ड्रीम ईलेव्हन नावाचे जुगार - निषेध धागा

ड्रीम ईलेव्हन, माय ईलेव्हन, माय सर्कल वगैरे नावांनी जे बेटींग ॲप निघाले आहेत त्याला सरकार कशी परवानही देतेय कल्पना नाही. कदाचित महसूल जास्त मिळत असेल. पण आजूबाजूला दिसणारी तरुण पिढी अक्षरशा या नादाला लागलेली दिसत आहे.

वेळ जातोय. पैसा जातोय. युवा पिढीची क्रयशक्ती बरबाद होतेय. जुगाराने कसे लोकं बरबाद होतात, होऊ शकतात हे आपणा सर्वांना माहीत असेलच..

बर्रं दारूच्या थेट जाहिरातींवर बंदी आहे तसे याच्या जाहीरातींबाबत काही दिसत नाही. उलट क्रिकेटप्रेमींच्या आवडीचे खेळाडूही एकेका ॲपसोबत जोडले गेले आहेत. आणि लोकांना हा जुगार देखील एक खेळ असल्याचे भासवून खेळायला उद्युक्त करत आहेत.

क्रिकेट भारतीयांचा आवडता खेळ आहे. आपल्याला तो खेळायला आवडतो, बघायला आवडतो, त्यावर चर्चा करायलाही आवडते. आता कदाचित त्यावर जुगार खेळायला जास्त आवडू लागले आहे.

मी माझ्यापरीने माझ्या काही तरुण मित्रांना समजावून सांगायचा प्रयत्न केला. पण आपल्याला क्रिकेटमधील बरेच कळते तर ते नॉलेज वापरून पैसे का कमावू नये असा काहींचा ॲटीट्यूड दिसला. तर काहींनी आनंदासाठी शे पाचशे रुपये गेले रोजचे तर त्यात काय एवढे असाही सूर लावला. जुगारची चटक लागलेल्यांना समजावणे अवघड असते.

सरकारच आता यावर निर्बंध आणू शकते. पण त्याआधीही आपण याचा निषेध करणे गरजेचे.