मराठी चित्रपट: काही भावलेले, काही न झेपलेले (संवाद/दृश्ये/गाणी इत्यादी)

अवघाचि संसार नाव असेल कदाचित..>>> अवघाची संसारमधे पाच बहिणी असतात. हा वेगळा दिसतोय.

अलका कुबल मॉडर्न ड्रेस मधे आणि डान्स करते.
हे दोन तीव्र सेपरेट धक्के आहेत. भूकंप व आफ्टरशॉक !
एका सिनेमात तिच्या रूपाची इतकी स्तुती केली होती की माझी फारच चिडचिड झाली. आधीच एडजस्ट करताहोत तर ... Don't push my limits !>>>
याच सिनेमात याच गाण्याच्या आधी ते गुंड तिला कॉलेजक्वीन म्हणतात

तिचा सुवासिनीची ही सत्वपरिक्षा अशा भयानक नावाचा चित्रपट आहे त्यात तिचा फोटो तिचे भावी सासरे आपल्या मुलाला दाखवतात आणि त्यांच्या तोंडी 'फोटो बघ मग कळेल तुला काय चीज आहे ती, लाखात मुलगी आहे लाखात!' अशा अर्थाचे संवाद आहेत

मॉडर्न ड्रेस आणि डान्स अलका कुबलना अजिबात जमत नाही तरी त्यांच्या सुरवातीच्या चित्रपटात भारतीय पारंपारिक वेशभूषेत त्या चांगल्या दिसायच्या हेमावैम

अलका कुबलचे माहेरची साडी टाईप चित्रपट मला अजिबात आवडत नाहीत, पण वेडिंगचा शिनेमा नावाच्या अलीकडच्या चित्रपटात त्यांनी नायकाच्या आईचं मस्त केलंय काम. (हा पहिला सुखद धक्का आणि चित्रपट संपताना मुक्ता बर्वेचा बॉयफ्रेंड म्हणून स्वप्नील जोशी न येता श्रेयस तळपदे आला हा दुसरा सुटकेचा निःश्वास )

तो एक हळद रुसली कुंकू हसल असा एक अश्विनी भावे चा कैच्याकै पिक्चर होता त्यात एक झाडू झेलण्याचा शॉट आहे. तो शॉट महान आहे केवळ महान

तो एक हळद रुसली कुंकू हसल असा एक अश्विनी भावे चा कैच्याकै पिक्चर होता >>>
आठवतो तो..खरच भयाण चित्रपट होता. आधी नावही इतकं विचित्र होतं त्या सिनेमाचं. सिनेमा बघितल्यावर नावाचा significance (?) कळला. सतीश पुळेकर आणि विजय कदम होते ना तिच्याबरोबर?

वेडिंग चा सिनेमा पण चांगला होता पिक्चर.
अलका कुबल ची एक मुलाखत काही वर्षांपूर्वी वाचली होती,त्यात ती माहेरची साडी टाईप रोल्स पेक्षा अगदी विरुद्ध डॅशिंग प्रत्यक्षात आहे असं म्हटलं होतं.म्हणजे त्याकाळी एकटी लॉंग ड्राईव्ह, शिव्या घालणे, कार चे व्हील बदलणे इत्यादी.
पण तरीहि पिक्चर मध्ये माहेरची साडी नंतर डोक्यावर इतके आघात झाल्यावर अलका कुबल ना मॉडर्न कपड्यात पाहणे शक्य नाही

तो एक हळद रुसली कुंकू हसल
आम्ही बुक्का बोंबलला असे म्हणायचो !

सतीश पुळेकर आणि विजय कदम होते ना तिच्याबरोबर? >> तोच तो

माहेरची साडी टाईप रोल्स पेक्षा अगदी विरुद्ध डॅशिंग प्रत्यक्षात आहे असं म्हटलं होतं.>> ओह!
हळद रुसली कुंकू हसलं मधे अश्विनी भावे दोन वेळा पदरात काही ना काही झेलते. आधी ओलांडायचं माप (ते बहुतेक मोठी जाऊ लाथाडते) तेही आतल्या धान्यासहित.. आणि दुसऱ्यांदा हा झाडू

अवघाची संसारमधे पाच बहिणी असतात. हा वेगळा दिसतोय>>>

बरोबर, ती कथा वेगळी आहे. रा गो ला जयश्रीशी लग्न करायचे असते पण तिच्या मोठ्या बहिणी उजवल्याशिवाय ते शक्य नसते.

हळदी कुंकू नावाचा अशक्य पीळ चित्रपट थेटरात जाऊन पाहिलेला. रंजना, रवींद्र महाजनी व उषा नाईक पीळ पीळ पिळून काढतात ....

