मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
प्रवाहवेडी...
Submitted by सुशांत खुरसाले on 11 March, 2013 - 12:01
उंबर्याला चाहूल नवी
दिशांना अन् भूल नवी
स्वप्नांनाही झूल नवी
ती येत आहे.....
मखमलीतले गाणे गाऊन
दिशादिशांचे थवे तरारून
पण मातीचे शब्द लपेटून
ती येत आहे.....
संकरातले शब्द तरीपण
ओंजळीतले तिच्या उरे मन
प्रवाहवेडी नाजूक खणखण
ती येत आहे....
अगम्य झेले तरी झेलवी
प्रतिकातले शब्द बोलवी
गमे मनाची चैत्रपालवी
ती येत आहे......
तिच्या मनीचे व्याकूळ प्याले
ओतून दिधले गोकूळ झाले
व्यर्थ जरी रे श्रेय मिळाले
ती येत आहे.....
विषय:
