बहावा

काही गोष्टींकडे मनात नसतानाही लक्ष जातं, त्या गोष्टी डोळ्यात भरतात आणि नंतर मनात घर करून राहतात.
रोजच्या धावपळीत शहरात बहावा दिसला तर नशीबवान आहात, नाहीतर रानात किंवा घाटात, रस्त्याच्या कडेला तो हमखास दिसतो.
तसं ते एक सामान्य झाड!
पण वर्षभर सामान्य दिसणारा हा राजवृक्ष त्याचं खरं ऐश्वर्य दाखवतो उन्हाच्या झळा लागताना.. ऐन उन्हाळ्यात!

ऊन हळदीचे आले.....

माझ्या मनावर सोनपिवळं गारूड घालणारा 'बहावा' माझ्या 'निसर्गभाव' या काव्यसंग्रहातून -
बहावा

हिरवी हिरवी गार
साडी नवरी नेसली
सोनपिवळ्या फुलांची
अंगी हळद माखली

भर उन्हात उभी
कुणी सखी साजणी
प्रेमभाव मनीचे
पक्षी गातात गाणी

थंड वाऱ्याची येता
मंद झुळूक वनी
पिवळ्या धम्म फुलांचे
डूल डुलती कानी

अंगठा रुतून भूमीत
लाजता ही नारी
वाटे आली जणू
नवरदेवाची स्वारी