पारंपारीक मराठी

फोडणीचे पोहे - भाज्या घालून

Submitted by योकु on 29 December, 2016 - 10:18
लागणारा वेळ: 
३० मिनिटे
लागणारे जिन्नस: 

- दोन ते अडीच वाट्या जाड पोहे
- वाटीभर ताजे मटार दाणे
- पाऊण वाटी फ्लॉवरचे बारीक तुरे
- एक मध्यम बटाटा काचर्‍या करून
- एक मध्यम मोठा कांदा पातळ उभा चिरून
- पौष्टिकपणा हवाच असेल तर बोगातु बारीक चिरून
- थोडे शेंगदाणे
- चार, पाच तिखट हिरव्या मिरच्या बारीक चिरून
- २०/२५ कढिलिंबाची पानं
- मीठ
- साखर
- लाल तिखट
- तेल
- मोहोरी
- जिरं
- कोथिंबीर
- लिंबू
- ओलं खोबरं/ सुकं खोबरं किसून
- भुजिया शेव

क्रमवार पाककृती: 

- पोहे स्वच्छ निवडून, धूवून मग पाण्यात मिनिटभर भिजत घालावेत. नंतर चाळणीत निथळत ठेवावे.
- सगळ्या भाज्या बारीक चिरून तयार ठेवाव्यात
- जरा जास्त तेलाची फोडणी करावी. तेल चांगलं तापलं की मोहोरी घालावी, ती तडतडली की मग जिरं; त्यावर मिरच्या मग शेंगदाणे घालावेत. दाणे जरा खरपूस झाले की मटारदाणे घालावेत.
- त्यावर कांदा घालून परतावं. कांद्याचा जरा रंग बदलला की बटाट्याच्या काचर्‍या, फ्लॉवरचे तुरे आणि कढीलिंबाची पानं घालावीत (जरा नंतर कढीपत्ता घातल्यानी त्याचा हिरवा रंग टिकतो). हे सगळं नीट परतायचं आहे. यात आता संपूर्ण पोह्यांना पुरेल एवढं मीठ घालून परतावं आणि झाकण घालून एक दणदणीत वाफ आणावी. बटाटा, मटार, फ्लॉवर शिजला की मग हळद, तिखट घालायचं.
- पुन्हा एकदा २ ते ३ मिनिटं परतायचं म्हणजे तिखटाचा, हळदीचा कचवटपणा जाईल.
- यात आता भिजवलेले पोहे घालायचे, चवीला थोडी साखर घालायची मोठं अर्ध लिंबू पिळायचं. सगळं व्यवस्थित हलवून झाकण घालून पुन्हा एक दणदणीत वाफ येऊ द्यायची.
- भरपूर भाज्या घातलेले एकदम चविष्ट पोहे तयार आहेत.
- मस्तपैकी आपल्याकरता प्लेट भरून घ्यायची. त्यावर भरपूर हिरवीगार कोथिंबीर घालायची, ओलं खोबरं किसून घालायचं, बाजूला थोडी भुजिया शेव घ्यायची; लिंबाची एक फोड ठेवायची. आवडतं पुस्तक, नाटक, टिव्ही, गाणी काय हवं ते लावायचं, सोबत घ्यायचं; अंगावर शाल घ्यायची आणि मग हे पोहे गरमागरम चापायचे. अगदी पोटभर. Happy

वाढणी/प्रमाण: 
२/३ लोकांकरता पोटभर
अधिक टिपा: 

- सगळे जिन्नस आपआपल्या आवडीनुसार, चवीनुसार कमी जास्त करता येतील. एखाद दुसरी वस्तू बदलली/ वगळली तरी चालेल. आपल्याकरताच तर करायचेत! Wink
- हळद घालतांना जरा जपून
- लिंबू, कोथिंबीर, ओलं खोबरं यात कंजूषी नको
- तेलही जरा जास्त लागेलच कारण सगळ्या भाज्या तेलावरच शिजवायच्या आहेत. तसंही तेल फार कमी झालं तर पोहे कोरडे वाटतील. तेल, या वापरलेल्या भाज्या, कोथिंबीर वगैरे जिनसांमुळे मस्त मॉईस्ट, वाफभरले पोहे होतात.

