-चिकन किंवा मटणाचे तुकडे धुवून त्याला मीठ आणि वाटलेले आले-लसूण आणि दही लावून किमान अर्धा तास मुरू द्यावे.

-रश्श्याच्या वाटणसाठी सुके खोबरे, तीळ, खसखस थोडे भाजून घेऊन त्यात वेलची, काजू, सुक्या मिरच्यांची बी घालून वाटून घ्यावे. हे वाटण बारीक व्हायला हवे. बाकीचे जिन्नस आधी कमी पाण्यात वाटून मग त्यात काजू घालून पुन्हा वाटले तरी चालेल.

- कांदे उभे पातळ चिरुन घ्यावेत. पातेल्यात तेल, तूप टाकून त्यावर मिरे, लवंगा, दालचिनी, तमालपत्र टाकून मग कांदा आणि उभे कापलेले आले टाकावे व परतून घ्यावे.

- मग मॅरिनेट केलेले चिकन वा मटणाचे तुकडे टाकून नीट सवताळून घ्यावे. त्यात पाणी टाकावे. तुकडे बुडून वर २-३ इन्च पाणी राहिले पाहिजे. मंद आचेवर शिजवावे.

- चिकन्/मटण शिजल्यावर रश्श्याचे वाटण घालून चांगली उकळी आणावी. दाट वाटल्यास थोडे पाणी घालावे व चवीप्रमाणे मीठ घालावे.

हा रस्सा नुसता प्यायला चांगला लागतो. साध्या भातावरही घेता येतो.

प्रकाशचित्र - अनिलभाई.

चिक चे स्किन काढुन मोठे तुकडे करुन स्वच्छ धुवून, कोरडे करून घ्यावे
त्यात हळद, मीठ, आले लसूण वाटून, मालवणी मसाला, गरम मसाला, दही आणि सर्व खडा मसाला लावून मुरु द्यावे. नीट झाकण लावून फ़्रीज मधे रात्रभर तरी ठेवावे.
सर्व कांदे उभे पातळ चिरून घ्यावे.
नॉन स्टिक पॅन मधे तेल आणि बटर घालून मंद आचेवर कांदे परतून घ्यावे- अगदी मऊ आणि काळसर झाले पाहिजेत.
तांदूळ धुवून अर्धा एक तास तरी निथळत ठेवावे.

थोडे लोणी, मीठ आणि २ लवंगा, वेलची,मिरी घालून जरा अर्धा कच्चा भात करुन घ्यावा.

अ‍ॅल्युमिनियम फॉइलच्या पॅन मधे तळाशी थोडे बटर घालावे

त्यावर तळलेला कांदा घालावा
त्यावर चिकनचे मिश्रण घालावे
नंतर टोमेटोच्या चकत्या व बारीक चिरलेली कोथिम्बीर घालावी
बटाट्याच्या तळलेल्या फोडी (ऐच्छिक)घालाव्या
वरून भात घालावा
शेवटी परत तळलेला कांदा घालावा.
तळलेले काजू व उकडून सोलून अर्धी चिरलेली अंडी घालावीत.
थोड्या दुधात खललेले केशर शिम्पडावे.
भात घालताना मधून मधून थोडे बटर ही घालावे.

वरून फॉइल ने घट्ट झाकून ४५० डिग्री ओवन मधे ५० ते ६० मिनिटे शिजवावे.

