भुभु आणि माऊ बाळांच्या गंमती जमती २

ओडिन ला कधी भेटलो तर "काय लेका ओड्या, वळखल नाय का? " असा विचारावं इतका ओळखीचा वाटतोय.>>>

एलॉन कसला राजेशाही पोझमध्ये बसलाय, देखणा एकदम

लाना चा फोटो पण भारी, एकदम क्लासिक

कोकोनटचे पहिल्या फोटोतले एक्सप्रेशन कहर आहेत....अगदी तंतरलले समर्पक वर्णन

ओड्या आणि रिओची चांगली गट्टी जमलीय, एखादे दिवशी नाही आला तर ओडीनबुवांचा मूड जातो. मग पळत नाही खेळत नाही. काठी टाकली तर एकदाच आणून देतो.
एक दिवशी तर आम्ही चक्क तिथेच बसून राहीलो अर्धा तास वाट बघत आणि नाही येत म्हणल्यावर घरी आलो....

पण रिओ बाळ महाव्रात्य आहे. त्याच्या बाबाची प्रचंड कसरत होते त्याला सांभाळताना. एक तर वावरा आहे, अजिबात ऐकत नाही, आणि कचरा, दगड, काठी काय वाट्टेल ते खातो. त्याच्या बाबाला म्हणलं की त्याला कॅल्शियम व्हिटॅमिन वाढवा, फरक पडेल
एकदा तर कचऱ्यातून मेलेला साप घेऊन आला. आमच्या दोघांचे धाबे दणाणले. त्याच्याकडून काढून घ्यायला नो नो करत पळालो तर त्याने धूम ठोकली. मोठ्या प्रयत्नानी त्याला पकडून साप टाकायला लावला. फटके पण खाल्ले त्यासाठी तरी ऐकत नाही.

आता तर ओड्याने त्याला झाडांची पाने खायला शिकवलं आहे. मी मागे पण इथ लिहीलं होतं एक स्पेसिफिक झाड आहे त्याच्या पानांचा तोबरा भरायला ओड्याला आवडतं आणि आम्ही जातो तिथे अशी भरपूर रोपटी आहेत. ती शोधून शोधून खातो. कालच त्यांचे एका झाडापाशी उभे राहून बरेच गहन डिस्कशन पण झाले त्यावर. ओड्या चरता चरता त्याला सांगत होता, पळून दमलो ना ही पाने खायची, एनर्जी मिळते आणि बाबा जास्त ओरडत नाही. कुठं कचरा वैगेरे खातो, हे खाऊन बघ. मग रिओनेही दादा म्हणतोच आहे तर ऐकावं म्हणून दोन चार पाने चघळली.

ओड्याला म्हणलं नाही त्या सवयी लावू नको त्याला

नाही, अगदी ताजा नव्हता
तिकडे कचरा पण जाळतात, त्यातच अर्धवट जळलेला हा साप होता
त्याला तेव्हापासून आम्ही जास्त मोकळा सोडतच नाही

कारण त्याला माहितीय की काही खायला घेतलं की हे दोघेही ओरडतात, म्हणून तो गुपचूप उचलतो आणि धूम ठोकतो

त्याचा बाबा म्हणतोय त्याला आता ते मझल च आणून लावतो
एक महिनाभर लावलं तर खायची सवय सुटेल

काहीतरी केलं पाहिजे मात्र, असाच तो खात राहील तर खात्रीने आजारी पडेल

इतकं गोंडस आहे ते बाळ, पण जाम उपद्व्याप करत

ओड्याला कॅनाल ला पोहायला नेतो तेव्हा त्याला बघायला बरेचदा लोकं जमतात
काही जण कौतुक करतात
पण परवा एक काका इतके इमोशनल झाले
ओड्या बाटली घेऊन येतो तेव्हा दमलेला असतो, कारण कॅनाल ला पाण्याचा फोर्स बराच असतो
थोडा वेळ दम खातो आणि परत उडी मारायला सज्ज
तर हे काका वरून बघत होते आमचा खेळ
थोड्या वेळाने त्यांना अगदीच राहवेना म्हणे अहो बास करा

मला कळेना यांना काय झालं, मी प्रश्नार्थक चेहऱ्याने बघितलं तर म्हणे अहो तो किती दमलाय, त्याला विश्रांती द्या
म्हणलं नई दमत तो, तास तासभर पोहतो

