मिलन

आपल्या आयुष्यात कुठला ग्रह कसली संधी अचानक आपल्या समोर आणून ठेवील हे सांगणे एखाद्या पट्टीच्या ज्योतिषाला देखील शक्य नाही. पण काही काही योग असे असतात की आपण कल्पनाही न केलेल्या गोष्टी सहज घडून येतात आणि आपण अवाक होत, स्तब्ध होतो.

भेटली मला ती जेथे वडवानळ उठले होते
माझिया प्रियेने मजला ओठांनी लुटले होते

डोळ्यांची अबोल भाषा श्वासांना कळली नाही
स्पर्शांतिल उष्मा दिसता ते धावत सुटले होते

ठरवले जरीही नव्हते जे झाले नकळत झाले
बाहुपाश गुंफ़त गेले मी डोळे मिटले होते

गंधाळून गेला वारा थरथरली अल्लड गात्रे
निर्बंध मनाचे सारे वादळात तुटले होते

स्वप्नांचा कागद पसरून रंगवले जेव्हा घरटे
कुंचल्यास मम शब्दांच्या का अंकुर फ़ुटले होते

ओढणी तिने सावरली निसटली हातांची बेडी
पण श्वास अधूरे काही अधरी गुरफ़टले होते

-- संतोष वाटपाडे (नाशिक)