१. चिकनचे तुकडे स्वच्छ धुवून, कोरडे करून मधे चीर देउन open करून त्याला मीठ, मीरपूड लावा.
२. एका बोलमधे (किंवा झिपलॉकमधे) चिकन, १/२ कप संत्र्याचा रस, १ टे. स्पून सोयासॉस, थोडे आल्याचे तुकडे, १ चमचा मीट टेंडरायजर घालून नीट मिसळून एक तास फ्रिजमधे मॅरीनेट करायला ठेवा.
३. एका पॅनमधे तीळाचं किंवा शेंगदाण्याचं तेल घेउन उरलेले आल्याचे तुकडे घाला. मिरच्या, पातीचा कांदा, मश्रूम्स घालून परतून घ्या. चिकन स्टॉक घालून, सोया सॉस घालून चव बघून मीठ घाला. संत्र्याचा रस आंबट असेल अगदी थोडा मध घालायचा. उकळी आली की कॉर्नफ्लॉवर पाण्यात मिसळून घाला. बाजूला ठेवा.
४. एका तासाने चिकन बाहेर काढून Cast Iron ग्रिल पॅन असेल तर त्यावर ग्रिल करून घ्या. बार्बेक्यूवर ग्रिल करून घेतलं तरी चालेल. नाहीतर एखाद्या पॅनमधे दोन्ही बाजूनी नीट शिजवून घ्या.
सर्व्ह करताना चिकन डिशमधे ठेउन त्यावर सॉस घालून द्या. बरोबर पांढरा भात द्या.

प्रथम चिकन साफ़ करुन घ्या हवे तसे तूकडे करुन घ्या. एक नंबरचे मुरवण चोळून् अर्धा
तास ठेवा.
चिकनमधले काढलेले भाग, व स्टॉकसाठी दिलेले जिन्नस एकत्र करुन त्यात सहा कप पाणी
घाला. सर्व कूकरमधे दहा मिनिटे शिजवा. कूकर उघडून थोडेसेच घोटा. व पाणी गाळून घ्या.
वर चरबी जमली असेल तर काढून टाका.
मग चिकनला २ नंबरचा मसाला लावून घ्या.
तांदूळ धुवून निथळत ठेवा.
एका जाड बुडाच्या पातेल्यात कांदा तळून सोनेरी कुरकुरीत करुन घ्या. (त्यावर थोडेसे मीठ व
साखर घातल्यास तो लवकर सोनेरी होतो. ) तो बाहेर काढा व त्यात पातेल्यात चिकन परतून
घ्या. झाकण ठेवून चिकन पूर्णपणे शिजवून घ्या. (यासाठी प्रेशर पॅन वापरले तर चांगले )
चिकन शिजले कि त्यात, तळलेल्या कांद्यापैकी बराचसा कांदा कुस्करून घाला. व ते बाजूला ठेवा.
(आवडत असेल तर चिकनमधे शिजताना अर्धा कप टोमॅटो प्युरी घाला, व तेल सुटेपर्यंत शिजवा )

खड्या मसाल्याची फ़ोडणी करुन, त्यात मोजून चार कप तयार केलेला स्टॉक घाला. स्टॉकला उकळी
आली कि त्यात् तांदूळ वैरा. अधून मधून ढवळत तो शिजवा. लागलाच तर शिजण्यापूरता आणखी
स्टॉक घाला. तांदूळ थोडी कणी राहील असाच शिजवा. (आवडत असल्यास र्ंगासाठी भातात थोडी
हळद् घाला. वेळ आणि हौस असेल तर अर्धा भातच पिवळा करा. )

आता चिकनवर तो अलगद पसरा. दोनरंगी असेल तर त्याचे थर द्या. त्यावर उरलेला कांदा पसरा
अगदी मंद आचेवर आठ दहा मिनिटे ठेवा. भांड्याखाली तवा ठेवला, तर चांगले.

उकडलेली अंडी जाड्या किसणीने किसून् त्याचा चूरा करून् घ्या. हिरव्या मिरच्या अगदी बारीक
चिरुन घ्या. बटर गरम करुन त्यावर मिरच्या परतुन घ्या. त्यावर अंड्याचा चुरा व मीठ घाला.
आच बंद करुन कोथिंबीर घाला. सगळे हलक्या हाताने मिसळा. तयार बिर्यानिवर वाढण्यापूर्वी
हे मिश्रण पसरा.

