पारंपारीक मराठी

काकडीचं थालिपीठ

लागणारा वेळ: 
२० मिनिटे
लागणारे जिन्नस: 

२ मोठ्या काकड्या. (पिकल क्यूकंबर्स असतील तर ६ चा एक अख्खा ट्रे)
मीठ
तिखट
हळद
चिमुटभर ओवा
चमचाभर तीळ
धणेपूड
बारीक चिरलेली कोथिंबीर
बारीक चिरलेल्या हिरव्या मिर्च्या
कणीक किंवा मिक्स्ड ग्रेन आटा (प्रमाण कृतीत)
तेल

क्रमवार पाककृती: 

-काकड्यांची सालं सोलून काकड्या (किसणीच्या मोठ्या छिद्रांमधून) किसून घ्यायच्या.
-साधारण ५ मिनिटं मोठ्या गाळणीवर ठेवून पाणी गळू द्यायचं. कीस पिळायचा नाही.
- किसात आता पीठ सोडून, बाकी सगळे घटक घालून, हलक्या हातानं मिसळून घ्यायचे.
- या मिश्रणात, व्यवस्थीत घट्टं गोळा होईल इतपत पीठ घालायचं.
- एकीकडे तवा तापत ठेवायचा.
- २-३ मिनिटांत थालिपिठं लावून, तेल घालून, खरपूस भाजायची.

kaakaDicha-thaalipeeTh-maayboli.jpg

वाढणी/प्रमाण: 
२ माणसांना एकवेळ पोटभर होतात.
अधिक टिपा: 

-मिश्रणात चमचाभर तांदळाचं पीठ घातलं तर थालिपिठं कुरकुरीत होतात.
-फार बियाळ काकड्या नकोत.
-यात पीठ पडणार आहे हे लक्षात घेऊन त्यानुसार बर्‍यापैकी तिखट-मीठ घालायचं.
-थोडं गाजर किसून घातलं तर थालिपीठ देखणं होतं.

माहितीचा स्रोत: 
आई

लाल भोपळ्या च भरीत

लागणारा वेळ: 
२० मिनिटे
लागणारे जिन्नस: 

साहित्य :
१/२ कीलो लाल भोपळा मध्यम चिरून (साल काढून)
१/२ वाटी दाण्याचा कूट
१ हिरवी मिरची
१/२ चमचा साखर
मीठ चवीनुसार
१ वाटी दही
फोडणी साठी :
१ tbsp तेल
१ tbsp जीरे
४-५ कढीपत्त्या ची पाने
१/४ चमचा हिंग
१/४ चमचा हळद

क्रमवार पाककृती: 

कृती :
प्रथम लाल भोपळा चिरून त्याचे मध्यम फोडी करून पाण्यात १५ ते २० मिनिटं शिजवावे. थंड झल्यावर पाणी काढून टाकावे. चमच्याचा साह्याने भोपळ्याचे फोडी हलके मॅश करून घ्यावे. आता त्यात दाण्याचा कूट, हिरवी मिरची, मीठ, साखर आणि फेटलेलं दही घालून मिश्रण एकजीव करावे.
एका लहान कढईत तेल गरम करायला ठेवावे. तेल गरम झाले की त्यात जिरे, कढीपत्ता, हिंग आणि हळदची फोडणी करून ही फोडणी भोपळ्या च्या मिश्रणावर घालावी. मिश्रण नीट एकत्र करून घ्यावे.
लाल भोपळ्या च भरीत तयार.पोळी आणि भाकरी बरोबर हे भरीत उत्तम लागते.
हे भरीत दह्या शिवाय सुधा छान लागत.

वाढणी/प्रमाण: 
४़ जण

जिरवणी

लागणारा वेळ: 
१० मिनिटे
लागणारे जिन्नस: 

आमसुले, चवीनुसार साखर, मीठ, कोथिम्बीर

क्रमवार पाककृती: 

कृती: काहीजण याला सार म्हणून पण ओळखत असतील. कारण प्रत्येकाची करण्याची पद्धत वेगवेगळी.
तर ८ ते १० आमसुले आधी एका पातेल्यात पाणी घालुन दाटसर उकळुन घ्यावीत. गार करायला ठेवावीत. नन्तर दुसर्‍या भान्डयात ती कुस्करुन गाळुन हवे तितके थन्ड पाणी घालुन त्यात चवीनुसार साखर, मीठ घालुन चान्गले ढवळुन घ्यावे. आवडत असल्यास याच गाळलेल्या पाण्यात कोथिम्बीर बारीक चिरुन घालावी. जेवण झाल्यावर किन्वा जेवणाच्या मध्ये प्यायले तरी चालेल, नव्हे पळेल. हे तुम्ही दिवसभरातुन कधीही पिऊ शकता, अगदी रात्रीही आमच्या जेवणात असतेच. उन्हाळ्याचे दोन्ही महिने हे रोज असतेच.

