मिरच्या स्वच्छ धुवून कोरड्या कराव्यात. या मिरच्यांना उभी चीर द्यावी. एका भांड्यात चीर दिलेल्या मिरच्यांमध्ये हळद, मीठ व बाकी मसाला भरावा /मिक्स करावा. मिरच्या व उरलेला मसाला बरणीत घालून त्यात मिरच्या बुडतिल इतपत ब्लॅक व्हिनेगर घालावे. मिरच्या जसजश्या व्हिनेगरमध्ये बुडतिल तसतश्या चवीला छान लागतात.

किम्ब हे लिंबूवर्गातले मोसंबीच्या आकारातले हिमाचल प्रदेशात आढळणारे फळ आहे. इथे या प्रकारची दोन फळं दिसतात एकाचं नाव किम्ब तर दुसर्‍याला खट्टा/गलगल (म्हणजे बहूदा ईडलिंबू) म्हणतात.

मोसंबीची जशी सालं काढतात, त्याप्रमाणे किम्बची सालं काढायची. नंतर त्याचे मधोमध चिरुन दोन तुकडे करून एका भांड्यात थोडासा रस हाताने पिळून काढायचा. किम्बचे छोटे छोटे तुकडे करायचे.

हे तुकडे करत असतानाच दुसरीकडे मसाला तयार करायचा. मसाल्यासाठी लिहिलेले सर्व जिन्नस (हिरव्या मिरच्या, कोथिंबीर, पुदिना, तीळ, मीठ, जीरे इ) ओबडधोबड वाटून घ्यायचे. खलबत्त्यामध्ये किंवा पाटा वरवंट्यानी वाटले तर जास्त छान चव येते.

हा तयार मसाला

एका भांड्यामध्ये किम्बचे तुकडे, मसाला एकत्र करायचा. त्यात चवीप्रमाणे शक्कर /गुळ घालायचा. गरजेप्रमाणे आंबटपणा वाढवायला आधी काढून ठेवलेला रस घालायचा. किम्ब तय्यार.

१. बोनलेस चिकनचे तुकडे करून घेऊन त्याला आले लसूण पेस्ट, हळद आणि मीठ लावून २४ तास मॅरिनेट करावे.

२. ग्रील १८०° पर्यंत तापवून त्यात चिकन भाजून घ्यावे. वरून तांबूस रंग आला की ऍल्युमिनियम फ़ॉईल ने झाकून आणखी थोडावेळ भाजावे.

३.काजू गरम पाण्यात भिजवून ठेवावेत आणि केशराच्या काड्या गरम दुधात घालून ठेवाव्यात.

४. पातेल्यात तूप गरम करून खसखस, मिरे भाजून घ्यावे व बाजुला काढून ठेवावे. नंतर आले लसूण पेस्ट घालून चिरलेले कांदे घालून परतावे. कांदे तांबूस व्हायला पाहिजेत.

५. हे मिश्रण थंड झाले की त्यात मिरे, खसखस घालून वाटून घ्यावे.

६. पातेल्यात पुन्हा तूप गरम करून वाटलेले मिश्रण, टोमॅटो प्युरी, तिखट, गरम मसाला घालून उकळावे.

७. काजू वाटून त्याची पेस्ट ग्रेव्हीमध्ये घालावी. केशराच्या काड्या थोड्या चुरडून ग्रेव्हीत घालाव्यात.आवश्यकतेनुसार पाणी घालावे.

८. त्यात भाजलेले चिकन घालून आणखी १० मिनीटे उकळावे.

९. चवीनुसार मीठ घालावे. सर्वात शेवटी क्रीम घालावे आणि कसूरी मेथी चुरडून घालावी. (क्रीम घातल्यावर उकळू नये, त्यामुळे त्यातील तुपाचा अंश वेगळा होतो.)

१०. सर्व्ह करताना बारीक चिरलेली कोथिंबीर आणि उभा चिरलेला कांदा घालावा.

काबुली चणे रात्रभर भिजवत ठेवावेत. सकाळी साधारण: १५-२० मिनीट कुकरमध्ये मीठ घालून कमी पाण्यात शिजवून घ्यावेत.