चिकनचे लहान तुकडे करून त्याला हळद तिखट मीठ आले-लसूण पेस्ट व एक चमचा दगडू तेली मसाला लावून ठेवावा.
एक कांदा बारीक चिरून थोड्या तेलात परतून घ्यावा. कांदा ब्राउन झाला की त्यातच ओले खोबरे परतुन घ्यावे. मग सुके खोबरे घालून परतून घ्यावे.
गार झाल्यावर कांदा खोबरे बारिक वाटून घ्यावे.

उरलेले कांदे बारीक चिरून तेलात परतून घ्यावेत. कांदा पारदर्शक झाला की चिकन व हिरव्या मिरच्या घालून परतावे व मंद आचेवर शिजू द्यावे. शिजत आले की त्यावर कांदा खोबरे वाटण व उरलेला मसाला घालावा. शेवटी बारिक चिरलेली कोथिंबीर घालावी.

भाकरी ,पाव याबरोबर अगदी मस्त लागते.

आलं-लसुण, कोथिंबीर एकत्र वाटुन घ्यावे. चिकनला दही, हळद १ चमचा धण्याची पावडर, मीठ व अर्धा खोबर्‍याचा कीस व निम्मे वाटण चोळुन अर्धा तास ठेवावे.
एक कांदा उभा चिरुन थोड्या तेलावर काळसर होईपर्यंत परतुन घ्यावा व वाटुन घ्यावा.
कुकरमध्ये थोड्या तेलावर उरलेल्या वाटणापैकी निम्मे वाटण व निम्मा कीस व अर्धा वाटलेला कांदा परतुन घ्यावा. त्यात थोडी हळद व २ चमचे धण्याची पावडर घालुन परतावे. थोडेसे तेल सुटु लागले की चिकन घालुन परतावे व नंतर त्यात पाणी घालुन शिजवावे. एका शिट्टीमध्ये चिकन शिजते.
एका कढईत थोडे तेल घेवुन त्यात उरलेले वाटण, कीस व कांदा परतावा. त्यात १ चमचा धणे पुड, ४ चमचे तिखट व ५-६ चमचे काळा मसाला घालुन परतावे. छान तेल सुटल्यावर कुकरमधल्या चिकनपैकी थोडे चिकन व रस्सा बाजुला ठेवुन बाकीचे ह्या मसाल्यात घालावे. गरजेप्रमाणे मीठ घालावे. बारिक गॅसवर थोडावेळ उकळु द्यावे.

आईचे मसाल्याचे प्रमाण :
१ वाटी धणे, दिड चमचा जीरे, एकेक चमचा शहाजीरे, लवंगा, दालचीनी, मिरे, खसखस, नागकेसर, अर्धा चमचा सुंठ पावडर, ५-६ बडी विलायच्या, ४-५ तमालपत्र, तेवढेच दगडफुल, एक कांदा वाळवलेला, ३ चमचे खोबरं आणि एक त्रितियांश वाटी तिखट.
इथे चमचा म्हणजे टेबलस्पुन.. ( मी नेहेमी गडबड करते टीस्पुनच्या जागी टेबलस्पुन अन उलटं वापरते म्हणुन मुद्दाम लिहिलय..)
सगळे पदार्थ थोड्या तेलावर वेगवेगळे भाजुन घ्यायचे व बारिक वाटायचे...
तिखटाचे प्रमाण खाण्याच्या कॅपॅसिटीप्रमाणे बदलावे.. - इति आई

चिकनचे तुकडे बुडतील एवढं थंड पाणी एका जाड बुडाच्या पातेल्यात घालून, त्यात चिकन व अर्धा कप बारीक उभा चिरलेला कांदा घालून शिजत लावावे. ( फ्रोझन चिकन असेल तरी चालतंय )
एखादं तेज पान घालावं.

२ कप तांदळाचा भात करून घ्यावा.
उरलेला कांदा उभा पातळ चिरावा.
लसूण सोलून बारीक चिरून घ्यावा .
टोमॅटॉ बारीक चिरून घ्यावे.

