डोसे प्रकार

Submitted by आरती. on 17 April, 2015 - 04:42
masala-dosa
प्रत्यक्षात लागणारा वेळ: 
३० मिनिटे
लागणारे जिन्नस: 

१. पेपर डोसा / साधा डोसा
डोसा राईस / कोणताही जाड तांदूळ - ४ वाटी
उडीद डाळ - १/२ वाटी
पोहे - १/२ वाटी
मेथी दाणे - १ टी स्पून
प्रत्येक डोश्याच्या जिन्नसमध्ये जो तांदूळ दिला आहे तोच वापरून वेगवेगळ्या चवीचे डोसे चाखा. Happy प्रत्येक प्रकारच्या डोश्याची एक वेगळी चव आहे.

मसाला डोसा ची बटाट्याची भाजी

फोडणीत उभा चिरलेला कांदा, राई, चणाडाळ, उडिद डाळ. हि. मि. कढीपत्ता, घालून डाळींचा रंग लालसर झाला की त्यात थोडी हळद घालायची त्यात २ टे. स्पून पाणी घालून थोड उकळू देऊन मग त्यात उकडलेल्या बटाट्याच्या फोडी, चवीनुसार मीठ घाला आणि ढवळून घ्या. पाणी आटत आल की त्यात ओल खोबर आणि कोथिंबीर घाला.

२. सेट डोसा / स्पंज डोसा / आंबोळ्या / पोळ्ये

डोसा राईस - २ वाटी
उकडा तांदूळ (लाल, पिवळा किंवा ईडली राईस) - २ वाटी
उडीद डाळ - १/२ वाटी
पोहे - १/२ वाटी
मेथी दाणे - १ टी स्पून
P26-05-13_06.31[1].jpgP26-05-13_06.32[1].jpg

३. दावणगिरी डोसा
उकडा तांदूळ (लाल, पिवळा किंवा ईडली राईस) - ४ वाटी
उडीद डाळ - १/२ वाटी
पोहे - १/२ वाटी
साबुदाणा - १/२ वाटी
चणा डाळ - १/४ वाटी
मेथी दाणे - १ टी स्पून

४ - थंडीतील सेट डोसा हा थोडा कडवड लागतो. Happy
डोसा राईस - २ वाटी
उकडा तांदूळ (लाल, पिवळा किंवा ईडली राईस) - २ वाटी
उडीद डाळ - १/२ वाटी
पोहे - १/२ वाटी
मेथी दाणे - १/४ वाटी
हळद - २ टी. स्पून
kadu dosa.jpg

५ - सेट डोसा (अजून एक प्रकार)
डोसा राईस - २ वाटी
उकडा तांदूळ (लाल, पिवळा किंवा ईडली राईस) - २ वाटी
उडीद डाळ - १/२ वाटी
पोहे - १/२ वाटी
मेथी दाणे - १ टि. स्पून
चणा डाळ / चटणी डाळ - १/४ वाटी
मुगाची डाळ - १/४ वाटी

६ - नाचणी डोसा
नाचणीच पीठ - ४ वाटी
उडदाची डाळ - १/४ वाटी
मेथी - १/४ टी स्पून
पोहे - १/२ वाटी

७- नीर डोसा,

जूना कोणताही तांदूळ - ४ वाटी ( नविन तांदूळाचा थोडा सांभाळून करावा लागतो पण चविष्ट होतात म्हणून ही टीप. Happy
ओल खोबर - २ टे. स्पून
साखर - १ टी. स्पून
मीठ - चवीनुसार
neer dosa.jpg

८. मूग डोसा (पेसाराट्टू)
मूग - २ वाटी
बेडगी मिरची - ४-५
काळी मिरी - ७-८
आल - १/२ इंच
मीठ - चवीनुसार

क्रमवार पाककृती: 

१. सकाळी तांदूळ व मेथी एकत्र भिजत घाला. उडिद डाळ वेगळी भिजत घाला. साबुदाणे थोडे जास्त पाणी घालून भिजत घाला. संध्याकाळी वाटायच्या १५ मि.अगोदर पोहे भिजत घाला. चण्याची डाळ/ चटणी डाळ/ मूगाची डाळ ही तांदूळाबरोबर भिजत घाला.

२. ग्राइंडर किंवा मिक्सरमध्ये तांदूळ + मेथी दाणे + पोहे + चण्याची डाळ/ चटणी डाळ/ मूगाची डाळ / साबुदाणे एकत्र बारीक वाटून घ्या. उडदाची डाळ कमीत कमी पाणी घालून बारीक वाटून घ्या.

३. एका डब्यात मिश्रण ओतून घ्या. त्यात चवीपुरते मीठ घाला. चमच्याने मिश्रण एकाच दिशेने फेटा. १ टे. स्पून कच्चे तेल मिश्रणावर चमच्याने घाला आणि डब्याला झाकण लावून ठेवा.

४. सकाळी मिश्रण फुगून वर येईल. चमच्याने एकाच दिशेने ढवळून घ्या.