माहितीचा स्रोत: 
थोडा फ्लॉवर होता, तो कुठे ढकलायचा या विचारात हे पोहे झालेत.
पाककृती प्रकार: 
प्रादेशिक: 

गाजर मिरचीचे लोणचे

Submitted by टीना on 24 December, 2016 - 06:37
लागणारा वेळ: 
३ दिवस
लागणारे जिन्नस: 

१. अर्धा किलो गाजर
२. १ पाव हिरवी मिरची
३. अर्धी वाटी मिठ
४. पाव वाटी मोहरी डाळ
५. ४ चमचे मोहरी
६. २ चमचे हिंग
७. ४ वाटी तेल
८. १ वाटी किसलेला गुळ
९. २ मोठ्या लिंबाचा रस
१०.२ चमचे हळद

क्रमवार पाककृती: 

१. गाजर छिलुन त्याच्या लांब उभ्या फोडी कराव्या. हिरव्या मिरचीच्या सुद्धा लांब उभ्या फोडी कराव्या.

२. गाजर मिरचीला एकत्र करुन त्यात अर्धी वाटी मिठ टाकावे. (मी हे मिश्रण रात्रभर मुरत घातले त्यामुळे त्याला पाणी सुटले ज्याचा लोणच्याचा रस तयार झाला. )

३. दुसर्‍या दिवशी तेल गरम करुन त्यात मोहरी, हिंग व मोहरीच्या डाळीची फोडणी द्यावी.

४. तेल थंड होईस्तोवर गाजर मिरचीच्या मिश्रणात हळद, लिंबु व गुळ घालुन एकत्र करावे.

५. थंड तेलाची फोडणी घालुन निट एकत्र करुन लगेच खायला घ्यावे. Proud

वाढणी/प्रमाण: 
हा एक अभ्यासाचा विषय आहे.
अधिक टिपा: 

१. हे लोणचं वर्षभर टिकेल कि नाही माहिती नाही. आमच्याकडे एक दोन महिन्यातच रपातपा होतं.

२. गाजर मिरचीच्या मिश्रणाला पाणी सुटु द्यायच नसल्यास रात्रभर मुरत ठेवु नये.

३. गुळ ऑप्शनल आहे.

४. वर लागणारा वेळ मधे दिडदिवस/२ दिवस असा ऑप्शन नसल्याने ३ दिवस असे सिलेक्ट केले आहे Wink Proud

शब्दखुणा: 
माहितीचा स्रोत: 
मातोश्री
पाककृती प्रकार: 
प्रादेशिक: 

संत्रे पाक

Submitted by सायु on 14 December, 2016 - 07:04
लागणारा वेळ: 
२५ मिनिटे
लागणारे जिन्नस: 

संत्री = ३
साखर = दीड वाटी
जायफळ वेलचीची पुड
लिंबु = १/२

क्रमवार पाककृती: 

नागपूरला साधारण नोव्हेंबर ते फेब्रुवारी, हा संत्राच्या खास मोसम असतो. या दरम्यान चांगली मधुर आणि रसा़ळ संत्री चाखायला मिळतात.. फ्रीज मधली थंड गार संत्री, नुसती सोलुन नाही तर मोसंबी सारखी चिरुन, आणि त्यावर तिखट, मिठ, चाट मसाला घालुन खाणे ..आ हा हा ! केवळ स्वर्ग सुखच...

आमच्या कडे शेकड्यानी संत्री येतात.. आणि संपतातही Happy
आणि हा संत्रे पाक दोन तीन दा तरी केलाच जातो..:)
तर वळु या कृती कडे....

संत्री निवडतानाच, पातळ सालाची घ्यावी, चवीला हमखास गोड असतात...

संत्री सोलुन फोडी वेगळ्या करुन घ्या.. सुरीने फोड उकलुन वरचं आणि पाठीकडचं आवरण, बिया वगैरे
काढुन, आतला गर सोडवुन घ्या.. त्याचे काप करुन घ्या..

