डांगर

Submitted by सीमा on 8 May, 2012 - 13:42
प्रत्यक्षात लागणारा वेळ: 
१० मिनिटे
लागणारे जिन्नस: 

बेसिक रेसीपी साठी :उडदाची डाळ १ वाटी
ऐनवेळी :
चवीनुसार तिखट किंवा हिरव्या मिरच्या
कोथिंबीर
दही लागेल तस
फोडणीचे साहित्य
कांदा हवा असेल तर

क्रमवार पाककृती: 

डांगराची कृती फार सोपी आहे. आजी ,आई भाज्या कमी मिळायला लागल्या कि नक्की करायच्याच.
डाळ तयार करुन ठेवली कि बाकी आपण ऐनवेळी काय मिक्स करु तसे. मेतकुटासारखे.

उडदाची डाळ स्वच्छ धुवून , कापडावर पसरुन कोरडी करुन घ्यावी. नंतर मंद आचेवर भाजुन घ्यावी. (चकलीच्या भाजणीसारखे)
मिक्सर मधुन रवाळ दळावी.
ऐनवेळी लागेल तेव्हा , त्यात दही घालून मिश्रण तासभर भिजवावे. कांदा,कोथिंबीर ,मीठ,तिखट घालून कालवून फोडणी घालावी.
डांगर तयार. Happy

वाढणी/प्रमाण: 
खाल तसे
अधिक टिपा: 

आठवेल तशी रेसीपी लिहिलीये. आईला विचारुन आणखी काही बदल असले तर लिहिन.

माहितीचा स्रोत: 
आजी , आई, सांगली जिल्हा :)
पाककृती प्रकार: 
प्रादेशिक: 
Group content visibility: 
Public - accessible to all site users

असं आहे होय. मला वाटले पोह्याचे पापड करताना करतात ते डांगर आहे.
चांगलं दिसतय Happy
ह्या प्रमाणे मी मेतकूट+तिखट+कांदा+ताक/दही असं मिक्स करुन खातो मस्त लागतं. Happy

कित्ती गुणाची बाय तू सीमा. माझी आई पण सांगलीची म्हनजे मग तिची रेसिपी पण अशीच असणार यात काही वादच नाही.
मनापासून धन्यवाद!
आता ह्या विकेंडलाच डांगर कालवणार.

आता ते भडंगाची रेसिपी लिहाय्चं पण घे की मनावर Wink

आईग्ग्ग

मी अगदी आजच खाल्लं डांगर
माझं जीव की प्राण आहे
आधी कळाल असत तर फोटो काधुन ठेवला असता इथे टाकायला

मेतकुटात दही ट्राय नाही केलं कधी
पाहिन हे पण खाऊन

आमच्याकडे पण सेम कांदा - कोथिंबीर मिरची व दही, वरून फोडणी. नुस्ते खायला पण मस्त लागते. म्हणजे गप्पा मारत मारत.

हे हे.
विदर्भात डांगर म्हणजे एक फळ आहे. केशरी रंगाचे मिळते ते. कलिंगड वाल्यांच्या गाडीवर असते ते. (मस्कमेलन - Musk melon म्हणतात इंग्रजी मध्ये!) त्या फळाला माझ्या सासरी चिबूड म्हणतात.
(श्री यांनी दिलेल्या फोटोत तो भोपळा वाटतोय!)

लग्न करून सासरी आल्यावर कळले की कोकणस्थांच्यात डांगर म्हणजे पोह्याचे पापड ज्यापासून बनवतात ते पीठ. हे पीठ मूळात कसे बनवतात माहीत नाही. आमच्या इथे रेडी पीठाचे पाकीट किंवा घरगुती बनवलेले रेडी पीठ मिळते. त्यात पाणी + मीठ + कच्चे गोडेतेल घालून आम्ही डांगर कालवतो. तिखटजाळ असेल तर बेस्ट लागते. पानात वाढून घेताना पुन्हा थोडे कच्चे तेल वरतून घालायचे.

खान्देशात डांगर म्हणजे खरबुज. अक्षय्य तृतीयेच्या दिवशी घागरीवर ठेवायला लागतच.

ही रेसीपी भारी दिसतेय. कधीच ऐकलं नव्हतं याविषयी. Happy

वरच्या फोटोतल्या फळाला आमी लाल भोपळा म्हणतो. आ तुन केशरी किंवापिवल्ळा असतो तो.
याआधी यावर खूप चर्चा माबोबर झालेली आहे असे मला का बरे वाटून राहाल्येय ? Uhoh झाली व्हती का?

भाजलेल्या डाळीत अजूनही मालमसाला असतो नं?

डांगर - लालभोपळा वेगळा, चिबूड वेगळे आणि खरबूजही वेगळे.

थोडेसे विषयांतर,

पोह्याचे डांगर हे थोडेसे मजबुरीमधून घडते.
पोह्याचे पापड करताना, पोहे भाजून सर्व पिठात तिखट, मीठ, हिंग व क्वचित पापडखार घालतात. पण त्यापैकी
जवळ जवळ अर्धे कोरडे पिठ पापड लाटण्यासाठी म्हणून बाजूला ठेवावे लागते.
९ पेले पिठ असेल तर ४ पेले बाजूला ठेवतात.
मग एक एक पेला पिठ खलबत्यात घालून त्यावर आधणाचे पाणी ओतून कूटतात व त्याचे भराभर पापड
लाटावे लागतात. ते पिठ गरम असतानाच लाटावे लागतत नाहीतर पिठाला विरी जाते. पाणी जास्त झाले तर
जास्तच पिठ लाटतेवेळी लागते. पण नेहमी करणार्‍या बायकांना तेवढे पिठ लावावे लागत नाही आणि कोरडे पिठ
बरेच उरते. त्याचे डांगर करतात.
हे पापड फारच भरभर लाटावे लागतात, छोटे छोटे पापड लाटण्यात बराच वेळ जातो म्हणून मग एक मोठी
पोळी लाटून तिचे शंकरपाळे कापतात. त्यांना मिरगुंड म्हणतात.

हो नाशिक मालेगाव बाजुला लाल भोपळ्याला डांगर म्हणतात. आम्ही काशीफळ/लालभोपळा म्हणतो.
पण हे वरचे डांगर तोंपासुच. फक्त उडदाच्या डाळीबरोबर चमचा चमचा मुगडाळ्/हरभराडाळ घालतो आम्ही. कांदा कोथिंबीर मस्टच.

>> कोकणस्थांच्यात डांगर म्हणजे पोह्याचे पापड ज्यापासून बनवतात ते पीठ.
निंबुडा, कुठल्याही पापडाच्या भिजवलेल्या पिठाला डांगर म्हणतात. Happy

सीमा, छान रेसिपी. नक्की करून बघणार.

कुठल्याही पापडाच्या भिजवलेल्या पिठाला डांगर म्हणतात >>> होय का? आमच्याकडे मी कायम पोह्याचे पाहिले/ ऐकले आहे. त्यामुळे तसा समज झाला.

आमच्याकडेही करतात उडदाचं डांगर. पण मला अजिचबात आवडत नाही. कोकणातून तयार पीठच येतं. आईला दळताना पाहिलेलं नाही कधी. कच्चा कांदा, मिरच्या, कोथिंबीर, वरुन फोडणी हीच रेसिपी.

प्रॅडी Happy तूच इथे खायला.
सायो, मी पण आईला दळताना नाही पाहिलं कधी कारण आज्ज्यांकडूनच आयतं पीठ यायचं ना !

Pages