५. बीडाचा तवा तेल लावून गरम करून घ्या. चमच्याने मिश्रण तव्यावर घालून डोसे काढा.

नाचणीच्या डोश्यासाठी

सकाळी उडीद डाळ आणि मेथी वेगवेगळ भिजत घाला. संध्याकाळी दोन्ही एकत्र बारीक वाटून घ्या.
त्यात नाचणीच पीठ, चवीपुरत मीठ, थोड पाणी घालन एकाच दिशेने ढवळून पीठ आंबवायला ठेवा.
सकाळी पेपर डोसे काढा. ह्याचे सेट डोसे मला नाही आवडत. हा डोसा गरम खायला जास्त चांगला लागतो.

नीर डोसा

रात्री तांदूळ भिजत घाला. सकाळी तांदूळ, ओल खोबर, साखर घालून मिक्सरवर वाटून घ्या. एका भांड्यात हे मिश्रण काढून घ्या आणि त्यात चवीप्रमाणे मीठ आणि पाणी घाला. हे मिश्रण पातळ हव.

बिडाच्या तव्याला तेल लावून तापवून घ्या. गॅसची फ्लेम मोठीच ठेवा. मिश्रण तव्यावर ओता आणि लगेच फ्लेम स्लो करा. मंदाग्नीवर हा डोसा करतात. हव तर दुसर्‍या बाजूने एक सेंकंद भाजा. हे डोसे जाळीदार आणि पांढरे शुभ्र होतात. प्रत्येक वेळी डोसा घालताना फ्लेम मोठी हवी. घालून झाल्यावर फ्लेम स्लो करा.

मूग डाळ डोसा

मूगाची डाळ रात्री भिजत घाला. सकाळी डाळ, बेडगी मिरची, काळी मिरी, आल घालून वाटून घ्या. चवीनुसार मीठ घालून लगेच डोसे करा.

डोश्याच्या पीठाचे अजून काही प्रकार

पेपर डोशाच पीठ तव्यावर पसरवल की लगेच त्यावर थोड जिर आणी उभा बारीक चिरलेला कांदा स्प्रिकंल करा. थोड तेल घालून जिर आणि कांदा दाबून घ्या. डोसा फोल्ड करून खायला घ्या. उन्हाळ्यात हा डोसा बनवला जातो. क्रिस्पी जिर कांद्याचा डोसा यम्मी लागतो. नुसता किंवा चटणीबरोबर. Happy

सेट डोशाच पीठ तव्यावर पसरवून त्यावर कच्च अंड फोडून घालून त्यावर मीठ , काळीमिरी पूड, कोथिंबीर, हि. मि. बारीक कापून स्प्रिकंल करतात आणि दोन्ही बाजूने खरपूस भाजतात.

वाढणी/प्रमाण: 
खाल तेवढे
अधिक टिपा: 

१. डोसा राईस आणि ईडली राईस मॉलमध्ये सहज उपलब्ध आहेत. केरला स्टोअर्समध्ये फक्त ईडली राईस मिळतो.
२. पीठात कच्चे तेल घातल्यावर पुन्हा ढवळू नये.
३. पीठ आंबल्यावर त्यात पाणी घालू नये त्याने डोसे नीट होत नाहीत. जी काही कंन्सिस्टंसी पीठाची करायची असेल ती डाळ तांदूळ वाटल्यावर लगेच करावी.

मूगाचा डोसा
उपवासाला चालतो. रोजच्यासाठी बनवायचा असेल तर डोसा तव्यावर पसरवल्यावर त्यावर कांदा बारीक चिरून स्प्रिंकल करा.

क्रिस्पी पेपर डोश्यासाठी टिप्स
तवा व्यवस्थित तापवून घ्या. गॅस मिडीयम फेल्मवर ठेवा. रुमाल मीठाच्या पाण्यात किंवा साध्या पाण्यात बुडवून तापलेला तव्यावर ओला रूमालने पुसून घ्या. त्यावर चमच्याने मधोमध पीठ घालून संपूर्ण तव्यावर पसरवा. एक टिस्पून तेल / बटर / घी डोश्याच्या वरच्या बाजूला सगळीकडे लागेल अस शिंपडा आणि पसरवून घ्या

सेट डोसा, दावणगिरी डोसा बनवताना प्रत्येक वेळेस तव्याला तेल /बटर/ तूप लावून मग त्यावर पीठ घालून तुम्हाला हव्या त्या जाडीचा डोसा पसरवा.

सेट / दावणगिरी डोसे प्रवासासाठी उपयुक्त. २-३ दिवस सहज टिकतात. सॉफ्टही राहतात.
प्रवासासाठि नेताना हे डोसे थंड करून डब्यात भरायचे. त्याला अजिबात वाफ सुटायला नको तसेच पाण्याचा हात लावू नका.

माहितीचा स्रोत: 
आई आणि अम्मा
पाककृती प्रकार: 
प्रादेशिक: 
शब्दखुणा: 
Group content visibility: 
Public - accessible to all site users

धन्यवाद आशिका. एक सेट डोश्याचा फोटो टाकला आहे. Happy
बाकीचे जमेल तसे देत जाईन. अजूनही डोसा प्रकार अपडेट करेन.