एका जाड बुडाच्या पातेल्यात दीड वाटी साखर बुडेल ईतपत पाणी घाला आणि एकतारी पाक करुन घ्या. साधारण १५ ते २० मीनिटात होतो.. मग त्यात संत्राच्या सोललेल्या फोडींचे काप घाला आणि फक्त ५ ते ७ मी. मंद आचेवर उकळु द्या.. अर्धा लिंबाचा रस पीळा आणि गॉस बंद करा.. गार झाला की जायफळ विलायची ची पुड घाला.. आणि काचेच्या हवाबंद बरणीत भरुन ठेवा..
रंग आणि चव एकदम छान..

पुर्‍या,पराठे, ब्रेड कशा बरोबर ही खाउ शकता.. खुप छान लागतो..

संत्रे पाक गरम असताना...

आणि गार झाल्यावर.. ईतपत आळतो..

अधिक टिपा: 

लिंबाचा रस सगळ्यात शेवटी घालायचा आहे.. छान सुधारस सारखी चव येते..

माहितीचा स्रोत: 
माझी आजी
पाककृती प्रकार: 
प्रादेशिक: 

आंबाडी च्या पाकळ्यांचे लोणचे

Submitted by सायु on 7 December, 2016 - 06:07
लागणारा वेळ: 
१५ मिनिटे
लागणारे जिन्नस: 

एक वाटी आंबाडी च्या बोंडांच्या पाकळ्या (हिवाळ्यात बाजारात हमखास मिळतात, मला मैत्रिणीच्या शेतातल्या मिळाल्या.:))

१/२ वाटी गुळ (खिसलेला)
मेथी दाणे १०,१२
मोहरीची डाळ - २ चहाचे चमचे..
तिखट - २ चहाचे चमचे
तेल - १ पळी
हिंग , मिठ अंदाजेच

क्रमवार पाककृती: 

आंबाडीच्या पाकळ्या स्वच्छ धुवून एका सुती कापडावर पसरवुन ठेवाव्यात. कोरड्या झाल्या की चिरुन घ्याव्या (जास्त बारिक नको) आणि मिठ घालुन एखाद्या दगडीत / काचेच्या बरणीत ५, ६ तास झाकुन ठेवायच्या. नंतर खिसलेला गुळ घालुन नीट कालवुन घ्या.

मसाला तयार करयाच्या आधी १ प़ळी तेल कढईत तापवुन ते थंड व्हायला बाजुला ठेवा.

एका भांड्यात लोणच्याचा मसाल नेहमी जसा रचतो तसाच रचायचा आधी हिंग, मेथी दाणे मोहरीची डाळ, तिखट अणि शेवटी मिठ. त्यावर पळी भर कोमट तेल सोडा. हा मसाला थंड झाला की त्यात आंबाडीच्या पाकळ्या कालवुन घ्या!

झाले लोणचे तय्यार!!!

भाकरी,पोळी वरण भात कशा बरोबरही छानच लागते.

वाढणी/प्रमाण: 
एक वाटी भर होतं.
अधिक टिपा: 

मिठ लावलेल्या पाकळ्यामुळे लोणचे लगेच खाण्याजोगे होते..

माहितीचा स्रोत: 
एका प्रदर्शनात विकत घेतले होते त्यातले घटक + स्वप्रयोग
पाककृती प्रकार: 
प्रादेशिक: 

कांदा-लसूण मसाला (सोलापूरी पद्धतीचे काळे तीखट)

Submitted by स्मिताजित on 7 December, 2016 - 03:40
लागणारा वेळ: 
१ दिवस
लागणारे जिन्नस: 

साहित्य -

१ किलो लाल मीरच्या , शक्यतो लवंगी घेणे नसेल तर कोणतीही तिखट असणारी

१ किलो कांदा (कापून वाळवलेला )

