स्वच्छंदी

खरे बोलता आले नाही...स्वच्छंदी

Submitted by महेश मोरे स्वच्छंदी on 25 April, 2021 - 10:20

खरे बोलता आले नाही
©® - महेश मोरे (स्वच्छंदी), सातारा

नाव तुझे ओठांवर होते तरी सांगता आले नाही
असून इच्छा मला जगाशी खरे बोलता आले नाही

आठवणींतच जेव्हा केव्हा श्वास संपले, मिटले डोळे
उरात उरले शल्य हेच की तुला पाहता आले नाही

प्रेमावरचे धडे घ्यावया लाख पुस्तके वाचत गेलो
नशीब माझे असे कडू की तुला चाळता आले नाही

शब्द दिलेला तुला म्हणूनच जमेल तितकी कोशिश केली
बघता बघता मला विसरलो, तुला विसरता आले नाही

दोघांमध्ये जे होते ते मनात होते मनी राहिले
मला सांगता आले नाही..तुला जाणता आले नाही

शब्दखुणा: 

गझल...चेहऱ्यावर मुखवटे ठेवा

Submitted by महेश मोरे स्वच्छंदी on 23 March, 2021 - 12:05

चेहऱ्यावर मुखवटे ठेवा
©® स्वच्छंदी

शक्य तितके हासरे ठेवा
चेहऱ्यावर मुखवटे ठेवा

फार मित्रांची नको गर्दी
चार ठेवा... चांगले ठेवा

पेटवा आम्हां बिचाऱ्यांची
आपली शाबुत घरे ठेवा

आत काटे राहुद्या बेशक
वर सुगंधी मोगरे ठेवा

गंध नाही ज्यांस जगण्याचा
पुस्तकातच ते धडे ठेवा

प्रेम प्रेमासारखे राहिल
स्वप्न स्वप्नासारखे ठेवा

ही गझल होइल मुकर्रर बस्
दुःख शब्दांच्या पुढे ठेवा

शब्दखुणा: 

हक्क सांगू....

Submitted by महेश मोरे स्वच्छंदी on 28 February, 2021 - 00:31

हक्क सांगू..............

पावसावर हक्क सांगू की ढगावर हक्क सांगू ?
की उन्हाने जाळलेल्या वावरावर हक्क सांगू ?

ती मला बस् दे म्हणाली आणि मी देऊन बसलो
मी कसा आता स्वतःच्या काळजावर हक्क सांगू ?

पाहिजे आहेत तितके मोगरे आहेत भवती
मी कशाला रातराणीच्या फुलावर हक्क सांगू ?

धर्म, जाती, पंथ, भाषा यातल्या मिटवू दऱ्या अन्
शक्य झाले तर नव्याने माणसावर हक्क सांगू

लागली शर्यत कधी तर प्रश्न पडतो एक हा की
कासवावर हक्क सांगू की सशावर हक्क सांगू ?

शब्दखुणा: 

वाचू शकला नाही...........

Submitted by महेश मोरे स्वच्छंदी on 10 January, 2021 - 01:00

वाचू शकला नाही...........

तोच मोडला ऐन क्षणी जो वाकू शकला नाही
वादळामधे माड बिचारा वाचू शकला नाही

पडला, रडला, धडपडला तो धावत गेला पुढती
मायेमध्ये गुरफटला तो चालू शकला नाही

बस पहिल्या ओळीने डोळे इतके ओले झाले
ओळ एकही त्यानंतर तो वाचू शकला नाही

दोष उन्हाला देण्याआधी इतके ध्यानी ठेवा
सावलीत जो जो जगला तो वाढू शकला नाही

पतंगास तो माझ्या आता थिल्लर म्हणतो आहे
जो मांज्याने माझा मांजा कापू शकला नाही

एक भिकारी ऐकत बसला माझी कर्मकहाणी
जे मागाया आला होता...मागू शकला नाही

शब्दखुणा: 

भेट देऊ नको गुलाबाची

Submitted by महेश मोरे स्वच्छंदी on 29 December, 2020 - 03:34

बोचते सल उरास काट्याची
भेट देऊ नको गुलाबाची

आठवण हुंदक्यांसवे येते
खासियत रोजच्या सरावाची

आज गेलो ठरून मी वेडा
आणि चर्चा तुझ्याच नावाची

छिद्र होते जुनेच नावेला
चूक नव्हती तुझ्या किनाऱ्याची

तू हवी तेवढी सुखे घे पण
वेदना आमच्याच वाट्याची

"आतल्यां"च्या जिवावरी जगतो
केवढी ही मिजास देहाची

©® - महेश मोरे (स्वच्छंदी)
9579081342

शब्दखुणा: 

