#गझल

रुप जरी तुझे गोजिरवाणे
त्याला गंध कुठे आहे
पाठमोरीच एकदा वळ मागे
आरश्यात सोबती कोण आहे?

सोबती आज इथे
कोण मागतो आहे
आयुष्य तर फक्त
दोन क्षणांचे आहे
जग तूही दोन क्षण
काय गैर आहे
विसरु नकोस, त्यांत
एक क्षण माझाही आहे
ऋण एका क्षणाचे
तुझ्यावर ही आहे
फेडण्या ते ऋण
सख्या! जन्म पुढचा आहे

सरला वसंत कधीचा
बघ उमलणे राहून गेले
स्पर्शिले तुला हजारदा
जवळ घेणे राहून गेले

वाचीले जे डोळ्यांमधे
ते टीपणे राहून गेले
आठवणी खुडल्या एकाच रात्री
पानांचे दुमडणे राहून गेले

निरखले अनेकदा मला
ओळखणे पुरते राहून गेले
जसे अत्तर फासले मनगटी
त्याला हुंगणे राहून गेले

जतन केल्या शेकडो खुणा
जपणे तुला राहून गेले
जुन्या त्या खुणांचे
कोलाज करणे राहून गेले

कोण गुंतले कोणामधे
'गाठ' बांधणे राहून गेले
बघितले उशीराच वळूनी
मिळविणे तुला राहून गेले