यामुळे आम्लपित्त, उन्हाळ्याने येणारा थकवा हे दोन्ही कमी होते. काहीजण यात जीरे वा जीरेपुड पण घालतात.

वाढणी/प्रमाण: 
८ ते १० आमसुले ४ जणान्च्या जिरवणी साठी पुरतात.
अधिक टिपा: 

आम्ही याला फोडणी देत नाही, आपल्याला आवडल्यास द्यावी. आमसुले चान्गली रसदार घ्यावीत. चिपाडात विशेष रस नसतो.

माहितीचा स्रोत: 
सासुबाई

पालेभाजीतले दिवे

लागणारा वेळ: 
४० मिनिटे
लागणारे जिन्नस: 

पालेभाजीतले दिवे हा आपला एक पारंपरीक मराठी पदार्थ आहे. रुचकर शिवाय करायला सोपा आहे.
शक्यतो मेथीची भाजी वापरतात. पण माठ, राजगिरा वगैरे पालेभाज्या चालू शकतील.

मी माझ्या घरचा सरसोचा पाला वापरलाय.

लागणारे जिन्नस असे.

१) निवडून घेतलेली पालेभाजी. ( आवश्यक असेल तर कापलेली. मेथीची फक्त पानेच खुडून घेतली असतील तर कापायची गरज नाही. )
२) दोन वाट्या कणीक + ज्वारी ( किंवा तांदूळ वा मका ) यांचे पिठ.
३) २ हिरव्या मिरच्या
४) ४/५ लसूण पाकळ्या
५) १ कांदा ( ऐच्छिक )
६) मूठभर मूगडाळ किंवा दाण्याचे कूट ( ऐच्छिक )
७) तेल, तूप, मीठ, हिंग

क्रमवार पाककृती: 

१) पिठात मीठ व थोडे तेल पाणी घालून मऊसर मळून ठेवा.
२) लंगडी पातेल्यासारख्या आकाराच्या पॅनमधे तेलाची हिंग मिरचीची व लसणीची फोडणी करा.
३) वापरत असाल तर त्यात कांदा परता. मुगडाळही परता ( मी दोन्हीही वापरलेले नाही )
४) मग त्यात पालेभाजी टाकून परता. अंदाजाने मीठ घाला व भाजी पसरून घ्या.
५) भिजवलेल्या पिठाचे सुपारी एवढे गोळे करून त्याला अंगठ्याने दाब द्या ( हे दिवे. ) किंवा तसेच गोळे ठेवा.
६) हे गोळे पालेभाजीवर पसरून ठेवा ( एकमेकांवर नाही ) मग त्यात अर्धा कप पाणी घाला व मंद आचेवर झाकण ठेवून गोळे शिजू द्या. ( आधी परतू नका. गोळे चिकटतील )
७) तूमच्या आवडीप्रमाणे थोडा रस ठेवा किंवा पुर्ण परतून भाजी खरपूस करा.
८) वरून तूप घालून खा.

वाढणी/प्रमाण: 
२ जणांना पुरेल.
अधिक टिपा: 

हवे तर वरून ओले खोबरे घ्या.

फोटोतल्यापेक्षा भाजीचे प्रमाण जास्त असावे.

माहितीचा स्रोत: 
पारंपरिक पदार्थ आहे. हल्लीच लोकसत्तामधेही वाचला.

उपवासाची पुरणपोळी

लागणारा वेळ: 
१ तास
लागणारे जिन्नस: 

रुचिरा मधे हा पदार्थ आहे. त्यात मी किरकोळ बदल केले आहेत. राजेळी केळी म्हणजेच प्लांटेन.
पिवळ्या सालीची आणि आकाराने मोठी असतात. साधी केळी आणि राजेळी केळी यात मुख्य फरक म्हणजे, राजेळी केळी पिकलेली असली तरी शिजवूनच खातात. आपल्याकडे गोवा, केरळ भागात याचा जास्त वापर करतात.

