आम्रसांदणी (अजूनही चुकवून दाखवा!)

Submitted by स्वाती_आंबोळे on 27 April, 2024 - 17:37
आंबा इडली
प्रत्यक्षात लागणारा वेळ: 
२० मिनिटे
लागणारे जिन्नस: 

१ कप* गव्हाचा बारीक^ रवा
१ कप* आंब्याचा रस
अर्धा कप* दही
साखर चवीप्रमाणे
मिठाची चिमूट चवीप्रमाणे आणि ऐच्छिक
दीड टेबलस्पून तूप
थोडंसं दूध

क्रमवार पाककृती: 

तुपावर रवा छान गुलाबी भाजून घ्या.
भाजलेला रवा ताटात पसरून निवू द्या.
तोवर आमरस गाळून त्यात दही रवी किंवा व्हिस्कने एकजीव करून ठेवा.
निवलेला रवा रसात हलक्या हाताने (व्हिस्कने) नीट मिसळून घ्या, त्यात गुठळ्या राहू देऊ नका.
मिश्रणात चवीनुसार साखर आणि आवडत असेल तर किंचित मीठ घाला.
दोनेक तास हे मिश्रण मुरत ठेवा.
दोन तासांनी रवा रसात मस्त फुलून आलेला असेल.
आता वाफवायची तयारी - पाणी उकळायला ठेवा आणि इडलीपात्राच्या वाट्यांना तुपाचा हात लावा.
मिश्रण घट्ट वाटलं (आणि वाटेलच) तर थोडं दूध घालून इडलीच्या पिठासारखं सरसरीत करून घ्या.
डावेने इडलीपात्रात घालून वीस मिनिटं वाफवा.
तुपाशी किंवा नारळाच्या दुधाला लावून छान लागतात.

वाढणी/प्रमाण: 
या प्रमाणात १६ इडल्या होतात.
अधिक टिपा: 

१. *कप म्हणजे मेझरिंग कप

२. ^मी बारीक रवा, लापशी रवा, इडली (तांदुळाचा) रवा असे बदल करून पाहिलेत. गव्हाच्या बारीक रव्याच्याच छान होतात या पद्धतीने.

३. मोसमात ताज्या रसाच्या इडल्या उत्तमच होतील, पण या मी देसाईंच्या कॅन्ड रसात केल्यात आणि सुंदर झाल्यात.
ताजा रस हॅन्ड मिक्सीने घुसळून मग गाळून घ्यावा लागेल.

४. सांदणांच्या पारंपरिक रेसिपीत दही घालत नाहीत, दूधच वापरतात, आणि ती सहसा तांदुळाच्या रव्याची करतात. म्हणून पाककृतीच्या नावात ‘पण’ आहे.

५. कृती फार म्हणजे फारच सोपी आहे. मी तर म्हणते चुकवून दाखवाच!

माहितीचा स्रोत: 
आई
आहार: 
शाकाहारी
पाककृती प्रकार: 
गोड पदार्थ
प्रादेशिक: 
पारंपारीक मराठी
शब्दखुणा: 
आंबा
इडली
चुकवून दाखवा
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

रेसिपी तंतोतंत फॉलो करून चुकवून दाखवायची होती ना, देवकी? तुम्ही साखरेऐवजी गूळ घालणार, दही वापरणारच नाही, आणि तरी तुम्हाला बक्षीस हवं म्हणता? Proud

आचार्य Lol
सूनबाईंनी म्याजिकने प्लेट अधांतरी तरंगती ठेवली आहे वाटतं. Proud

भरत, बघा - आपल्या वेळी असं नव्हतं की नाही? Proud

Submitted by स्वाती_आंबोळे on 30 April, 2024 - 17:23

आम्रसांदणी >> नाव आवडेश. आता करून बघेन. लगेच नाही, पण काही दिवसांनी. चुकल्यास इथे आनंदाने सांगायला येईन.

Submitted by हरचंद पालव on 30 April, 2024 - 17:29

सूनबाईंनी म्याजिकने प्लेट अधांतरी तरंगती ठेवली आहे वाटतं >> Lol

ज्या सूनबाईंनी साक्षात साबांना कामाला लावून खुर्चीत पाय मोकळे सोडून आमरसावर ताव मारलाय तिला जादू येत असणारच ना ? Wink

आम्रसांदणी नाव आवडले. अपभ्रंश होऊन आम्रसांडणी , अंबरसांडणी असं होत होत वीस पंचवीस वर्षांनी सुटसुटीत नावाने मायबोलीवरच कुणीतरी रेसिपी लिहील.

