भक्ती गीत

ध्यास मनी घेता दिसली पंढरीची वाट
विठ्ठलाचे नाम घेता सरला पहा घाट |

तुळशीमाळ हाती घेऊ मुखी ठेऊ नाम
जीवनात राहू देऊ सदोदित राम |

संसारात नित्य कष्ट आपुल्या जिवाला
नाम घेणे ठरते इष्ट घोर ना जिवाला |

करू यातना अर्पण चंद्रभागेपोटी
नाम नेईल तारून सुखाच्याच भेटी |

दु:ख हानी दूर पळते येऊनिया वीट
शांती समाधान मिळते मंदिरी अवीट |

डोळ्यामध्ये घेऊ आता रूप साठवून
विठ्ठलाला शरण माथा चरणी टेकवून |

जीवनाला अर्थ गाता ग्यानबाची ओवी
राम राम घेऊ जाता तुकोबाच्या गावी |

खोल खोल आतवर तुझी नजर
ईश्वरा कृपे तुझ्या बहर बहर

श्वास श्वास गुंफुनी तुझ्या कृपे
नीर्जिवास ईश्वरा तुझा पदर

चेतना चराचरात गुंजते
घोषणा तुझी तुझी तुझा गजर

एकटा नसे इथे कुणी कुणी
तू सवे सवे सदा हजर हजर

राज्य हे तुझे तुझीच संपदा
लाभुदे धरोहरातली नजर