लागणारा वेळ:
१ तास
लागणारे जिन्नस:
Lasagna हा एक इतालियन पास्ताचा प्रकार आहे. हा प्रकार पास्तापैकी सर्वात जुना मानतात
कारण याचा शेप अगदी साधाच असतो.
मूळ प्रकारात खिमा, टोमॅटो आणि चीज वापरतात. हॉटेलमधे याचे शाकाहारी व्हर्जन क्वचितच मिळते.
मला एकदाच ते मिळाले होते, आणि ते भयानक मसालेदार होते.
याच्या तयार शीट्स मिळतात, त्यात उकळत्या पाण्यात बुडवून त्यामधे खिम्याचे थर देत त्या रचून
मग बेक करायच्या असतात.
हे माझे आपले साधे घरगुति व्हर्जन. (ज्या दिवशी भरपूर वेळ असेल किंवा शिळ्या चपात्या खपवायच्या असतील त्या दिवशी करायचा प्रकार.)
१) एक कप कणीक, तेल, मीठ, तांदळाचे पीठ
२) आवडत्या भाज्या (सिमला मिरच्या, गाजर, बटाटा - साधारण शिजून गर होतील अशा भाज्या )
३) टोमॅटो + थोडासा केचप
४) लोणी, दूध, मिरी पावडर, चिमूटभर जायफळ पूड (व्हाईट सॉससाठी, प्रमाण कृतीत आहे.)
५) आवडते चीज
क्रमवार पाककृती:
१) नेहमीप्रमाणे चपातीसाठी कणीक भिजवून ठेवा.
२) आवडत्या भाज्या कूकरमधे उकडून घ्या.
३) चपातीसाठी भिजवलेल्या कणकेचे सुपारीएवढे गोळे करुन त्यांना लांबट आकार द्या.
४) ते गोळे थोडे चपटे करुन, त्यावर तेल आणि तांदळाचे पिठ लावून, एकावर एक चार गोळे
ठेवून दाबा आणि मग अलगद हाताने लंबगोल लाटा.
५) मग तव्यावर थोडे तेल सोडत ते भाजून घ्या. सर्व पदर सुटले पाहिजेत. (याऐवजी तयार चपात्या वापरु शकता)
६) साधारण १० सेमी बाय २० सेमी अशा आयताकृती आकारात चपात्या कापा, आणि त्याचे पदर वेगळे करुन ठेवा.
७) उकडलेल्या भाज्यांपैकी एकेक भाजी कुस्करुन पॅनमधे टाका, त्यात थोडे मीठ, व थोडा कुस्करलेला बटाटा टाकून मिश्रण आटवा, पण पूर्ण कोरडे करु नका. असे सर्व सारणाचे प्रकार, वेगवेगळे काढून घ्या.
८) पॅनमधे अर्धा टिस्पून बटर टाकून त्यात एक टेबलस्पून कणीक भाजून घ्या, त्यात एक कप कोमट दूध टाकून सतत ढवळत गुठळ्या मोडून घ्या, त्यात मिरपुड, मीठ व जायफळपूड टाका, पूर्ण शिजवायची गरज नाही.
९) एका बोलमधे काढून त्यात किसलेले चीज मिसळून घ्या.
१०) पॅनमधे बारिक चिरलेले टोमॅटो, थोडासा केचप, व थोडे तेल टाकून जरा आटवून घ्या. (यात हवे तर लसूण, पार्सले,ऑलिव्ह ऑईल वगैरे घालून मसालेदार करू शकता, आवडत असतील तर इतालियन हर्ब्ज घाला, किंवा ओवा टाका.)
११) पॅन स्वच्छ करुन त्याला पुसटसा बटरचा हात लावा, त्यावर कापलेल्या चपातीचा एक तुकडा ठेवा, त्यावर व्हाईट सॉस लावून सारणाचा एक प्रकार पसरून लावा, त्यावर थोडी मिरपूड टाका.
१२) त्यावरही थोडे व्हाईट सॉस पसरुन लावा आणि दुसरे सारण व व्हाईट सॉस पसरुन लावा.
१३) असे करत चळत रचा, प्रत्येकवेळी व्हाईट सॉस लावा म्हणजे थर चिकटून राहतील. (यासाठीच व्हाईट सॉस पूर्ण शिजवायचा नाही.)
१४) पाच मिनिटे ही चळत तशीच ठेवा म्हणजे सारणातील पाण्यात चपातीचे तूकडे भिजतील.
१५) वर उरलेला व्हाईट सॉस लावा आणि मंद आचेवर पॅनवर झाकण ठेवून पाच मिनिटे शिजवा.
१६) डिशमधे काढून वर टोमॅटो सॉस घालून खा.
अधिक टिपा:
हा प्रकार लुसलुशीतच खायचा असतो, त्यामूळे सारणाचा पोत मऊसरच हवा. सारणासाठी अर्थातच बरेच पर्याय
आहेत. लाल भोपळा, शिजवलेले कडधान्य, कोहळा, दुधी वगैरे वापरु शकता, हाताशी असतील त्या सर्व भाज्या घ्या.
हा प्रकार पोटभरीचा तर आहेच, पण मसाले नसल्याने घश्याशी येत नाही.
