श्रीराम

असे आगळा राम आदर्शमूर्ती

जना दावूनी श्रेष्ठ कर्तव्यपूर्ती
वरी भाविका देतसे दिव्य भक्ती
अशा राघवासी स्मरावे भजावे
किती रामदासे जना बोधवावे

असे आगळा राम आदर्शमूर्ती
तया टाळूनी वाउगेची पूजीती
भ्रमा वाढवोनी रती आत्मघाती
अभक्ते स्वये देशही नासविती

बहु भक्त झाले इथे राघवाचे
पुढे गोडवे दिव्य ते सद्गुणाचे
तया पाहता कीव ये दुर्जनाचे
रवी तेज ते येई का काजव्याचे

जना उद्धराया स्वये राम येई
तया सांडूनी नष्ट ते दुष्ट ध्यायी
भ्रमाने भ्रमाते जगी वाढवीती
जनासी तरी व्यर्थचि घोळविती

बळे आगळा राम हा श्रेष्ठ स्वामी

प्रभू लाभला रामराया सुनीळू
दीनाकारणे पातला तो कृपाळू
सदा भक्तकाजी उभा पाठिराखा
तया वंदिता चित्त चैतन्य देखा

उभी जानकी वामबाजूस नित्य
पुढे वंदितो मारुती भक्त मुख्य
सदा सज्जनालागि कोदंडपाणी
असा सावळा राम लावण्यखाणी

जरी अंबरी मेघ हे श्यामवर्णी
मनी लोचनी सावळा चापपाणी
असा स्वामीश्री सर्वसंपन्न गुणे
तया आठवाने समाधान बाणे

पती जानकीचा प्रभू मारुतीचा
असे स्वामि हा भक्त बिभिषणाचा
कधी भिल्लीणीकारणे सेवि बोरे
ऋषी आश्रमी राक्षसा ताडि घोरे