कदाचित : शब्दखूण

कदाचित

Submitted by pkarandikar50 on 26 February, 2016 - 07:13

कदाचित

लक्षांत नसेल आलं तुझ्या कदाचित,

मी माळलेला जाईचा गजरा
घेऊन गेलास तू, 'त्या' दिवशीचा,
करंडक म्हणून, पण त्याला
रातराणीचा गंध येत होता.

लक्षांत नसेल आलं तुझ्या कदाचित,

डोंगरमाथ्यावर चिंब गवतांतून
अनवाणी पायांनी आपण भटकलो,
तळव्यांवर रेंगाळलेल्या हिरवाईला
गुलाबी छटेचं अस्फुट अस्तर होतं.

लक्षांत नसेल आलं तुझ्या कदाचित,

निरोप अखेरचा घेऊन तडक निघालास,
वळणावर थबकून थोडं,मागे पाहिलंस,
कोपर्‍यावरच्या स्थितप्रज्ञ अमलतासाचं
एक फूल हताश, हलकेच गळलं होतं.

बापू

विषय:

शब्दखुणा:

Submitted by आनंदयात्री on 1 April, 2013 - 05:57

मनी तिच्याही भाव कदाचित
तिला पाहिजे नाव कदाचित

ती दिसली, पण दुखले नाही
भरून आला घाव कदाचित!

चाल नेमकी अचूक झाली
हरेन आता डाव कदाचित

मिळाले तरी टिकले नाही
अखेर नडली हाव कदाचित

इथेच उरली आहे माती
इथेच होते गाव कदाचित

नचिकेत जोशी
(ब्लॉगवर पूर्वप्रकाशित - http://anandyatra.blogspot.in/2013/03/blog-post_26.html)

विषय:

शब्दखुणा:

Submitted by मिलन टोपकर on 13 September, 2011 - 07:12

निखळुन गेले ह्या जन्माचे दुवे .... कदाचित..!
जुळेल पुढल्या जन्मी माझे, तुझे .... कदाचित..!

जाण्याचे हे तुझे बहाणे खरे, परंतू
उंबरठ्यावर अडेल पाऊल तुझे .... कदाचित..!

तडफडतो पण प्राण न जातो, ते गेल्यावर
धारदारही नसतिल त्यांचे सुरे .... कदाचित..!

पापणीस बघ येतो माझ्या गंध सुखाचा
येणे झाले स्वप्नामध्ये तुझे .... कदाचित..!

प्राणांचेही मोल तयांना कमीच वाटे
खरेच असतील गंभीर माझे गुन्हे .... कदाचित..!

जन्मभरी मी मुकाट काटे झेलत गेलो
उधळतील ते, मी गेल्यावर, फुले ....कदाचित..!

गुलमोहर:

शब्दखुणा:

शेअर करा