१/४ लसून

१/४ धने

१/४ खोबरे खिसून / पातळ काप करून

५० ग्राम हळकुंड

५० ग्राम मोहरी

५० जिरे

मुठभर धोंड्फुल आणि तमालपत्र

तेल

१/४ किलो खडा मीठ

मसाले १ किलो मिरची साठी प्रत्येकी १० ग्रॅम (प्रत्येक मसाल्याचे २ भाग करणे - ५-५ ग्रॅम )

लवंग

दालचिनी

शाहजीरे

सालीसकट वेलची

(मिरे वापरत नाही कारण त्याने खूपच तिखट आणि जळजळीत तिखट होते, हवे असल्यास वापरू शकता पण थोड्या प्रमाणात )

इतर मसालेही वापरू शकता तुमच्या आवडी प्रमाणे

असेलतर कोथिंबीर वाळवून

सुंठ (वाळवलेले आले )

क्रमवार पाककृती: 

मला माहित असलेली कांदा-लसूण मसाल्याची गावराण पाकृ आई कडून शिकले आहे तिच इथे देते.
आमच्या सोलापूरला हा अशा पध्द्तीचा कांदा-लसूण मसाला घरोघरी बनतो

हा मसाला वर्षाचा एकदाच बनवतात त्याचे प्रमाण मी देवू शकते पण फोटो वैगेरे नाहित

हा कांदा-लसूण मसाला(आम्ही त्याला मसाला तिखट/काळे तिखट असेही म्हणतो) फार झणझणीत असतो, थोडासाही पुरे होतो. मस्त तर्रीवाले मटण्-चिकण होते आणि हे वापरुन भाजी केली तर इतर मसाल्याची गरज ही नसते

कृती-

मिरच्या १ दिवस चांगल्या कडक उन्हात वाळवणे आणि नंतर त्याची देठे काढणे (सगळ्यात कंटाळवाणे काम आणि हात हि तिखट होतात चुकून डोळ्याला लागला कि शिमगाच )

आता साहित्य भाजायला घेणे

जाड बुडाची कढई तापत ठेवणे (आम्ही गावी हे शक्यतो बाहेर चूलीवर करतो कारण पुढे सांगते)

१) त्यात आता कांदा भाजायला घ्या. तेल न घालता कांदा खरपूस अगदी लालसर असा मंद आचेवर भाजून घ्यावा, हाताने दाबले तर तुटायला हवा. आवश्यक वाटल्यास थोडेसे मीठ घालून भाजू शकता

२) लसूण थोडासा ठेचुन ठेवावा

३) धणे कपभर तेलात परतून घ्यावेत ३-४ मिनिट

४ ) आता खोबरेही खरपूस भाजून घेणे , याला तेल लागते

५) आता हळकुंड तळून घ्यायचे, तळला कि हा छान फुगतो

६) मोहरी जिरे देखील थोड्याशा तेलात टाकून परतून घेणे , हे करताना कढईवर १ मीन झाकण ठेवावे, नाहीतर अर्धे जिरे मोहरी तडतडून कढईच्या बाहेर पडतील

७) धोंड्फुल तमालपत्र आणि वापरणार असल्यास सुंठ देखील थोड्याशा तेलात तळून घ्यावे

८) साहित्यात मसाल्याचे २ भाग करण्यास सांगितले होते (प्रत्येकी ५-५ ग्रॅम )

१ भाग मसाला तेलात तळून घेणे, करपवू नयेत लगेच काढायचे तेलातून नाहीतर तुमचे तिखट कडवट होईल

आणि १ भाग मसाला तसाच कच्चा घ्यावा (याचे कारण मला नक्की सांगता येणार नाही, कदाचित मसाल्याचा सुगंध तीखटाला यावा यासाठी असेल)

आता महत्वाचा भाग, मिरच्या भाजणे

मिरच्या भाजताना भयंकर ठसका उठतो, किचनमध्ये केले तर घरात असणाऱ्या व्यक्ती याच्या ठसक्याने खोकायला लागतात म्हणून आम्ही हा मिरची भाजणीचा कार्यक्रम बाहेरच्या चुलीवर करतो