अवघाची संसारमधे पाच बहिणी असतात. हा वेगळा दिसतोय>>>

बरोबर, ती कथा वेगळी आहे. रा गो ला जयश्रीशी लग्न करायचे असते पण तिच्या मोठ्या बहिणी उजवल्याशिवाय ते शक्य नसते.>>>>>

गोविंदा चा एक असाच सिनेमा होता ना जोरू का गुलाम ट्विंकल खन्ना बरोबर

जो का गु , अ सं चा हिंदी रिमेक असे वाचले होते. मला तो राजेश खन्नाचा जो का गु वाटलेला, गोविंदाचाही आलेला हे माहीत नव्हते.

वावे +१ वेडींगचा शिनेमा हा बहुतेक अलका कुबलचा पहिला आणि शेवटचा आवडलेला चित्रपट.
कुणी लोणावळा बायपास पाहिलाय का? कसा आहे?

साधना त्या पिक्चर मधे रमेश देव नाहीये, राजा गोसावी आणि शरद तळवळकर आहे. तो भजी खायचा सीन अजूनही आठवतो. खूप लहानपणी बघितलेला tv वर, कॉमेडी मस्त, त्यावेळी प्रचंड एन्जॉय केलेला.

एक कुठला तरी सिनेमा आहे, ज्यात अलका कुबल गाव की छोरी झाली आहे. एकदा नदीवर/विहिरीवर गेली असताना गुंड मागे लागतात तेव्हा ती हातातल्या पाण्याच्या हंड्याने सगळ्या गुंडांना कुबल कुबल कुबलते असा प्रसंग आहे. तिने एकटीने कुणाच्याही मदतीशिवाय फायटिंग करण्याचा तो एकमेवाद्वितीय सीन असावा. मला वाटतं अजूनही स्त्रीप्रधान चित्रपट सोडले, तर इतर ठिकाणी स्त्रीने एकटीने मारामारी केली तर त्याला सेन्सॉरचं सर्टिफिकेट मिळत नाही. ह्या वरच्या चित्रपटात हिरोस्थानी प्रशांत दामले आहेत. कुणाला आठवला तर नाव सांगा.

तो येडा की खुळा मधला अलका कुबलचा भाउ म्हणजे विलास राज. ९०ज मधे नाटकांत काम करत असे. क्षमा राज आणि विलास राज ही दोन्ही नावे लक्षात आहेत तेव्हाची. बहीण भाऊ की नवरा बायको ते माहीत नाही.

५-१० मिनीटे पाहिला यू ट्यूबवर "दीवाणा" गाण्यासकट. त्याकाळात मराठी चित्रपट गाण्यांत हे "दीवाणा" फार बोकाळले होते.

एक कुठला तरी सिनेमा आहे, ज्यात अलका कुबल गाव की छोरी झाली आहे>>>>>>> चार दिवस सासूचे

तसाच, रेखाचा हिंदी सिनेमा आहे, बिवी हो तो ऐसी. फारुख शेख हिरो आहे. सलमान खान तिचा दीर दाखवलाय. त्याचा पहिलाच चित्रपट.

माऊमैय्या, काय अभ्यास काय अभ्यास!!

अंजू, बरोबर आहे. चित्रपटाचे नाव आठवत नाही.

रागो शत जोडीने बरेच चित्रपट केलेत. काल यु ट्यूबवर 'सुधारलेल्या बायका' बघितला. तीच ती नेहमीची घिसीपीटी कथा. शिकली-सुधारलेली बायको म्हणजे ती महिला मंडळ करणारी, त्यात भाषणे ठोकणारी व घरातले काहीही काम न करता उर्मटपणे सगळ्यांचा अपमान करणारी. {त्या काळी महिला मंडळ म्हणजे (अती शहाण्या) शिक्षित स्त्रियांची काशी होती बहुतेक, म.मं मध्ये जाणारी स्त्री दाखवली की तिचा पुढचा करियर ग्राफ डोळ्यासमोर लगेच यायचा)

चित्रपटात सुदैव इतकेच की 'सुधारलेल्या' मागे 'काही' हे संख्यावाचक विशेषण लावून सगळ्याच सुधारलेल्या बाया अशा नाहीत ही सारवासारव केली गेली. ते असो, चित्रपट खळखळून हसायचे काही क्षण मात्र निश्चित देतो.

मी वर लिहिलेला 'कधी करीशी लग्न माझे' आधी दहा भागांत तरी अर्धा होणार, आता पूर्ण अपलोड केला गेलाय. लग्नासाठी आसुसलेली व मॉडर्न कपड्यात हिंडणारी जयश्री शहाणी होताच अंगभर नऊवारी नेसून, पाहायला आलेल्या मंडळींना वाकून नमस्कार करणारी व त्यांच्यासमोर खुरमांडी घासुन अंगठ्याने जमीन उकरणारी व कित्ती चांगली मुलगी ठरते....