आफ्रिकेतही ती फार लोकप्रिय आहेत. शक्यतो निखार्‍यावर भाजून खातात. इथल्या तान्ह्या बाळांचा पहिला घन आहारही हाच असतो. भारतात मिळतात त्यापेक्षा इथली केळी जास्त गोड असतात.

लागणारे जिन्नस असे.

१) २ राजेळी केळी
२) दिड कप राजगिर्‍याचे पिठ
३) पाव कप साबुदाण्याचे पिठ किंवा अरारुट किंवा शिंगाडा पिठ ( हे रुचिरात नाही. नुसत्या राजगिर्‍याच्या पिठाला चिकटपणा कमी असतो म्हणून असे चिकट पिठ घातले तर लाटायला सोपे जाते.)
४) चवीप्रमाणे साखर ( रुचिरात जेवढ्यास तेवढी साखर घ्यायला सांगितली आहे. पण ती खुप जास्त होते. भारतातली केलीही गोड असतातच. त्यामूळे गोडाचे प्रमाण बघून साखर घ्यावी )
५) तेल, तूप, मीठ

क्रमवार पाककृती: 

१) केळी सालासकट उकडून घ्यावीत. सोलून मातक्रोवेव्ह मधे ५ मिनिटे हाय वर आणि मग ३ मिनिटे ग्रील केली तरी चालतील ( मी तसेच केलेय. हाच पर्याय जास्त चांगला आहे. कारण त्यात पाण्याचा अंश कमी राहतो. )

२) केळी गरम असतानाच ( सोललेली नसतील तर सोलून ) कुस्करून घ्यावीत. मग त्यात वापरत असाल तर साखर मिसळावी.

३) उकडलेली केळी असतील तर त्यात पाण्याचा अंश असतो. त्यामूळे मिश्रण मंद आचेवर घट्ट होईतो
आटवून घ्यावे. भाजलेल्या केळ्यात जर साखर घातली, तरी असे आटवून घ्यावे लागेल. भाजलेल्या केळ्यात
साखर मिसळली नाही, तर आटवायची गरज नाही.

४) राजगिर्‍याचे पिठ मैद्याच्या चाळणीने चाळून घ्यावे ( त्यात कधी कधी कच लागते ) मग त्यात दुसरे पिठ मिसळावे. चवीला मीठ व मोहन घालून, आधणाचे पाणी थोडे थोडे घालून मळावे. केळ्याच्या मिश्रणाचा व या भिजवलेल्या पिठाचा मऊपणा सारखाच असावा. या पिठात थोडीशी साखर घातली तर चांगली चव व रंग येतो.

५) मग या पिठाचे उंडे करून त्यात तेवढ्याच आकाराचा सारणाचा गोळा घालून, हळूवार हाताने लाटावी ( फार पातळ लाटू नये. )

६) तव्यावर दोन्ही बाजूने तूप सोडून भाजावी.

( फोटोत सोबत सारीकाच्या पद्धतीचे लिंबाचे लोणचे आहे. )

वाढणी/प्रमाण: 
सहा ते आठ पोळ्या होतील.
अधिक टिपा: 

केनयामधे राजगिरा, शिंगाडा वगैरेची पिठे सहज मिळतात. तिथे मी हिच पिठे वापरत असे. इथे मात्र मैदा घेतलाय ( हा पर्यायही रुचिरातच आहे. अर्थात उपवासाला चालणार नाही. )

माहितीचा स्रोत: 
रुचिरा

जलजीरा

लागणारा वेळ: 
३० मिनिटे
लागणारे जिन्नस: 

- मूठभर कोथिंबीर
- त्याहून थोडा जास्त पुदीना
- शेंदेलोण / काळं मीठ
- आमचूर पावडर १ लहान चमचा / जलजीरा पावडरं चं रेडीमेड पाकीट १ सर्वींगवालं - १
- लिंबू
- थोडं भाजलेलं जिरं / जीरा पावडर (पण ही जीरे भाजून केलेली असेल तर जास्त चांगलं)

Jaljira 1.jpg

क्रमवार पाककृती: 

- कोथिंबीर, पुदीन्याची पानं स्वच्छ धूवून ओबडधोबड चिरावी
- मिक्सरच्या लहान भांड्यात कोथिंबीर, पुदीना, आमचूर, काळं मीठ, भाजलेलं जीरं घ्यावं. यात अर्धे लिंबू पिळावं.
- गंधासारखं गुळगुळीत वाटावं.
- एका मोठ्या भांड्यात ही चटणी घालावी, वर बेतानी चिल्ड पाणी ओतावं. चव पहावी अन काही हवं असेल तर अजून घालावं.
- थंडगार सर्व करावं. स्मित