मिरच्या मोठ्या लोखंडी पाटीत किंवा कढईत भाजाव्यात, थोडेसे कोरडे भाजून झाले कि त्यात पळीभर तेल घालावे आणि २-३ मिनिट पर्यंत चांगले भाजत राहणे (मिरची भाजताना सतत हलवत राहणे नाहीतर करपेल )

हे सर्व साहित्य आम्ही गावी मिरची कांडपात नेतो पावडर करायला, मिरची कांडपाची सोय नसेल तर तुम्ही घरी मिकसर मध्ये करू शकता फक्त प्रमाण कमी हवे

एक एक करून सर्व साहित्य बारीक करून घ्यावे आणि चांगले मिसळावे

नंतर हि पावडर बारीक चाळणीतून चाळून घ्यावी आणि शक्यतो आपण लोणची वैगेरे ठेवतो तश्या चीनी मातीच्या बरणीत भरून घट्ट झाकून ठेवावे जेणेकरून मसाल्याचा वास टिकून राहील वर एखदा हिंगाचा खडा ठेवाव

अधिक टिपा: 

टिप - १) भाजलेले खोबरे,कांदा आणि ठेचलेला लसुन हे तिन्ही वेगवेगळया भांड्यात ठेवावे , कांद्याचा कडकपणा टिकून राहायला हवा म्हणजे व्यवस्थीत वाट्ला जातो

२) तळून राहिलेले तेल नंतर आम्ही तिखटाच्या पावडरीत मिसळतो पण जर तिखट खुप दिवस म्हणजे ६ महिने वैगेरे टिकवायचे असेल तर तेल घालू नये, कुबट वास येवू शकतो तेलाचा

ही पाकृ मी दुसर्‍या संस्थाळावर दिली होती तिथून इथे कॉपी करते आहे

प्रादेशिक: 
माहितीचा स्रोत: 
आई

कवठाचे लोणचे

Submitted by सायु on 29 November, 2016 - 07:33
लागणारा वेळ: 
२० मिनिटे
लागणारे जिन्नस: 

एका कच्या कवठाच्या फोडी (साधारण दीड ते दोन वाटी होतात)

मला बर्‍या पैकी मोठे कवठ मिळाले होते आणि कच्चे असुन ही त्याच्या कडा गुलाबी होउ लागल्या होत्या.
त्यामुळे लोणचे चवीला खुप छान झाले.

गुळ १ वाटी (आंबट गोड चवीनुसार कमी जास्त करु शकता)
तिखट = २ ते चमचे
चिमुट भर हळद
शोप / सोप = १ चहाचा चमचा
मेथी दाणे = १/२ चहाचा चमचा
जिरे = १ चहाचा चमचा
लवंग - २
मिरे - ६,७
कलमी - १ पेरा एवढा तुकडा
मीठ अंदाजे

क्रमवार पाककृती: 

कवठ फोडुन त्याच्या फोडी करुन घ्या. त्यात मीठ घालुन ५, ६ तास झाकुन ठेवा.
त्यात गुळ आणि तिखट घालुन कालवुन घ्या.(गुळ किसलेला किंवा फोडलेला असावा, लोणचे लगेच मुरते)
जीरे, मेथी दाणा, शोप भाजुन घ्या गॉस बंद करा त्यातच लवंगा मिरे आणि कलमी घाला
मिक्सर मधुन फिरवुन घ्या. ही पावडर / भुकटी लोणच्यात घालुन व्यवस्थीत कालवुन घ्या..
झाले कवठाचे लोणचे तय्यार..

परठे, पुर्‍या, किवा वरण- भात कशा बरोबरही छानच लागते..

अधिक टिपा: 

कवठ कच्चे च हवे, पिकलेले नको.

