------------------------------------------------------------
मांड एकदा डाव नव्याने
जगण्याचा घे ठाव नव्याने
धागे दोरे नारळ झाले
देवा आता पाव नव्याने
झाली गेली विसरुन चर्चा
लिही तुझे तू नाव नव्याने
नाकावरती रुमाल आला
म्हणजे आले गाव नव्याने
धोंड्याचा महिना आला का?
चिघळेल अता घाव नव्याने
जिंकला जरी शर्यत परवा
आज एकदा धाव नव्याने
तिने वाचले ना प्रेमपत्र
म्हणजे लिहिणे ताव नव्याने
गझला लिहिल्या जरी कितीही
अजून आहे हाव नव्याने
आजन्म दुःख येथे सोसायचे कुणाला
शत्रुत्व का सुखांशी साधायचे कुणाला
जे जे मनात येते ते ते लिहीत जातो
समजत जगास नाही भांडायचे कुणाला
माणूस वागतो जर कुत्र्यापरी जगाशी
मग प्रश्न एवढा की? पाळायचे कुणाला
नाकारले मला जर माझ्याच आरशाने
बाहेर तोंड आता दावायचे कुणाला
मी घेतली उधारी माझ्याच माणसांची
आहेत ओळखीचे टाळायचे कुणाला
आई तुझा हरवला कोठे पदर कळेना
मी दूध मग अवेळी मागायचे कुणाला
आनंदी आयुष्याची एखादी ओळ लिहावी..
जी दुःखाच्या मंचावरती आधारास पुरावी..!!
इतक्या वेळा तुटलो की उठताही आले नाही..
या तूट-फुटींची सांगा,कोणी भरपाई द्यावी..??
आयुष्याचे अवघे जगणे नितळ करावे म्हणतो..
फक्त जरा श्वासांची तुरटी देवा पुरुन उरावी..!!
आभाळाचा हेवा अन धरतीशी वैर नसावे..
जाणुन मोठेपण इतरांचे आपण लवती घ्यावी..!!
शेतामधल्या मातीला घामाचे देता अत्तर..
गात्रे अन गात्रे पीकांची गंधाळून निघावी..!!
-गणेश शिंदे,दुसरबिडकर..
तू येण्याच्या आधी काही तू गेल्याच्या नंतर..
सखये मी मग मोजत बसतो दोघांमधले अंतर..!!
सोपे नसते.कळले..!आयुष्याचे चंदन होणे..
वेढा घालुन बसलेला प्रश्नांचा नाग निरंतर..!!
येता-जाता 'तो' डोकावत असतो विहिरीपाशी..
'भरल्या' विहिरीतुन नक्की जगण्याचा मिळतो मंतर..!!
सारवलेली मायेने स्वप्ने शेणा-मातीची..
फरशीवर त्यांना 'पुसण्या'वाचुन नाही गत्यंतर..!!
कृष्णाला पाहुन त्या पुतनेलाही फुटला पान्हा..
मग का आजमितीच्या कैक यशोदांचे स्थित्यंतर..??
-गणेश शिंदे..
दुसरबिड,बुलडाणा...
इथे पहा केवढे खलाशी
तरी गझल चालली तळाशी
कुणी हसावे, कुणी रडावे
कधीच नाते नसे कुणाशी
कधी कधी दानशूर असते...
कधी कधी वाटते अधाशी
कधीच नव्हतेच होय नाते ?
उगा मला वाटले मगाशी...!
नकोस माझ्याकडे बघू तू...
तुझे असे बघ तुझ्याचपाशी
नको बघू रोज डाग माझे
कधी तरी बघ तुझ्या मुळाशी
कधीच मी तूप सोडलेले....
तरी पहा शिंकलीच माशी
कधी नसे आपल्यात स्पर्धा
तुझीच स्पर्धा असे तुझ्याशी
मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
