आणखी एक कविता
संधीप्रकाश
हा कुसुंबी संधीप्रकाश
उतरत जातो
गर्द गहिर्या
काळजातल्या डोहात
गडद होत जातो
सभोवार साकळलेला
संदीग्ध अंधार...
एखादा जांभुळी निळा
आकाशी तुकडा
बुडून जातो...
निश्चल झाल्या जळात!
कधीकाळी प्रेम केलेली
दुर निघून गेलेली
वंचित झालेली
जी कधी नव्हतीच आपली
अशी सगळी माणसे
विद्ध हृदयात दाटी करतात!
इतक्यात जमून येत
चांदण मस्त आकाशात
उमलतो चंद्र गव्हाळसा
गंधाळतो साकव वेलीचा
स्पर्शून जातो क्षण सुखाचा!