Russia-Ukraine war

रशिया आणि युक्रेन यांच्यात सुरू झालेल्या संघर्षामुळे सुमारे 20,000 भारतीय विद्यार्थी युक्रेनमध्ये अडकून पडले होते. त्यांना भारतात परत आणण्यासाठी नागरी हवाई वाहतूक मंत्रालयाच्या सहकार्याने परराष्ट्र व्यवहार मंत्रालयाने प्रयत्न सुरू केले. यासाठी हाती घेण्यात आलेले ऑपरेशन गंगा 10 मार्चला संपन्न झाले. या मोहिमेत भारतीय हवाईदलाबरोबरच एअर इंडिया, एअर एशिया, स्पाईसजेट, इंडिगो, विस्तारा आणि गो फर्स्ट या विमान कंपन्यांची विमानेही सहभागी झाली होती. भारताकडे परत येत असताना भारताच्या विमानांमधून अफगाणिस्तान, पाकिस्तान, बांगलादेश अशा शेजारी देशांच्या नागरिकांनाही संकटग्रस्त भागातून परत आणले गेले.

सध्या रशिया आणि युक्रेन यांच्यात सुरू झालेल्या युद्धाची पार्श्वभूमी अनेक वर्षांपासून तयार होत होती. युक्रेनच्या क्रिमीयामध्ये घेण्यात आलेली जनमत चाचणी हा या संघर्षातील एक महत्वाची घटना ठरली. या घटनेला येत्या काही दिवसांमध्ये 8 वर्षे होत आहेत. आता रशिया आणि युक्रेन यांच्यातील संघर्ष शिगेला पोहचलेला आहे.

काळ्या समुद्राच्या किनाऱ्यावर तुर्कस्तान, रशिया, जॉर्जिया, बल्गेरिया, रोमानिया हे देश वसलेले आहेत. यांच्यातील तुर्कस्तान नाटोच्या स्थापनेपासूनच त्याचा सदस्य होता, तर बल्गेरिया आणि रोमानिया 2004 मध्ये सदस्य झाले. जॉर्जियाही नाटोमध्ये सदस्य होण्यासाठी इच्छुक आहे.