मातीमध्ये हात घालतो त्याला कळते

Submitted by महेश मोरे स्वच्छंदी on 2 November, 2020 - 06:20

मातीमध्ये हात घालतो त्याला कळते

मातीमध्ये हात घालतो त्याला कळते
मातीची सल केवळ शेतकऱ्याला कळते

प्रेमामध्ये पडतो अन् जो जळून जातो
प्रीत खरी त्या वातीच्या धाग्याला कळते

जगणाऱ्याला अशीतशी ती कोठे कळते ?
जगण्याची किंमत तर मरणाऱ्याला कळते

मोठा नाही घाव गड्या बघणारा म्हणतो
किती टोचते हे त्या लढणाऱ्याला कळते

दिशा एकही राहत नाही हातामध्ये
तेव्हा कोठे वादळ नावाड्याला कळते

©®_ महेश मोरे (स्वच्छंदी), सातारा
9579081342

शब्दखुणा: 

धडधड.....

Submitted by महेश मोरे स्वच्छंदी on 26 October, 2020 - 12:07

धडधड....
- महेश मोरे (स्वच्छंदी)

सांगुनी हलकेच काही जायची धडधड
बस् नजर भेटायची अन् व्हायची धडधड

एवढा अभ्यास होता मी तुझा केला
फक्त स्पर्शातूनही समजायची धडधड

जवळ तू असलीस की सगळेच नॉर्मल अन्
दूर तू गेलीस की थांबायची धडधड

जाणुनी जर घ्यायची आई असेलच तर
एकदा केवळ तिची ऐकायची धडधड

ध्यास इतका घेतला होता तिचा मी की
फक्त आठवली तरी वाढायची धडधड

नाव सहजच घ्यायची माझे सखी तिकडे
आणि इकडे नेमकी वाढायची धडधड

थरथर आहे की नाही...

Submitted by महेश मोरे स्वच्छंदी on 28 September, 2020 - 01:18

थरथर आहे की नाही
- महेश मोरे (स्वच्छंदी)

श्वासांमध्ये बघा पुरेशी थरथर आहे की नाही
मरणाऱ्याचा आत्मासुद्धा बेघर आहे की नाही ?

कोठे गेलो कुठून आलो तुलाच कळते पहिल्यांदा
सांग मला मग तुझी नजर माझ्यावर आहे की नाही

तसा इरादा चुंबायाचा कधीच माझा नव्हता पण
फक्त पाहिले ओठांमध्ये साखर आहे की नाही

काहीसुद्धा केले नव्हते ससा तरीही सापडला
बघावयाला आला होता...वाघर आहे की नाही

विकास म्हणजे काय नेमके असेल कळले तर सांगा
मधात घोळवलेले नक्की गाजर आहे की नाही

शब्दखुणा: 

त्या देवाला सवा रुपाया माणुस देतो आहे

Submitted by महेश मोरे स्वच्छंदी on 8 August, 2020 - 12:38

त्या देवाला सवा रुपाया माणुस देतो आहे
©®- महेश मोरे (स्वच्छंदी)

अन्यायाला शासन देतो दु:खितांस जो माया त्या देवाला सवा रुपाया माणुस देतो आहे
जो सूर्याला प्रकाश देतो अन् चंद्राला छाया त्या देवाला सवा रुपाया माणुस देतो आहे

हवेत इथल्या आयुष्याचे श्वास पेरले ज्याने, जो मातीच्या कुशीत स्वप्ने पेरत फुलवत आला
जो मेंदूला ऊर्जा देतो भलेबुरे समजाया त्या देवाला सवा रुपाया माणुस देतो आहे

शब्दखुणा: 

वर सुखाचा चेहरा

Submitted by महेश मोरे स्वच्छंदी on 2 August, 2020 - 22:16

वर सुखाचा चेहरा
- महेश मोरे (स्वच्छंदी)

आत दु:खे वर सुखाचा चेहरा
माय म्हणजे कातळामधला झरा

प्रीत म्हणजे रातराणीची जखम
प्रीत म्हणजे जीवघेणा मोगरा

जन्म झाला शुभ्र चिंधीसारखा
रंग लावा अन् कुणीही वापरा

सावरू मी लागलो आता कुठे
आठवण काढा तिची अन् पोखरा

हे कधी कळलेच नाही ..जिंदगी !
तू खरी की..मी खरा की..तो खरा

शब्दखुणा: 

Pages

Subscribe to RSS - स्वच्छंदी