरा आवरा
आत्ता कुठे वाजले बारा .....

जागू -राधा स्पेशल...

माय लेकी पी सी वर ..... पी सी वर
गप्पा रंगल्या नि ग वर .... नि ग वर
(गप्पा रंगल्या मा बो वर .... मा बो वर)

झाडे पाने फुले पहा .... फुले पहा
राधा जरा शांत रहा .... शांत रहा

एवढे पोस्ट करते मी .... करते मी
चळवळ जरा कर कमी .... कर कमी

मधेच लाऊ नको बोट ...... नको बोट
बघ पडली तिन्दा पोस्ट .... तिन्दा पोस्ट

की बोर्ड लवकर सोड सोड ..... सोड सोड
राधा हसली गोड गोड .... गोड गोड....

कसे नि कुठून ???

उंच उंच आकाशात ढग येतात कुठून ?
ढगात या एवढाल्या पाणी भरतात कुठून ?

पाणीवाले ढेरपोटे ढग कसे पळतात ?
ढकलाढकली करताना दंगा किती करतात ?

वीज कशी चमकते काळ्या ढगातून ?
पाणी कसे पडते बदाबदा त्यातून ?

ढग तर काळा काळा दिसतो किती दुरुन ?
पांढर्‍या शुभ्र गारा पडतात कशा त्यातून ??

किती प्रश्न विचारशील कसे नि कुठून...
खा जरा गारा नि ये मस्त भिजून ....

अक्षय नाते...

इथेच आहे कृष्ण अजुनही
राधासखीही इथेच रुळली
देहाची आसक्ती सुटता
मधुराभक्ति तरी गवसली

दिव्यप्रेम हे जीवाशिवाचे
अजून फुलते असे धरेवर
गाथेमधुनी कधी बरसते
ज्ञानेशाच्या ओवीतून झरझर

राजघराणे त्यागून मीरा
वाट चालते वृंदावनची
लोभावून हरि धावत मागे
जनाईसंगे शेण्या वेची

समर्पणाची मस्ती आगळी
'माझे-मीपण' काही नुरते
देवभक्त ते एकचि होता
कान्हा-राधा अक्षय नाते...

नसे ओळखीचा तुझ्या मी जगाला
मशीदी मधे शोधतो विट्ठलाला

तुझ्याशी अबोला करायास जाता
तुझ्या लोचनांनी हसावे कशाला

मना रे, कशाला जळावे पुन्हा तू
पुन्हा आसवांनो जरा या घराला

नका कुंडलांनो दिवे मालवू रे
तिच्या सावलीला बघा घात झाला

कशाला पुरावा कशाला दुरावा
पहा, माफ केले तरी मी तुम्हांला *

तिचा शेर प्रत्येक जेथे असावा
करू द्या अशी शायरी शायराला **

असा मी कसा मी निराळा निराळा
स्वतः मीच धिक्कारतो रे स्वतःला

कुठेही करावा कडेलोट माझा
नसावा तिचा गाव त्या पायथ्याला

- Kiran..

पंच महाभूते

धरा झेली सार्‍या भूता
ठेव अवघी सांभाळी
भार वाहते एकली
उभ्या जगाची माऊली

ठेव थेंब ओलाव्याची
अनमोल सार्‍या जीवा
फुले जीवनाचा मळा
जीव भेटतसे जीवा

ठेव दीप्तीमंत अति
रवी हृदय अंबरी
उब अंतरात जरी
जीव चळवळ करी

ठेव झुळुझुळु वाहे
वारे आसमंती जात
बांधताती हळुवार
पृथ्वी-आप जन्मगाठ

महाभूत ते थोरले
पैस दिसेना कळेना
राही व्यापून चारींना
काय दाखवाव्या खुणा

विरोधात ठाकताती
एकाचढ एक जाणा
तरी असे कालवले
यांचा निवाड लागेना

ज्ञानेश्वरी समजावून घेताना....

सर्वस्य चाहं हृदि संनिविष्टो मत्तः स्मृतिर्ज्ञानमपोहनं च |
वेदैश्च सर्वैरहमेव वेद्यो वेदान्तकृद्वेदविदेवचाहम् ||१५|| गीता - अध्याय १५ ||

सर्वांतरी मी करितो निवास । देतो स्मृति ज्ञान विवेक सर्वा ॥ समग्र वेदांस हि मी चि वेद्य । वेद-ज्ञ मी वेद-रहस्य-कर्ता ॥ १५ ॥ गीताई||

"एऱ्हवीं सर्वांच्या हृदयदेशीं| मी अमुका आहें ऐसी| जे बुद्धि स्फुरे अहर्निशीं| ते वस्तु गा मी ||४२१||"
अशी अतिशय सुरेख सुरुवात करुन परमात्माच कसा सर्वांच्या अंतरात "मी मी" असा अहर्निश स्फुरत असतो हे माऊली विवरुन सांगताहेत.

हे सगळं मुळातूनच वाचण्यासारखे आहे.

गाणीच गाणी...

छान छान गाणी गोड गोड गाणी
म्हणू या राणी दोघी जणी

वेलीची गाणी फुलांची वेणी
झाडांची गाणी फळांची गोणी

पर्‍यांची गाणी जादू कहाणी
राजा-राणीची मजेची गाणी

पावसाची गाणी झुळझुळ पाणी
गडगड ढगांची लखलख गाणी

बागेची गाणी झोपाळ्यावाणी
झूऽम झूऽप अवखळ गाणी

पापी तुझी साखरेवाणी
हसते कशी राधाराणी....