शिकलेल्या मुली अतिशहाण्या होतात व संसार वाऱ्यावर सोडून बाहेर भटकतात हा महत्वाचा संदेश मराठी चित्रपटात वारंवार देऊनही मराठी लोकांनी मुलींना शिकवले याबद्दल त्यांचे आभारच मानायला हवेत.

साधना,
काय अभ्यास काय अभ्यास!!>>>> हरचंद, दोन्ही चित्रपट पाहिलेले टीव्हीवर. त्यामुळे लक्षात होते.

तृप्ती नाडकर नाव आहे चांदणे शिंपीत मधल्या अभिनेत्रि चे कदाचित. पण ती नेपाळी मुव्ही मध्ये काम करते. तिला सर्च केले तर तिचा अणि हिचा चेहरा सारखा च वाटला >> हो तिच ती ...

आणि अजून एक चित्रपट होता त्यात निळू फुले वडील आणि सीमा देव आई असते आणि त्यांना ५ मुली असतात ... हुंडा न देता त्यांना लग्न लावायचे असते मुलींचे ..मग वेगवेगळ्या क्लृप्त्या करून ते लग्न लावतात कि काहीतरी ....' कापा केक कापा केक' असं गाणं आहे त्यात .नाव नाही आठवत

आणि अजून एक चित्रपट होता त्यात निळू फुले वडील आणि सीमा देव आई असते आणि त्यांना ५ मुली असतात ... हुंडा न देता त्यांना लग्न लावायचे असते मुलींचे ..मग वेगवेगळ्या क्लृप्त्या करून ते लग्न लावतात कि काहीतरी ....' कापा केक कापा केक' असं गाणं आहे त्यात .नाव नाही आठवत ------------ पोरींची धमाल बापाची कमाल

त्यात 'येशील येशील, राणी पहाटे पहाटे येशील!' हे गाणे आहे.

शिकलेल्या मुली अतिशहाण्या होतात व संसार वाऱ्यावर सोडून बाहेर भटकतात हा महत्वाचा संदेश मराठी चित्रपटात वारंवार देऊनही मराठी लोकांनी मुलींना शिकवले याबद्दल त्यांचे आभारच मानायला हवेत.>> अगदी, अगदी.

जुने ते सोने हाही चित्रपट असाच. त्याच सीमा एकदम मॉडर्न मुलगी असते तर तिचा प्रियकर रमेश देव एकदम कर्मठ जुनाट घरातला. पण सीमाच्या नादाने तो पार्टी, क्लबमधे जातो. तिच्याबरोबर पळून जाऊन रजिस्टर लग्न करतो. पण लग्नाच्या पहिल्या रात्री ती त्याला क्लबमधे पार्टीला घेऊन जाते आणि तिच्या एका मित्राबरोबर डान्स करायला जाते तेव्हा रमेशला मॉडर्न मुली म्हणजे किती भयानक वाईट असा साक्षात्कार होतो आणि तो तिच्याशी कडाक्याने भांडून तिला सोडून आपल्या घरी येतो आणि आपल्या कर्मठ बापाने पसंत केलेल्या शालीन मुलीशी विवाहास बोहल्यावर उभा राहातो. सीमा तिथे धावत येते आणि त्याचे माझ्याशी लग्न झाले आहे तो कायद्याने दुसरे लग्न करू शकत नाही असा आरडाओरडा करते. पण कोणीही तिच्याकडे लक्ष देत नाही. रमेशही तिला झिडकारुन टाकतो. मग सासरेबुवांच्या पाया पडून ती गयावया करते. ते तिला मॉडर्न कपडे, मॉडर्न चालीरीतीचा त्याग करायला सांगतात. नऊवारी, जुन्या वळणाचे दागिने घालायचे, घराच्या उंबर्‍याबाहेर पडायचे नाही अशा अनेक अटी घालतात आणि त्या मान्य असतील तरच तिचे रमेशबरोबर विधिवत लग्न लावून सून म्हणून स्वीकार करतील असे सांगतात. लगेच सीमाचे परिवर्तन होऊन शेवट गोड होतो (?)

