मीन्वा यांचे रंगीबेरंगी पान

आज पुन्हा उघडीप आहे.. थोडी थोडी
उन्हाचीही तिरीप आहे.. थोडी थोडी
पुन्हा मळभ येण्याआधी
झुळूक दूर जाण्याआधी
चल, जमवून घेऊ मैफल .. थोडी थोडी

(सहज सुचलेल्या चार ओळी..)

मी विणलेल्या नात्यांची वीण,
उसवत जाताना..
उसवत जातं.., माझ्या आतही काही..
तुटलेले काही धागे.. आणि जीर्ण काही..
भकासपणे त्यांच्याकडे पाहताना,
मी म्हणाले "आता थांबवायलाच हवंय वीणकाम,
आणि नको आटापिटा, ठीगळ लावण्याचाही.."

मायबोलीवर मी यायला कारणीभूत झाला तो विभाग म्हणजे 'गुलमोहर' आणि त्यातही खरं म्हणजे 'कविता'. सहज गुगलवर शोधता शोधता मायबोलीचं कवितांचं पान सापडलं आणि तिथे येता येता मग हळू हळू सर्वत्र संचार सुरु झाला.

आज रंगीबेरंगीत एक तरी पान लिहावं, असा विचारच करत होते. शाळेत असताना नवी कोरी वही मिळाली की पहिल्या पानाचं कोण अप्रूप वाटायचं!