ब्लॅक बीन्स सूप साठी
एका पातेल्यात २-३ टे स्पून तेल घालून ( ऑलिव्ह ऑइल चालतंय ) त्यावर २ पाकळ्या एवढा लसूण घालावा. मिनिटभरात एक कप बारीक उभा चिरलेला कांदा घालावा. कांदा परतून त्यावर फुगी मिरची घालावी. थोडं परतून त्यावर ओरेगानो ( १ टी स्पून ) , अडोबो सीझनिंग ( १ टी स्पून ) घालावे. १-२ टे स्पून व्हिनेगर घालावा व ब्लॅक बीन्स त्यात ओतावेत. थोडं पाणी घालावं. चवी पुरतं मीठ घालून उकळू द्यावं. उकळी आल्यावर मंद आचे वर ८-१० मिनिटे ठेवावं.

चिकन टिंगा साठी
एका जाड बुडाच्या पातेल्यात २-३ टे स्पून तेलावर उरलेला लसूण थोडा परतावा. त्यावर १ कप बारीक चिरलेला कांदा घालून परतावा. कांदा मऊ झाला की टोमॅटो घालावे व कॅन मधल्या २-३ चिपोटले मिरच्या बारीक चिरून घालाव्यात. त्याच कॅन मधला रस पण २-३ चमचे घालावा. मिश्रण मिळून येईपर्यंत चिकन शिजेल. त्याचे स्किन/ हाडे काढून छोटे छोटे तुकडे करावेत ( श्रेडेड चिकन तयार असेल तर साधारण दोन कप लागेल ).
ते चिकनचे तुकडे घालून मीठ घालून सगळं मिश्रण मंद गॅसवर शिजू द्यावं १०-१२ मिनिटं.

अर्धी वाटी बारीक चिरलेला कांदा, थोडी कोथिंबीर, लिंबाचा रस किंवा व्हिनेगर , मीठ हे कालवून ठेवावे. हौशी मंडळींनी अर्धी हाबनेरो मिरची बारीक चिरून टाकायला हरकत् नाही.

वाढताना एका सुप बाउल मधे थोडा भात घालावा. त्यावर ब्लॅक बीन्स वाढून त्यावर थोडे कॉर्न चिप्स कुस्करून घालावेत.

टाकोज तव्यावर थोडे गरम करून
प्रत्येक टाकोवर चिकन चे मिश्रण, कांदा व आवडत असल्यास थोडे मेक्सिकन चीझ किंवा कुठेलेही व्हाईट चीझ किसून घालावे.

सोबत प्यायला
उंच बीअर ग्लास मधे एक-२ टेस्पून लाइम जूस ( लेमन नव्हे ) , १/२ टी स्पून मीठ घालून त्यावर कुठलीही लाईट बीअर हळू हळू ओतावी - याला मिचेलाडा म्हणतात . कुठल्याही तिखट पदार्थाबरोबर एकदम मस्त !

कोंबडीची स्किन काढून कोंबडी स्वच्छ धुवावी. नंतर आले लसूण पेस्ट, मीठ आणि दही लावून अर्धा तास तरी ठेवावे.

सुके खोबरे भाजून घेऊन गरम मसाला घालून बारीक वाटावे. हे वाटण कोंबडीच्या आतल्या भागाला लावावे.

पातेल्यात तूप / तेल गरम करून त्यात ओले खोबरे, खसखस + तीळ पूड, बारीक चिरलेला कांदा, लिंबूरस, काजू, मिरची, आले, लसूण, कोथिंबीर, बेदाणे, हळद, मीठ घालून चांगले परतावे. हा मसाला थंड झाल्यावर कोंबडीत भरावा. मसाला बाहेर पडू नये म्हणून दोरा बांधावा.

शेवटी तूप / तेल गरम करून बाहेरच्या बाजूने कोंबडीला लावावे. ओव्हन मधे ठेवून ४०० डिग्री वर ४५ मिनिटे ते १ तास बेक करावी. जाड बुडाच्या पातेल्यात गॅस वर सुद्धा भाजता येईल.
वाढताना सुरीने चकत्या करून कांदा, टोमॅटो चकत्या आणि लिंबाच्या फोडी बरोबर द्यावी.