तरी त्याना काही पटेना, इतके कळकळून सांगायला लागले म्हणे इतका छान कुत्रा आहे तुमचा, नका त्याला असा त्रास देऊ, तुम्ही बाटली टाकली की तो आणणार च, दमला तरी

म्हणलं असं नाही हो, तो खरोखरच दमला की ढिम्म हलत नाही जागचा

तरी ऐकेनात, ते स्वतःच इतके अस्वस्थ झालेले
बरं काळजीपोटी सांगत होते त्यामुळे मला काही म्हणताही येईना

म्हणे त्याला घरी घेऊन जा, खायला द्या आणि झोपू द्या, उद्या परत आणा वाटल्यास पण एकाच वेळी जास्त दमवू नका

बापरे, इतका आग्रह म्हणल्यावर शेवटी मीच माघार घेतली म्हणलं ओड्या बास आजचं स्विमिंग

पण तो ढेकळ्या काय ऐकतोय, तो इतक्या लगेच पाण्यातून बाहेरच येईना, वर बाटली टाक लवकर म्हणून भुंकयला लागला

मी मधल्या मध्ये इतका कात्रीत सापडलो, त्यांना म्हणलं हे लास्ट मग आम्ही जातो घरी
आणि मग खरोखरच त्यांनतर त्याला काढला बाहेर आणि घरी घेऊन आलो

टिप्स अशा काही नाहीत
मुळातच लॅब हे जन्मजात स्वीमर असतात, त्यांना फक्त सुरुवातीला पाण्याची भीती घालवायला लागते, एकदा ते झालं की मग ते ऐकत नाही
आधी मी त्याला अंजरून गोंजारून उतरवला पण तिथेच डुंबत राहायचा, म्हणून मग मित्राचा डोगो अर्जेंटिनो होता त्याच्या साखळीला याला बांधला, तो याला सोबत घेऊन गेला कॅनालच्या मधोमध
आपण बुडत नाही म्हणल्यावर त्याचा कॉन्फिडन्स वाढला
आणि लहानपणापासून कॅनाल मध्ये उतरवल्याने तो आता अगदी प्रो झालाय
कितीही लांब बाटली टाका, कितीही पाण्याला फोर्स असू दे, तो बरोबर तिरका तिरका पोहत जातो

पण आमच्या एलोन ला वाळवणे म्हणजे फार मोठे काम आहे . >>>> ते आमच्याकडे पण, एक तर पोहून आला की तो फुल चार्ज झालेला असतो, इतकी मस्ती करतो की विचारू नका
त्याचा एक टर्किश टॉवेल आहे तो घेऊन त्याला पळापळ करायची असते आणि त्याला पकडून पुसून घेताना माझी अक्षरशः दमछाक होते
टॉवेल दोन्ही बाजूनी चिंब होईपर्यंत त्याला पुसतो आणि मग बायकोचा हेअर ड्रायर आहे त्याने सुकवतो
तेही करताना इतकं अंगात आलेलं असतं त्याच्या की माझं पार घामटं निघतं
आणि हे सगळं एक तासभर पोहून आल्यावर
मी म्हणतो अरे तुला दमवायला म्हणून नेतो रे, अजून चार्ज व्हायला नाही

ओडिन डायरी चेच काढायचा आहे डोक्यात
पण कसं आणि काय करावं हे लक्षात येत नाहीये

https://youtu.be/TMjIf1aon58

हा त्याचा तिसऱ्या वाढदिवसाच्या निमित्ताने केलेला व्हिडिओ
यात आहेत पुढे स्विमिंग च्या क्लिप्स

आशूचॅम्प विपु नाही बघत का तुम्ही तुमच्या>>>
आता पहिली, केला रिप्लाय
भारी वाटलं तुम्हाला भेटून

मी ओडिनला कॅनाल ला घेऊन जात असताना मोटरसायकल वरून एकजण आले म्हणे तुम्ही आशु ना, म्हणलं हो तुम्ही कसं ओळखलं
म्हणे ओडिन कडे बघून

अश्याने उद्या बाटली घेवुन बसायचे दोघे जण>>>
बाटली दिसली की त्याला कळतं की आज पोहायला जायचं
सध्या तरी इतकंच कळतंय म्हणून बरंय