कडधान्याच्या गोळ्यांची आमटी

Submitted by आरती on 5 November, 2011 - 20:11
प्रत्यक्षात लागणारा वेळ: 
३० मिनिटे
लागणारे जिन्नस: 

गोळे:
१ वाटी भिजवलेली कडधान्ये, [याचे बाजारात पाकीट मिळते, नाहीच मिळाले तर आपल्या आवडीप्रमाणे सम प्रमाणात एकत्र करून भिजवावी]
१/२ वाटी तांदळाचे पीठ,
२ चमचे तेल,
१/२ इंच आले,
१ हिरवी मिरची,
चवीप्रमाणे मीठ.

आमटी:
३ मोठ्या पाकळ्या लसूण,
४ चमचे दाण्याचा कुट [जाडसर असावा],
१/२ वाटी चिरलेली कोथिंबीर,
१ चमचा लाल तिखट,
१ चमचा गोडा मसाला,
१/२ चमचा साखर,
२ पाने कडीपत्ता,
३-४ वाट्या पाणी,
फोडणीसाठी तेल, मोहरी, हळद, हिंग,
चवीप्रमाणे मीठ.

क्रमवार पाककृती: 

आमटी:
कढईत तेल घेऊन फोडणी करावी. अगदी पातळ चकत्या करून लसूण मंद आचेवर चांगला लाल होऊ द्यावा. आता फोडणीत कडीपत्ता,हळद,हिंग,लाल तिखट, गोडा मसाला घालावा. थोडेसे डावाने हलवून घ्यावे, म्हणजे तिखटा-मसाल्याचा 'रॉ' वास निघून जातो. ३-४ वाट्या पाणी घालावे. साखर,कोथिंबीर, दाण्याचा कुट घालावा. आमटीला मंद आचेवर उकळू द्यावे, गोळे करायला घ्यावे.
A1.jpg

गोळे:
४ ते ५ तसा भिजवलेली कडधान्ये, मिरच्या, मीठ, आल्याचा तुकडा बारीक वाटून घ्यावे. वाटताना वरून पाणी घालू नये. एका भांड्यात वाटलेले मिश्रण, २ चमचे तेल आणि त्यात मावेल इतके तांदळाचे पीठ असे सगळे एकत्र करावे. साधारण थालापिठाच्या पीठ सारखा गोळा तयार होतो. याचे छोटे-छोटे गोल-गोल गोळे करून आमटीत सोडावे.
A2.jpg

वाढणी/प्रमाण: 
२ जणांसाठी
अधिक टिपा: 

हे गोळे वाफेवर शिजून आपोआप आमटीत तरंगू लागतात. सगळे गोळे वर येईपर्यंत डावाने हलवू नये. एखादा गोळा फुटून आमटी घट्ट झालीच तर शेवटी वरून थोडे गरम पाणी घालावे.
गोळ्यांची गर्दी झाल्यास, वर आलेले गोळे हलकेच डावाने डिशमध्ये काढून घ्यावे आणि जेवणाच्यावेळी परत आमटीत मिक्स करावे. असे केल्याने खालच्या गोळ्यांना डोके वर काढणे सोप्पे जाते.
बेताचेच तिखट असेल तर पोळीबरोबर न खाता, नुसते खायला पण छान लागते. नुसते खाणार असाल तर, उकळलेल्या आमटीत थोडी काकडी किसून घातल्याने अजून खमंग लागते.

माहितीचा स्रोत: 
माझे प्रयोग
पाककृती प्रकार: 
प्रादेशिक: 
Group content visibility: 
Public - accessible to all site users

मस्त प्रकार आहे. डाएटकरता चांगला लागेल बहुतेक.

आडो, मूग, मटकी, तूर, चवळी, हिरवे ओले हरभरे/चणे, ब्राऊन हरभरे वगैरे..

हेल्दी, टेस्टी प्रकार दिसतोय. करून बघेन.
आमच्याकडे गोळ्यांची आमटी करतात. पण त्यात कडधान्ये नसतात. फक्त वाटलेली डाळ असते. ही कल्पना छान आहे.

चाळणीवर वाफवुन नंतर रश्शात सोडले तर ? >> चालेल की, थोडे काम वाढेल इतकेच. Happy

धन्यवाद मी म्हणायचे की अजुन कोणी म्हणणार आहे .... Wink

हे आवडलं, मी ते मिक्स कडधान्याची आमटी कायम करते. ही गोळे करायची आयडिया मस्त आहे. Happy

कडधान्याचे गोळे मस्त प्रकार वाटतोय. वाफवून घेतले तर आयत्यावेळी घातले तरी चालेल असं वाटतंय. बरं, दाण्याचे कूटवाली आमटी सोडून आणखी कोणत्या आमटी/ग्रेव्ही प्रकारात वापरता येतील का ते?

अ.कु., कुठल्यही कोफ्ताकरी किंवा अंडाकरीच्या ग्रेव्ही मधे चांगले लागेल. गोळ्यांना स्वत:ची फारकाही चव नसल्यामुळे. वाटलेल्या मसल्यांचा कंटाळा आला की आशी साधी Happy

मस्त आमटी Happy करून बघायला आवडेल नक्की. आणि आमटीत काकडी किसून घालण्याची आयड्या एकदम भारी आहे. ती आयड्या तर लग्गेच अंमलात आणणार.

मस्त आहे रेसिपी.. Happy
आमच्या कडे पण गोळ्याची आमटी करतात. हरभरा डाळीच्या पिठात कांदा घालुन, तिखट मीठ घालुन त्याचे
गोळे करुन आमटीत घालतात. ती पण छान लागते. चवीला आंबट-गोड असते चिंच-गुळामुळे.

आरती, मस्त पाककृती. करून बघेन.

घरी इतरांसाठी खिम्याच्या गोळ्यांचा पुलावा झाला की व्हेजिटेरियन मंडळींसाठी असे गोळे घातलेला भात असायचा. तासभर भिजवून निथळलेले तांदूळ, तुपात परतून, तुझ्या कृतीत दिलेल्या रश्श्यात फुलवले तर असा गोळ्यांचा पुलाव करता येईल असं वाटतंय.

Pages