माहितीचा स्रोत: 
माझी आजी
पाककृती प्रकार: 
प्रादेशिक: 

पालेभाजीच्या देठाचे भरीत

Submitted by दिनेश. on 28 November, 2016 - 07:42
लागणारा वेळ: 
३० मिनिटे
लागणारे जिन्नस: 

गोव्यात अळूच्या देठाचा वेठी नावाचा प्रकार करतात. त्याची आठवण इथेच मायबोलीवर मी काढली होती. त्यापेक्षा हा बराच सोपा प्रकार.

dethache bharit dish

१) पालेभाजीच्या देठ ( आपल्याकडे राजगिरा, करडई या भाज्या देठासकट मिळतात. ऋषीपंचमीच्या दिवसात डांब मिळतात. पालकाच्या जुडीतही देठ असतातच. मी मात्र माठाचे देठ वापरलेत. )

२) मीठ
३) दही किंवा लिंबू
४) फोडणीचे साहित्य ( तेल, हिंग, मोहरी, जिरे )
५) हिरवी मिरची

क्रमवार पाककृती: 

१) पालेभाजीचे फक्त देठ घ्या. त्याचे बोटाच्या आकाराचे तुकडे करा. असे करताना त्याच्या वरचा पापुद्रा वेगळा
होतो, तो काढून टाका.

dethache bharit deth

२) त्याचे बारीक तुकडे करून कूकरमधे ५ मिनिटे वाफवा.
३) शिजल्यावर जास्त पाणी असेल तर ते वेगळे करा ( हे पाणी इतर भाज्यात वापरा.)
४) मग हे देठ कुस्करुन घ्या.
५) हिरवी मिरची, मिठासोबत चुरडा आणि त्यात मिसळा.
६) वरून दही ( किंवा लिंबूरस ) आणि थंड केलेली फोडणी ओता.

जेवताना सोबत म्हणून घ्या.

वाढणी/प्रमाण: 
चार जणांना पुरेल
अधिक टिपा: 

मी सजावटीसाठी किसलेला लाल भोपळा आणि कोथिंबीर वापरलीय.

dethache bharit close up

असाच प्रकार गवारीच्या शेंगा, डिंगर्‍या, फरसबी, मुळ्याच्या पानांचे देठ वगैरे वापरून करता येतो.

माहितीचा स्रोत: 
पारंपरीक पदार्थ आहे.
पाककृती प्रकार: 
प्रादेशिक: 

चटक -मटक- चटणी- चटक ...... आवळ्याची चटकदार टिकाऊ चटणी

Submitted by दीपा जोशी on 26 November, 2016 - 04:50
लागणारा वेळ: 
३० मिनिटे
लागणारे जिन्नस: 

आवळा, गुळ, मेथी, दालचिनी, मिरे आणि बडीशेप, लाल- मिर्ची पावडर, मीठ

क्रमवार पाककृती: 

चटक -मटक- चटणी- चटक ...... आवळ्याची चटकदार टिकाऊ चटणी

आवळ्याचा हंगाम म्हणजे आत्ता चालू असलेला थंडीचा मौसम! तुळशीच्या लग्नात आवळे पाहिजेच असतात. आवळ्याला ‘धात्री’( म्हणजे- आरोग्याची देवता आणि आईसारखी काळजी घेणारा) असे संबोधले जाते, तसेच आरोग्य- वृद्धी करणारा म्हणून ‘रसायन’ असेही म्हटले जाते.
रोजच खाता येणारा आवळ्याचा एक चवदार टिकाऊ प्रकार म्हणजे हमखास चांगली होणारी आवळा चटणी ! या चटणीचे आणखी एक वैशिष्ठय म्हणजे आयुर्वेदा मध्ये मानल्या गेलेल्या सहा चवीनी ती समृद्ध आहे ( गोड-गूळ , कडू,-मेथी, आंबट-आवळा, तिखट-मिरी पूड आणि मिरचीपूड, तुरट -आवळा, खारट- मीठ )! त्यातल्या मेथी, दालचिनी, मिरे आणि बडीशेप यामुळे चविष्ट तर होतेच त्याशिवाय टिकाऊ आणि अन्न -पचन करण्यास उपयुक्त आणि थंडीसाठी औषधी गुणांची होते.
चला नमनालाच घडाभर तेल ओतून झालं! (पण चटणीत अजिबात तेल नाही हं )

