''बाबा''
तुझ्याविना मी एकाकी मज मिठीत घे ना बाबा
शिवी द्यायला,रागवायला,परतून ये ना बाबा II धृ II
आठ जणांचे कुटुंब होते,संकट थोडे नव्हते
सौख्याने पण तुडुंब होते,कसले कोडे नव्हते
दु:खाग्नीला शमवायाचे धाडस दे ना बाबा II 1 II
शिवी द्यायला,रागवायला,परतून ये ना बाबा
गुरुजी होते गावासाठी,पण सा-यांचा बाबा
ताई,माई,तरुण आणिक म्हाता-यांचा बाबा
कुणास बाबा बोलायाला जीभ धजेना बाबा II 2 II
शिवी द्यायला,रागवायला,परतून ये ना बाबा
तुझ्याविना ही धुरा घराची,कशी वहावी बाबा
अगतिक झालेल्या आईला,कशी पहावी बाबा
वठवू कैसी तुझी भूमिका, काहि कळे ना बाबा II 3 II
शिवी द्यायला,रागवायला,परतून ये ना बाबा