Jaljira 2.jpg

वाढणी/प्रमाण: 
वरील प्रमाणानुसार साधारण साईजचे ४ ग्लास होतं
अधिक टिपा: 

- उन्हाळ्याकरता मस्त आहे हे. साखर नसल्यानी हवं तेव्हढं घेता येतं. मीठ सुद्धा कमी करता येईल पथ्य असेल तर.
- हवं असेल तर प्लेन सोडाही घालता येईल चिल्ड करून
- मूळ रेसीपी इथे पाहाता येईल

माहितीचा स्रोत: 
संजीव कपूर्स कीचन

रसाच्या पोळ्या

लागणारा वेळ: 
१ तास
लागणारे जिन्नस: 

नाव बुचकळ्यात पाडणारे आहे खरे. पण कोकणात आमच्याकडे हेच नाव आहे ह्या पोळ्यांचे, म्हणून मी ही हेच दिले आहे. वाचा पुढे म्हणजे उलगडा होईल.

जनरली पाडव्याचं पक्वान्न म्हणजे श्रीखंड. पण आमच्या़कडे पाडव्याला आमरस करायची प्रथा आहे. पहिला आमरस पाडव्याला होतो. आंबे घरचे असल्यामुळेच हे शक्य होतं. एखाद वर्षी आंबा मागास असला, म्हणजे पाडव्याला आमरस करण्याएवढे आंबे नसतील, तर मग आम्रखंड करायचं आणि तेवढे ही नसतील आंबे एखाद्या वर्षी तर ह्या रसाच्या पोळ्या करायच्या पाडव्याला. पण आंब्याचचं काहीतरी करायचं पाडव्याला.

हा रस म्हणजे आंब्याचा आटवलेला रस. मे महिन्यात हा रस केला जातो आणि पुढे वर्षभर खाल्ला जातो. बाजारात हल्ली आंब्याचा मावा म्हणून एक प्रकार मिळतो तो हाच असावा असं वाटतं. कारण मी तो अ़जून बघितलेला नाहीये.

आंब्याचा रस काढुन त्यातल्या गुठळ्या मोडून घ्यायच्या आणि एका भल्या मोठ्या परातीत तो चुलीवर ठेऊन आटवायला घ्यायचा. हा मी नेहमी मोठ्या प्रमाणावरच केलेला पाहिला आहे. रस चुलीवर ठेवला आणि उकळायला लागला की तो फार उडतो सगळीकडे आणि त्यात असलेल्या साखरेमुळे हातावर उडला तर चांगलचं भाजतं म्हणुन चुलीपासून लांब उभं रहायचं आणि लांब दांड्याचा कालथा वापरायचा ढवळण्यासाठी. तसेच हा सारखा ढवळत रहावा लागतो नाहीतर खालुन लागतो. भरपूर कष्टचं काम आहे हे पण कामवाल्या बायका असतात हाताशी म्हणूनच जमतं. मोठी परातभर रस आटायला चांगले दोन तीन तास लागतात. रस साधारण आटत आला की त्यात थोडी साखर घालायची प्रिझर्वेटिव म्हणून आणि पुन्हा थोडा आटवायचा. साधारण मऊ गूळाएवढी कंसिस्टंसी असते ह्याची. अगदी गार झाला की मोठया मोठ्या चीनी मातीच्या बरणीत भरायचा. वर परत टिकण्यासाठी म्हणून थोडी पिठीसाखर भुरभुरवायची आणि दादरा बांधुन बरणी ठेऊन द्यायची. ह्याचा रंग फार सुंदर येतो आणि चवीलाही छानच लागतो. असा तयार रस मुलाना खाऊ म्हणून कधीही देता येतो. उपासाच्या दिवशी हा रस खाऊन वर दूध प्यायले तर पोट मस्त भरतं. हा रस आणि भाजलेले शेंगदाणे हा आजच्या काळातही आवडता खाऊ आहे आमच्या घरातल्या लहान मुलांचा. तसचं ह्यापासून आंब्याच्या वड्या आणि आता मी सांगणार आहे त्या पोळ्या सुद्धा छान होतात.

नमनाला चांगलं लिटर भर तेल घालुन झालं आहे आता प्रत्यक्ष कृतीकडे वळू या .