दिनेशदा, सारिका धन्स. डोसा राईस वेगळा मिळतो. साधा तांदूळ आम्ही नाही वापरत. पण तुम्ही साधा तांदूळ आणि उकडा तांदूळ १/२ - १/२ समप्रमाणात घेऊ शकता. किंवा पूर्ण उकडा तांदूळ. उकडा तांदूळमध्येही बरेच प्रकार आहेत. Happy

आमच्याकडे उकडा तांदूळ पण मिळत नाही, दोसा तांदूळ मिळायचा तर काही चांसच नाही. सगळीकडे बासमतीचे किंवा इतर लाँग ग्रेन राइसचे प्रकार मिळतात.

नाही मिळाला मला मॉलमध्ये. मोअर, बिग अ‍ॅपल, रिलायंस फ्रेश आणि बिग बझार मध्ये बर्‍याचदा बघून झालंय गेल्या सात वर्षात. अर्थात आख्ख्या दिल्लीत कोणत्याच मॉलमध्ये मिळत नाही असं नक्कीच होणार नाही. पण माझ्या घरपासून १०-१२ किमी अंतरापर्यंत तर नक्कीच मिळत नाही.
केरला स्टोअरपण अजून दिसलं नाही.

अगं. आमच्या भागात साउथ इंडियन्स खूप कमी आहेत. पंजाब्यांचा भाग आहे. त्यामूळे नसणार मिळत. पण यावेळी पहिल्यांदा मला इडली रवा मिळालाय. कदाचीत काही दिवसांनी हा तांदूळ पण मिळेल. Happy

काही दिवसांनी हा तांदूळ पण मिळेल <<<< Happy
जिथे साउथ इंडियन्स लोकांची लोकवस्ती जास्त अशा भागात बघ एकदा. नाहीतर तिथे एखादी सा.इं. मैत्रिण असेल तर तिला नक्की विचार ती कुठुन घेते. कारण ह्या तांदूळाशिवाय आम्ही जगू नाही शकत. Proud

डोसा राईस - ४ वाटी
उडीद डाळ - १/२ वाटी
मी उडीद डाळ जास्त घालते वाटत, जवळ जवळ २ वाटी डाळ
का इडली रव्यासाठी बरोबर आहे

वरदा, पटेल नगर. बंगाली आहेत बरेच:) आता सापडू शकेल. मी इतके दिवस औरंगाबादहून घेवून यायचे थोडे. मग बिग अ‍ॅपलमध्ये अम्माज या ब्रँड्चं इडली/ दोसा बॅटर मिळायला लागलं. Happy

अवांतर, यावेळी मला ग्रोसरी करताना डाळवं दिसलं पहिल्यांदाच. मी चक्क एक एक किलोची दोन पाकिटं घेवून आले. आई हसत होती मला. Happy

मृणाल१, ईडलीसाठी
ईडली राईस - ४ वाटी
उडीद डाळ - १/२ वाटी
पोहे - १/२ वाटी
मेथी दाणे - १ टी.स्पून

ही ईडली पांढरी शुभ्र होतात आणि पीठ एकदम बारीक वाटायच अजिबात रवाळ नाही. मस्त हलकी, पांढरी शुभ्र आणि स्पाँजी ईडली होतात.

रवा ईडलीसाठी
ईडली रवा - ४ वाटी
उडीद डाळ - १/२ वाटी
पोहे - १/२ वाटी
मेथी दाणे - १ टी.स्पून

ईडली रवा, मेथी, उडीद डाळ वेगळ भिजत घाला. उडीद डाळ, मेथी, पोहे घालून बारीक वाटून घ्या. ईडली रवा वाटलेल्या मिश्रणात घालून मीठ घालून ढवळून कच्च तेल घालून पीठ आंबवायला ठेवा.

मी चक्क एक एक किलोची दोन पाकिटं घेवून आले <<< आलेपाकसाठी तू शोधत होती. तेव्हापण अशीच चर्चा झाली होती ते आठवल. Happy

धन्यवाद सर्वांना. डोसे बनवले की इथे फोटो नक्की द्या. Happy

आता हे प्रमाण करून बघते.
पुण्यात कोथरुडात ईडली राईस कुठे मिळेल ???

इथे एम टी आर चे दुकान आहे तिथे हा डोसा इतका अप्रतिम करतात की बास आणि ह्यावर ती त्यांची पोडी हवीच हवी. त्या पोडीमधेच खास चव आहे. सिंगापुरमधे कुठेही हा डोसा तुम्हाला मिळेल.

आणि करायला सोप्पा आहे अगदी. माझ्या ऑफ्फीसमधे तर तमिळ लोक नेहमी आणायचे कारण म्हणे हा डोसा अगदी सोप्पा आहे करायला. मीही करुन पाहिला आहे अनेकवेळी. जाडा लोखंडी तवा हवाच ह्या डोशासाठी.

Pages