एका भांड्यात बारीक चिरलेला कांदा, टॉमेटो, हिरव्या मिरच्या आणि आलं काढावं. त्यात हे शिजलेले चणे अर्धवट मॅश करून घालावेत. आता बाकीचे सगळे मसाले कपभर पाण्यात मिक्स करून छोल्यांमध्ये घालावे. गरज असेल तर थोडं मीठ घालावं. गॅसवर ठेवून कमी आचेवर १५-२० मिनीट किंवा त्यापेक्षा जास्तही शिजू द्यावे.

मधून अधून हलवत रहावं. पाणी आटल्यास वरून अजून थोडं पाणी घालता येईल. याची कन्सिसटंसी पावभाजीच्या भाजीसारखी असते. जितका जास्तवेळ गॅसवर हे शिजेल तितकी छान चव येते. वरून कोथिंबीर घालायची. हवं असल्यास कच्चा कांदा उभा चिरून वर घालता येईल.

१. गाजराचे व भाज्यांचे लांबट तूकडे करुन घ्या.
२. यापेक्षा जास्त प्रमाणात करायचे असेल, तर सर्व भाज्या अर्धा मिनिट उकळत्या पाण्यातून काढून सुकवून कोरड्या करा. एवढ्याच प्रमाणात करायचे असेल तर याची गरज नाहि.
३. मोहरी किंचीत गरम करुन, लाटण्याने ठेचून घ्या.
४. बडीशेप व कलौंजी वापरत असाल तर तीही गरम करुन जरा ठेचून घ्या.
५. मोहरीचे तेल तापवा.
६. त्यात क्रमाने मेथी, कलौंजी, बडीशेप टाका.
७. मोहरीची पूड टाका.
८. हळद, लाल तिखट टाका, व भाज्या टाका.
९. जरासे परतून सर्व भाज्यांच्या तूकड्यांना तेल लागेल असे पहा.
१०. साखर, मीठ व व्हीनीगर टाका.
११. भराभर परतून सुटलेले पाणी आटवा.
१२. झाकण ठेवू नका, असे केल्याने व्हिनीगरचा वास उडून जाईल.
१३. भाज्या करकरीतच ठेवायच्या आहेत, फार शिजवू नका.
१४. आचेवरुन काढून झाकण न ठेवता २/३ तास तसेच ठेवा.
१५. लगेच वापरता येईल. फ्रिजमधे ठेवा.

तेलावर उभी चिरलेली भोपळी मिरची परतून झाकण घालून शिजवावी. जरा मऊ वाटली की आलं-लसूण पेस्ट आणि बारीक चिरलेला टोमॅटो घालून पुन्हा एक वाफ काढावी. धणे-लाल सुक्या मिरच्या आणि कसूरी मेथी मिक्सरला वाटून पावडर किंवा पाणी घालून पेस्ट करावी. ती ही भाजीत घालावी. सगळ्यात शेवटी पनीरचे तुकडे आणि मीठ घालून शिजवावं. भाजीला खूप रस रहाता कामा नये. वरुन कोथिंबीर घालावी.

सर्वात प्रथम कांदा बारिक चिरून बटरमध्ये परतून घ्यावा.
व नंतर मिक्सर मध्ये वाटून त्याची पेस्ट करावी.
एकीकडे दुसरा कांदा व लाल-हिरव्या सिमला मिरच्या उभट चिरून घ्याव्यात.
पनीर मायक्रोवेव्हमधून थोडे शिजवून घ्यावेत व त्याचे आवडीप्रमाणे तुकडे करावेत. पनीर तळून सुद्धा घालता येतील पण नुसते असेच पांढरेशुभ्र सुद्धा छान दिसतात/लागतात!
खलबत्त्यात लवंग, मिरे, बे लिव्हज, कसुरी मेथी नीट पूड करून घ्यावेत.

बटर तापवून त्यात चिरलेला कांदा, लाल-हिरवी सिमला मिरची परतून-शिजवून घ्यावी.
ठेचलेला लसुण, कांदा व टोमॅटो प्युरी घालून नीट परतून घ्यावे.
पनीरचे तुकडे मिसळावेत.
त्यात लवंग-मिरे-बे लिव्हज-कसुरी मेथी पुड तसेच दालचिनी,वेलदोडा पुड घालावी
तिखट, मीठ व (असल्यास) थोडा तंदुर मसाला घालावा.
थोडसं एकत्र हलवून किती कन्सिस्टन्सी हवी आहे त्याप्रमाणे पाणी घालून शिजवून घ्यावे.