साहित्य - खाली मी घेते ते साहित्य दिले आहे. पण आपल्या चवीनुसार, आवडीनुसार थोडा-फार बदल करू शकता.
आवळे : अर्धा किलो
गुळ : अर्धा ते पाऊण किलो
बडीशेप: दोन टी -स्पून शीग लावून
मिरपूड : -अर्धा टी -स्पून
दालचिनी : छोटे तुकडे दोन टी स्पून
मेथी: एक टी -स्पून
लाल मिरची पूड : एक टी -स्पून
मीठ : चवीप्रमाणे


कृती-

१) आवळे धुऊन, पुसून घ्यावेत. एका स्टीलच्या जाड बुडाच्या पातेल्यात आवळे बुडतील एवढेच पाणी घालून उकडून घ्यावेत. साधारण १५ मिनिटे लागतील. आवळ्याच्या फाका (फोडी ) सुट्या होताना दिसतील.
२) गार झाल्यावर बियांपासून फोडी सुट्या करून घ्याव्यात.
३) आवळे उकडलेले पाणी वापरून स्टीलच्या पातेल्यात/ कढईत गुळ घालून पाक करायला ठेवावा.
४) बडीशेप, मेथी थोडी भाजून घ्यावी
५) मिक्सरच्या छोट्या भांड्यात भाजलेली बडीशोप, मेथी, दालचिनी (न भाजलेली ) यांची पूड करून घ्यावी.

६) आवळ्याच्या फोडी थोड्या गरम असतानाच मिक्सरमध्ये वाटून ‘पल्प’ करून घ्याव्यात. गार झाल्यावर पटकन वाटल्या जात नाहीत.
७) गुळाचा पाक होताना कढईमध्ये बुडबुडे खूप वेगाने येतात. कढई भरून बुडबुडे वर येऊ लागले, की आवळ्याचा वाटलेला गर (पल्प) टाकावा.
८) भाजलेली मेथी, भाजलेली बडीशेप, दालचिनी यांच्या पुडी, मिरी-पूड, तिखट, मीठ घालावे.
९) सतत ढवळत राहावे.
१०) ढवळताना मिश्रणाचे थेंब चट - चट असे कढई बाहेर उडू लागतात. हळू हळू मिश्रण बाहेर उडण्याचे प्रमाण कमी होते.
११) लालसर-सोनेरी रंग आला; आणि जामसारखे घट्ट होत आले, की झाली आपली चटणी.
१२) गार झाल्यावर काचेच्या अथवा चिनी मातीच्या बरणीत भरून ठेवावी.
आंबट-गोड-तिखट- आणि माफक मसाल्यांचा स्वाद असणारी चटक - मटक चटणी तैयार! चांगली खूप दिवस टिकते.
( आमच्याकडे खाऊनच लवकर संपते!)

वाढणी/प्रमाण: 
आवडीप्रमाणे-दहा जणा साठी सुद्धा.....
अधिक टिपा: 

प्रमाण आपल्या आवडीप्रमाणे कमी जास्त झाले तरी चटणी हमखास चांगली होते असा अनुभव आहे! आणि हो....तेल नसल्याने सगळ्यांना चालते.

माहितीचा स्रोत: 
कुठले तरी पाकक्रुतीचे पुस्तक. त्यातल्या साहित्यात थोडे बदल करुन मी नेहमी ही चटणी करते.
पाककृती प्रकार: 
प्रादेशिक: 

कोबीच्या वड्या

Submitted by टण्या on 15 October, 2016 - 15:43
लागणारा वेळ: 
४५ मिनिटे
लागणारे जिन्नस: 

२ १/२ कप बारीक चिरलेला कोबी. मिक्सरमधून काढला तर उत्तम.
१ कप बेसन
४ चमचे तीळ
चवीनुसार मीठ
१ चमचा लाल तिखट किंवा २ बारीक चिरलेल्या मिरच्या
२ चमचे जिरे पूड
२ चमचे धने पूड
२ चमचे गरम मसाला
१/२ कप बारीक चिरलेली कोथिंबीर
३ चमचे तेल. स्ट्राँग फ्लेवरसाठी मोहरीचे तेल वापरावे

क्रमवार पाककृती: 

