रात्रभर
Submitted by मिल्या on 26 November, 2012 - 01:59
मीच माझ्या झळा सोसतो रात्रभर
सूर्य माझ्यामधे तळपतो रात्रभर
केवढी वादळे कोंडली ह्या उरी
पण दिवाही तिथे तेवतो रात्रभर
सोबतीला सुनी शांतता घेउनी
आतल्याआत मी भटकतो रात्रभर
मी पहाटे पहाटे हरू लागतो
वेदनांशी लढा चालतो रात्रभर
काय केलीस माझी अवस्था सखे
स्वप्न जागेपणी पाहतो रात्रभर
आंधळी रात्र पण फक्त स्पर्शातुनी
तू मला, मी तुला, वाचतो रात्रभर
ठेवली सर्व स्वप्ने तिजोरीमधे
मी सुखाने अता झोपतो रात्रभर
विषय: