प्रस्तावना

माझ्या UAE मधल्या १०-१२ वर्षांच्या प्रवासात मी अनेक लोकांना भेटलो आणि त्यांच्याशी अनेक विषयांवर बोललो.काही अनुभव अतिशय वाईट होते , पण 'जे जे उत्तम उदात्त उज्ज्वल ' ते ते घेऊन अनुभवाची शिदोरी अधिकाधिक समृद्ध करणं या एकाच ध्येयाने मी आजवर पुढे जात आलो आहे.

इथेही मला छान छान गोष्टी सांगणारे आजोबा भेटले , वेगवेगळ्या लोककथा रंगवून रंगवून सांगणारे गोष्टीवेल्हाळ भेटले आणि कधी कधी लहान असताना स्वतःच्या आज्जी-आजोबांकडून ऐकलेल्या गोष्टी मला सांगणारे समवयस्क मित्रही भेटले. जगाच्या पाठीवर कुठेही जा , आज्जी-आजोबांकडून ऐकलेल्या गोष्टी आणि स्थानिक लोककथा या दोन गोष्टींचा खजिना सापडतोच सापडतो. अनेक लोकांनी यातल्या लोकप्रिय गोष्टी - उदाहरणार्थ ARABIAN NIGHTS - लहानपणी नक्कीच ऐकल्या किंवा वाचल्या आहेत. इसापनीतीमध्ये सुद्धा अनेक गोष्टी अशा आहेत ज्यांचं अरबस्तानाशी घट्ट नातं आहे. या सगळ्या गोष्टींपलीकडच्या अरबी लोकांमध्ये प्रचलित असलेल्या शेकडों स्थानिक लोककथा आणि गूढकथा यांची ओळख करून द्यायचा हा एक प्रयत्न. या कथा मी ज्या लोकांकडून ऐकल्या त्यांनी मला त्याबद्दल इतकंच सांगितलं की या पुस्तकरूपाने किंवा इतर तत्सम माध्यमातून प्रकाशित झालेल्या नाहीत कारण त्या घरी गप्पांच्या मैफिलीत सांगितल्या गेलेल्या ' गुजगोष्टींसारख्या' आहेत. त्यामुळे या कथांचं मूळ शोधायच्या फंदात ना पडता मी फक्त त्यांचं मराठीत रूपांतरण करण्याचा प्रयत्न केला आहे.

या कथांचा संबंध अरबस्तानाशी असल्यामुळे त्यांचे अनेक स्थानिक तसेच सांस्कृतिक संदर्भ या कथांमध्ये डोकावताना दिसतील. Stanislavskee या प्रख्यात नाट्यगुरुंनी सांगितल्याप्रमाणे ' if I was there ' या पद्धतीला अनुसरून या कथांमध्ये नायक, खलनायक, गूढ शक्ती, स्त्रीपुरुष या सगळ्यांबद्दल लिहिताना स्वतः तिथे आहोत अशी कल्पना करून या कथा भाषांतरित केलेल्या असल्यामुळे त्यात काही प्रमाणात नाट्यमयता आलेली असू शकते. तरीही प्रस्तुत लेखकाचा हा लेखनप्रयास आणि लेखनप्रवास गोड मानून घ्यावा अशी कळकळीची विनंती.