कोबी, कोथिंबीर, सर्व मसाले, मीठ आणि तेल एका परातीत वा बोलमध्ये एकत्र करावेत.
त्यामध्ये १/२ कप बेसन व थोडे पाणी घालावे. मग लागेल तसे पाणी व बेसन घालून सैलसर गोळा भिजवावा.
हाताला गोळा चिकटत असेल तर थोडे तेल लावावे. मग ३-४ लांबसर (कोथिंबीर वडीला करतो तसे) रोल करावेत.
स्टीमरमध्ये पाणी घालून पाण्याला उकळी आणावी. एका प्लेटला तेल लावून त्यात तयार केलेले रोल्स ठेवावेत व ती प्लेट स्टीमरमध्ये ठेवावी. वरुन तीळ पेरावेत.
१५ मिनिटे हे रोल उकडावेत. गार झाले की फ्रीजमध्ये ठेवावे.

खाण्याच्या आधी वड्या शॅलो फ्राय वा फुल फ्राय कराव्यात. अर्थातच फुल फ्राय केल्या तर अधिक चांगल्या लागतात.

वाढणी/प्रमाण: 
६-७ लोकांसाठी
अधिक टिपा: 

राइस कूकरमध्ये वर स्टीमरची चाळणी घालून पार्चमेंट पेपरवर थोडा ऑइल स्प्रे मारुन वड्यांचे रोल्स उकडायला ठेवू शकता.

माहितीचा स्रोत: 
बायको
पाककृती प्रकार: 
प्रादेशिक: 

श्रीखंड वडी

Submitted by सायु on 27 September, 2016 - 03:45
लागणारा वेळ: 
३० मिनिटे
लागणारे जिन्नस: 

चक्का = १ वाटी (घरी केला असेल तर छानच, नाही तर विकतचा ही चालतो)
साखर = पाउण वाटी
पीठी साखर = १/२ वाटी
जायफळ - विलायची पुड
केशरी रंग - १ छोटा चमचा

क्रमवार पाककृती: 

श्रीखंड वडी नाव जरी उच्चारले की आंबड गोड चव जीभेवर विरघळते...::)
माझ्या माहेरी, गणपतीत आणि नवरात्रात संध्याकाळच्या आरतीला, आई रोज वेगवेगळा प्रसाद करते. त्यात सगळ्यांच्या आवडीची श्रीखंड वडी तर हमखास असतेच. तरी आईचीच एक सोप्पी पाककृती ईथे देते आहे..

सगळ्यात आधी एका कढईत १ वाटी चक्का आणि पाउण वाटी साखर एकत्र करुन मंद आचे वर ढवळत रहा, अगदी थोड्याच वे़ळात पातळसर मिश्रण होईल.. गोळीबंद पाक होईस्तोर शिजवुन घ्या.. एका वाटीत पाणी घेऊन त्यात मिश्रणाची गोळी तयार होते आहे का ते बघा.. आता कढई खाली उतरवुन घ्या त्यात १/२ वाटी पीठी साखर, जायफळ विलायची ची पुड आणि चिमुट भर खाण्याचा केशरी रंग घाला.. सगळे मिश्रण नीट एकजिव करा.
एका ताटाला पालथ्या बाजुनी तुप लावुन हे मिश्रण पसरवा, आणि एक वाटीला पालथ्या बाजुनी तुप लावुन
एकसारखे थापुन घ्या, सुरीने हव्या त्या आकाराच्या वड्या कापुन घ्या..साधारण २० मी. वड्या छान सुटतात.. (हा वेळ पा.कृ मधे धरला नाहीये)

प्रसाद म्हणुन ही वडी खुप छान लागते.

वाढणी/प्रमाण: 
साधारण १२-१३ वड्या होतात, आकारावर अवलंबुन आहे
अधिक टिपा: 

पीठी साखर वरुनच पेरावी, शिजवतांना नको.. त्यामुळे वडी छान खरपुस लागते..

माहितीचा स्रोत: 
आई
पाककृती प्रकार: 
प्रादेशिक: 

Pages

Subscribe to RSS - पारंपारीक मराठी