Submitted by रघू आचार्य on 30 April, 2024 - 21:34

>>> आम्रसांडणी , अंबरसांडणी असं होत होत
कुणी सांगावं, बृहद्कोशाच्या एखाद्या शाखेत ‘अंबारीसांडणी - जमिनीला पाय न टेकवता डायरेक्ट अंबारीत चढणारा सांडणीस्वार’ असा ‘पाठभेद’ सापडायचा. Lol

Submitted by स्वाती_आंबोळे on 30 April, 2024 - 22:09

स्वातीची कृती वापरून सांदण बिघडवण्यात माझा पैला नंबर.
काल संध्याकाळी रवा भिजवून ठेवला, म्हटलं जेवणानंतर करू नी झोपतानाच आठवण आली. मग उचलून फ्रीजमधे टाकलं.सकाळी फ्रीजमधून बाहेर काढून नॉर्मल टेम्पला आणलं. दूध मिसळून कन्सिस्टन्सी सारखी केली व इडली पात्रात वाफवले. दिसायला बरे झाले. पण पहिल्या घासाला नवऱ्याने विचारले की यांत साखर घालत नाहीत का?
मिश्रण भिजवले तेव्हा व्यवस्थित गोड लागत होते. माकाचु? आणि आता या अगोड सांदणाचं काय करू?
IMG_7346.jpeg

Submitted by माझेमन on 1 May, 2024 - 04:37

दिसताहेत मस्त.
गोड दूधात, गोड नारळीदूधात बुडवून त्यातच तुकडे करून खाता येतील का?
ममोंच्या सांदणं धाग्यात कोणीतरी अगोड झाल्या म्हणुन साखरेचा पाक करून वरून घातला असे वाचल्याचे आठवते, ती पोस्ट बघा उपयोगी पडेल का.

Submitted by मा न व on 1 May, 2024 - 04:44

भारी आहे फोटो! Happy
गोडासाठी वर सुचवण्या आल्याच आहेत, कदाचित वरून नुसती पिठीसाखरही पेरता येईल.

Submitted by स्वाती_आंबोळे on 1 May, 2024 - 10:21

माझेमन सेम पिंच.. भारी प्रेझेंटेशन आहे तुमचं!
काल मुहुर्त लावला हे करायला पण माझ्याही आम्रसांदण्या अगोड झाल्या आहेत. तरी मी मिश्रण खाऊन पाहिल्यावर आंबट लागत होते म्हणून बर्‍यापैकी साखर घातली होती. मी आमरसाबरोबर खाल्ल्या Wink
स्वाती आणि मनीमोहोर ताईंना धन्यवाद! रेसिपी हीट्ट आहे.

हा फोटो

IMG_1719.jpg

Submitted by अंजली_१२ on 1 May, 2024 - 10:25

मस्त फोटो, अंजली.
आता दोघींनीही पुढच्या वेळी करताना जास्त साखर घाला. Happy
किंवा अगोड म्हणेल त्याला/तिला नाक मुरडून ‘सांदणं बेताचीच गोड असतात’ / ‘मला अशीच आवडतात’ / ‘तुमच्याकडे इतकं गोडमिट्ट खातात?!’ यापैकी काहीतरी उत्तर फेकून मारा. Proud

Submitted by स्वाती_आंबोळे on 1 May, 2024 - 10:26

मस्त चालल्या आहेत सगळ्या गप्पा , नाव आवडलं, पाळणा आवडला, सगळ्यांचे फोटो पण एक नंबर दिसतायत.

Submitted by मनीमोहोर on 1 May, 2024 - 10:45

स्वाती 2 मम.

एकेक आम्रसांदणी फोटो भारीच.

Submitted by अन्जू on 1 May, 2024 - 18:31

हा प्रकार कधी खाल्ला वा पाहिलेला नाहीय. तांदळाचा करतात हे ऐकलेले पण इथे गव्हाचा रवा वापरायचाय…

मला बिघडवण्याची संधी मिळायला घरात ताजा बनवलेला बारिक रवा, आंबे, साखर, दही सगळे आहे. बघते प्रयत्न करुन.

Submitted by साधना on 1 May, 2024 - 21:36

आम्रसांदणी हे नाव आवडले. आम्रसांदण चालले असते पण णी केल्यावर एकदम राजसी भारदस्तपणा आल्यासारखे वाटले. Happy

Submitted by साधना on 1 May, 2024 - 21:38

आम्रसांदणी नाव आवडले. हा प्रकार पाहिला,खाल्लेला नाही. थोड्या प्रमाणात करून पाहीन. इतकी परफेक्ट रेसिपी आहे त्यामुळे पाककृती बिघडण्याची शक्यता कमी दिसतेय पण फोटो बिघडू शकतो.

Submitted by मंजूताई on 1 May, 2024 - 23:49

Pages