व्योमगंगा

बंद झाल्या सर्व वाटा डंख काळाचे विषारी
जिद्द आशा बांध गाठी झेप घे तू घे भरारी

टाक मागे व्यर्थ भीती टाक मागे जीर्ण नाती
वादळा ये म्हण निघालो आज मी काढून छाती
सोस तू आघात सारे ठेव कष्टांची तयारी
जिद्द आशा बांध गाठी झेप घे तू घे भरारी

गाठ तू ध्येयास ऐसे साधका आदर्श व्हावे
व्हायचे ज्याला यशस्वी हेच त्याने आचरावे
हो दिवा अंधार पी तू उजळुदे ही रात्र सारी
जिद्द आशा बांध गाठी झेप घे तू घे भरारी

तुषार जोशी, नागपूर (+९१ ९८२२२ २०३६५)
२० जानेवारी २०१२, ०६:००

भोवताली आज माझ्या दांभिकांचा गाव आहे
कोण नाही चोर? जो तो भासवी "मी साव आहे!"..

देव तो माझाच होता, माणसांची साथ होती
राहिलो ना तोच मी पण सभ्यतेचा आव आहे...

आरशाला सांगतो मी रोज गोष्टी वंचनेच्या
काळजावर आजही माझ्या पुराणा घाव आहे...

जोडली होती न तेव्हाही कधी नाती सुखांशी
आजही "आहे सुखी मी" हाच खोटा भाव आहे...

सोडले आहे कधीचे माणसांना शोधणे मी
ना कुणाची आस आता, ना कशाची हाव आहे!

विशाल...