साहित्य:
सारणासाठी
एक वाटी आटवलेला रस
एक वाटी साखर ( मिक्सर मध्ये दळून )
एक चमचा तूप आणि थोडी वेलची पावडर.

कव्हर साठी

दोन वाट्या कणीक
दोन चमचे डाळीचं पीठ ( पोळ्या खुसखुशीत होतात या मूळे)
दोन चमचे गरम तेलाचं मोहन आणि किंचित मीठ.

पोळ्या लाटण्यासाठी तांदळाची पीठी. ( कणीक शक्यतो घेऊ नये. पीठीच घ्यावी. )

क्रमवार पाककृती: 

प्रथम कणकेमधे बेसन, तेल आणि मीठ घालुन आपण नेहमी पोळ्यांना भिजवतो त्या पेक्षा थोडी घट्ट भिजवून मुरण्यासाठी झाकून ठेवावी.

रस किसणीवर किसून घ्यावा आणि पिठीसाखर त्यात मिसळून नीट एकत्र करावे. नंतर हे मिश्रण मिक्सर मधुन फिरवून घ्यावे म्हणजे रस आणि साखर चांगल मिक्स होईल. आता ह्यात एक चमचा साजुक तूप, वेलची पावडर घालावी आणि दुधाचा हात लावून लावून मळून मळून त्याचा गोळा करावा. एकदम दूध घालु नये. साधारण आपण गूळ पोळीचा गूळ करतो तसा रसाचा गोळा तयार करावा.

कणीक आणि रस असे दिसेल

From mayboli

मग कणकेच्या दोन छोट्या लाट्यांमध्ये एक रसाची लाटी ठेऊन कडा बंद कराव्यात आणि आपण गूळाची पोळी लाटतो तशी ही पोळी लाटावी आणि मंद गॅसवर दोन्ही बाजुनी खरपूस भाजावी. ही अगदी ट्म्म फुगते आणि हलकी होते.

ही घ्या तयार पोळी

From mayboli

वाढणी/प्रमाण: 
खाल तसे पण ह्या पुपो प्रमाणे जड होत नाहीत.
अधिक टिपा: 

मंद गॅस वरच भाजावी.
लाटताना रस कडेपर्यंत जाईल हे पहावे.
अगदी हलक्या आणि खुसखुशीत होतात. मुलांना हातात धरून खाता येतात.
खाताना साधारण पातळ केलेले तूप यावर घातले तर ह्यांची चव अजून खुलते.
पाडव्यासाठी म्हणून दारची पांढर्‍या चाफ्याची फुलं आणि कडुनिंबाची पानं यांनी सजावट केली आहे.

माहितीचा स्रोत: 
कोकणातील पारंपारिक

दोडक्याच्या सालींची ओली चटणी

लागणारा वेळ: 
१५ मिनिटे
लागणारे जिन्नस: 

साहित्य : अर्धी वाटी दोडक्यांची सालं, अर्धी वाटी शेंगदाणे,अर्धी वाटी ओल्या नारळाचा खोवलेला चव,अर्धी वाटी कोथिंबीर,५-६ लसणाच्या पाकळ्या,थोडीशी कांदा व लसणाची पात,चवीनुसार ३-४ हिरव्या मिरच्या,मीठ व एक चमचा लिंबाचा रस आणि चवीपुरती साखर

क्रमवार पाककृती: 

कृती : मिक्सरच्या मोठ्या भांड्यात वरील सर्व पदार्थ एकत्र करून थोडेसे पाणी घालून चटणी वाटून घ्या.

वाढणी/प्रमाण: 
५ व्यक्तींसाठी
अधिक टिपा: 

जेवणांत डावीकडे तोंडीलावणे म्हणून चविष्ट

माहितीचा स्रोत: 
माझी आई

विपूतल्या पाककृती ५ : कणकेचा शिरा

लागणारा वेळ: 
४५ मिनिटे
लागणारे जिन्नस: 

_१ वाटी रवाळ कणीक
_लिपिड प्रोफाइल बघून पाव ते अर्धी वाटी साजुक तूप
_१ वाटी फुल फॅट गरम दूध + शिपके मारून शिजवायला लागेल तसं
_वेलदोडा पावडर
_पाव वाटी खडबडीत बदाम पावडर
_अर्धी वाटी किसलेला गूळ

क्रमवार पाककृती: 