एका डिशमध्ये पनीर जालफ्रेझी व पराठा/फुलका घेऊन आधी त्याचा फोटो काढावा, मग मनसोक्त हादडावे!

राजमा व आख्खे उडीद ३-४ तास भिजत ठेवावेत. नंतर यामध्ये हरबर्‍याची डाळ व मीठ व हिंग घालून साधारण्तः तिपटीपेक्षा थोडं जास्त पाणी घेवून कुकरमध्ये ३-४ शिट्ट्याकाढून शिजवून घ्यावं. जर तिन तासापेक्षा जास्त वेळ डाळ / राजमा भिजला असेल तर ३ शिट्ट्यात शिजतं.
बाजूलाच कढईमध्ये फोडणीसाठी तेल गरम करावे.. त्यात जीरे व मेथ्या घालून फोडणी करावी. यात आधी चिरलेलं आलं, लसूण व मिरची घालावी.१-२ मिनिटं मंद आचेवर परतावे. नंतर त्यात किसलेला कांदा टाकून कांदा गुलाबीसर होईपर्यंत परतावे. हळद घालून घ्यावी. (हळद फोडणीत न टाकता डाळ शिजत असताना कुकरमध्येच टाकली तरी चालेल). कांदा परतल्यावर टॉमेटो घालून परत परतावे. त्यात धण्याची पूड व गरम मसाला घालून परतावे. ५-१० मिनिटं झाकून ठेवावं. यामध्ये आता शिजलेली डाळ घालावी. व एक उकळी येवू द्यावी. नंतर ताजी साय फेटून घालावी. व दाल माखनी मंद आचेवर ठेवावी. मधून अधून हलवत रहावे. किमान १०-१२ मिनिटं तरी नक्कीच उकळू द्यावी. त्यात फेटलेलं सायीचं दही घालून अजून एक उकळी येवू द्यावी.

ब्रेड स्लाईस च्या कडा सुरीने काढुन टाकाव्या,
पनीर चे साधारण दिड ईंच x अर्धा ईंच असे तुकडे करुन घ्यावे,
धुतलेल्या पालकाची पाने, हिरमी मीरची, लसुण मिक्सर मधे बारीक करुन घ्यावे,
त्यात चवी प्रमाणे मीठ आणि अर्धा कप पाणी घालावे,
हिरव्या रंगाच्या या मिश्रणात कडा काढलेल्या स्लाईस एक - एक करुन भिजवाव्या,
हाताने मळुन त्या मिश्रणाचा गोळा तयार करा [साधारण थालपिठाच्या पिठा सारखा गोळा तयार होतो],

छोटा गोळा घेउन तळव्यावर गोल चकती करावी, पुरीच्या आकाराची, त्यावर पनिर चा एक तुकडा ठेउन,
तो तुकडा पुर्ण झाकला जाईल अशाप्रकारे गुंडाळावी.

तापलेल्या तेलात तळावे, सॉस बरोबर खाण्यास द्यावे.

वांग्याचे करंगळीएवढे लांब, उभे काप करुन तेलात तळून घ्यावेत. एकीकडे मसाल्याचे सगळे जिन्नस मिक्सरमध्ये घालून वाटून घ्यावेत. थोडं पाणी घालून पेस्ट केली तरी चालेल.
पातेल्यात तेल गरम करुन मोहरी आणि भरपूर कढीपत्ता घालून फोडणी करावी. त्यावर तळलेली वांगी घालावीत. त्यात आलं-लसूण पेस्ट घालून नीट ढवळून घ्यावं व झाकण घालून एक वाफ काढावी. त्यावर वाटलेला मसाला घालून पुन्हा नीट मिक्स करुन घ्यावं. ह्यात चिंचेचा कोळ /पल्प व गुळ घालावा. वरुन फ्रेश क्रिम व कोथिंबीर घालून पुन्हा झाकण घालून वाफ काढावी व गरम गरम खावं.