फणसाच्या आठळ्याची भाजी (फणस बियांची भाजी)

तर मग झाल अस की फणस घरी आणवून, अस्मादिकाना टुकटुक करून, घरच्या मेंब्र गरे खाऊन मोकळी झाली . उरल्या त्या आठळ्या म्हणजेच फणसाच्या बिया ! आंब्यांच्या कोयीप्रमाणे त्या आठळ्या टाकून द्यायच्या नाहीत अस बजावून ठेवलेल होतेच.

एक वेळच्या भाजीला पुरे होतील आणि भाजी शेजारी देता येइल इतपत आठळ्या जमा झाल्या . मग मुहूर्त जमवून आणला फणसाच्या आठळ्याच्या भाजीचा .

कोकणात ही भाजी करतात . माझी आईची आई ही भाजी सुरेख करायची . आईलाही ही भाजी प्रचंड आवडायची.. त्याच त्या भाज्या खाऊन कंटाळा आला की एका रात्री हा फक्कड बेत असायचा भाकरीबरोबर. आठळ्या फोडायचे काम आजोबांकडे असायचे. वाराप्रमाणे त्यात काळे वाटाणे/ सुका जवळा/ सुके बोंबिल अशी पुरवणी असायची. जोडीला भाकरी , पिठल भात

याची कृती अगदीच सोपी .

आठळ्या धुवून घ्याव्यात . खलबत्याने साधारण एक सारखे तुकडे करावेत. नेहमीची फोडणी करून कांदा परतून, कोकम घालून त्यावर आठळ्या परतून घ्याव्यात . खात असलात तर सुका जवळा / बोंबिल टाकावे . प्रमाणानुसार गोडा मसाला आणि हवे तितके पाणी घालून वाफ काढावी. मीठ आणि हवे असल्यास कोथिंबीर घालून अंगसरशी भाजी करावी.

बस इतकेच.