- जाड बुडाच्या कढईत कणीक आधी कोरडीच, मंद आचेवर भाजायला घ्यायची.
- टीपाप्यात चार पोस्टी टाकायच्या. सटरफटर बाफं वाचायचे. अधेमधे कणकेला ढवळत रहायचं. चांगली अर्धा तास भाजून झाली की आता थोडं थोडं तूप ओतून भाजायची.
- सगळं तूप ओतून झाल्यावर कणीक कोरडी दिसायला नको. तशी दिसली तर (लि.प्रो. नुसार) चमचाभर तूप घालायचं.
- कढत दूध थोडं थोडं ओतून कणीक फुलवायची. सगळं भस्सकन ओतलं तर एक विचित्र गोळा तयार होईल आणि त्याचा गाभा गुळाचा अनुल्लेख करेल.
- झाकण ठेवून शिजू द्यायची.
- गूळ, वेलदोडा पावडर घालून परतायचं.
- गूळ वितळून लगदा होईल. पण धीर न सोडता लगदा परतायचा, त्यात बदामपूड घालायची.
- लापशीछाप आवडत असेल तर आत्ताच खायला घ्यायचा. नाहीतर थोडा आणखी परतायचा.

photo_0.JPG

वाढणी/प्रमाण: 
इतर मेन्युसोबत गोड पदार्थ म्हणून असेल तर ३-४
अधिक टिपा: 

_सुजाता मल्टिग्रेन कणीक किंवा लाडवांसाठी जरा जाडसर कणीक मिळते ती चालेल.
_अर्धी वाटी गूळ घालून बेताचा गोड शिरा होतो. आणखी कमी गोड हवा असल्यास अर्थातच गुळाचं प्रमाण कमी करावं.
_गुळाऐवजी रॉ ब्राउन शुगर चालेल.
_वेलदोड्याच्या जोडीनं जायफळ किसून घातलं तरी चांगलं लागेल.
_पानात वाढायच्या कमीत कमी तासभर आधी तरी शिरा तयार असावा. मुरला की जास्त छान लागतो. शिर्‍यांच्या अलिखित नियमानुसार दुसर्‍या दिवशी तर फारच छान लागतो.

माहितीचा स्रोत: 
मृण्मयी

कोलंबीचं बरटं

लागणारा वेळ: 
३० मिनिटे
लागणारे जिन्नस: 

वाटीभर स्वच्छ केलेल्या कोलंब्या
७-८ लसूण पाकळ्या. (भदाड्या लसणाच्या २-३)
भरपूर कोथिंबीर आणि झेपेल तितक्या हिरव्या मिर्च्यांचं वाटण- अर्धी वाटी
२ मोठे टोमॅटो (किंवा ३ टेबलस्पून टोमॅटो पेस्ट)
२ मोठे कांदे. (कॉस्टको कांदा -१)
हळद
तिखट
मीठ
पाव वाटी तेल (हिंम्मत असेल तर जास्त)

kolambeecha-barata-maayboli.jpg

क्रमवार पाककृती: 

-कोलंब्यांना हिरवं वाटण, हळद आणि मीठ लावून तासभर मुरत ठेवायचं.
-तेल कडकडीत गरम करून त्यात लसूण ठेचून घालायचा. लाल होऊ द्यायचा.
-यावर बारीक चिरलेला कांदा गळून जाईपर्यंत परतायचा. (गळणारा घटक- कांदा)
-आता बारिक चिरलेले टोमॅटो किंवा टोमॅटो पेस्ट घालून तेल सोडेपर्यंत परतायचं.
-तिखटपूड घालून थोडं परतून घ्यायचं.
-कांदा-टोमॅटो भरपूर शिजून एकजीव झाल्यावर, तिखट घालून परतल्यावर, कोलंबी घालून २-३ मिनिटं परतायचं.
-बरटं तयार आहे.

वाढणी/प्रमाण: 
१ माणूस
अधिक टिपा: 

-बरट्याला कुठलाही मसाला घालायचा नाही.
-आलं घालण्याचा विचारही मनात आणायचा नाही.
-कोलंबीच्या आकारानुसार शिजायला कमी अधीक वेळ लागेल. जास्तं शिजून चिवट व्हायला नको.
-पाणी घालून पातळ रस्सा करायचा नाही. पण अगदीच कोरडं वाटलं तर कोलंब्या परतून झाल्यावर, आच बंद करून, पाव कप कढत पाणी घालून मिसळायचं.

माहितीचा स्रोत: 
..पुन्हा एकदा मोनाडार्लिंग. (बहीण)