वरील चित्रपटात दुसरी अजब गोष्ट म्हणजे रमेश जिच्याशी लग्नाला उभा राहातो ती सीमाची मैत्रीणच असते. आधी ती सीमाप्रमाणेच मॉड, क्लबमधे जाणारी असते. सीमा ज्या मित्राबरोबर डान्स करायला जाते तो हिचा प्रियकर असतो. पण तिच्या कर्मठ बापाला याचा पत्ता लागून ते आणि तिचा भाऊ तिला चोप देऊन शालीन बनवतात आणि रमेशबरोबर तिचे लग्न जुळवतात तिचा प्रियकर रमेशला धमकावयाला येतो तर रमेशचा बाप त्याला चोप देतो! सीमाने याच्याशी लग्न केले होते हे जाणून ती मैत्रीण सीमाला याची बातमी देते आणि मग सीमा लग्नाच्या ठिकाणी येते. तिथे ती आपल्या मैत्रीणीवर याच्याशी लग्न करायला तू तयार कशी झालीस म्हणून ओरडते तर ती मैत्रीण 'हे काय चाललय ते माझ्या मर्जीने थोडंच चाललंय? मला काय विचारतेस?' असा हतबल जबाब देते

रमेश, सीमा ही नावे बघून अपेक्षेने चित्रपट बघायला घेतला आणि पूर्ण अपेक्षाभंग झाला

शिकलेल्या मुलींची ऍलर्जी....

अश्विनी भावेचा शाब्बास सुनबाई पण ह्याच थिमवर आहे. जीन्स व शर्ट घातलेली मुलगी बदचलन पण तीच मुलगी नऊवारीच्या वेष्टनातून आली की एकदम खानदानी होते.

वर्हाडी आणि वाजंत्री ह्या चित्रपटाबद्दल खूप वाचलंय... बहुतेक गदिमांची भूमिका हे आकर्षण असावे. थोडासा पाहिला पण इंदुमती पैगणकरला पडद्यावर पाहणे पीळ आहे. इतकी प्रचंड कृत्रिम बाई... पुढे गदिमा व राजा परांजपे जुगलबंदी आहे असे ऐकिवात आहे पण मी तिथवर पोचले नाहीये अजून

फार पुर्वी "कुलस्वामिनी अंबाबाई" म्हणून एक चित्रपट पहाण्याच्या योग आला होता. माझ्या आईला आशा काळे फार आवडायची म्हणून तिच्यासाठी हा चित्रपट बघावा लागला. तसेही माझी आमच्या कोल्हापुरच्या अंबाबाईवर श्रद्द्धा आहे त्यामुळे तो चित्रपट पहायचा होताच. त्यामुळे कोल्हापुरातच हा चित्रपट थेटरात पाहिला.

पण चित्रपट मात्र भयंकर होता. आशा काळे नेहमी प्रमाणे अतिसोशिक दाखवली आहे. चित्रपटात जो येतो तो हिचा छळ करतो. हिच्या डोळ्यात सदैव पाणी. त्यामुळे थेटरमध्ये आलेल्या सर्व बायका रडत होत्या. हिला छळायला म्हणून हिचा नवरा कुलदिप पवार, सासू ललिता पवार आणि हिची नणंद रंजना अशी मंडळी घरात.. असले तीन जण घरी असतील तर प्रत्यक्ष देवीने ही त्या घरात जायला नकार दिला असता. पण ही पडली आशा काळे. त्यामुळे व्यवस्थित सर्वांकडून छळून घेते. थेटरातल्या बायका ललिता पवारला असल्या शिव्या देत होत्या की ती जर आली असती तर मार खाऊनच गेली असती. आशा काळे मात्र सर्वांचे निगूतीने करत असते. त्यातच हिच्या नवर्‍याला (म्हणजे कुलदिप पवारला) काहीतरी होऊन तो लुळा होतो. त्यामुळे तो अजून हिला छळतो आणि ही मात्र त्याला काहीही करून बरे करायचेच निश्चय करते. शेवटी आई अंबाबाईच्या क्रुपेने सगळे व्यवस्थित होऊन दुष्ट मंडळी सुधारतात असे दाखवले आहे.

पण छळायला रंजना?
ती अश्या स्किलसेट मध्ये नसायची ना कधी?

माझ्या आईला सुद्धा आशा काळे खूप आवडते. त्यामुळे तिचे एकूणएक सिनेमे पहिले आहेत आईबरोबर.

खूप रडकी बाई आहे ती आणि अलका कुबल

जावयाची जात ...पद्मा चव्हाण आणि कुलदीप पवार..असाच एक चित्रपट... शिकलेली मुलगी,पुण्याची मग सर्व पुरुष जात कशी वाईट... लग्न न करण्याचा निश्चय.. गावाकडच्या हीरो सोबत लग्न होत..आणि कस हिच हृदय परिवर्तन होत.. काही गोष्टी चांगल्या आहेत..जस गावाकडची सासू समजून घेते सुनेला..तिला वेळ देते