शाहरूख खान भारतीय महिलांना ईतका का आवडतो?

मी स्वतः मन्नत बाहेर उभा राहिलो आहे - त्याने हात केला भूक मिटते... ती एक
वेगळीच
मजा आहे त्या गर्दीत उभे राहण्याची...
पुढचा गटग मन्नत बाहेरच करू आपण सगळे... कोण कोण तयार आहे?

त्याने हात वर करण्याआधीचा मेन्यू सांगा.
चांगला वाटला तर काऊंट मी इन.

च्रप्स
आज रात्रि ३ वाजत पुन्हा् बोलू. अजून पर्यंत तरी कुणी बादशहाची आठवण केलेली नाही. "फॅॅन" तर दूरची गोष्ट.

अस्मिता , अगदी अगदी. शिवाय मला त्याच्याबद्दल ही एक गोष्ट आवडते की त्याने स्वतःच स्थान स्वतः कमावलं आहे. माझ्या माहितीप्रमाणे तरी त्याचे कोणी नातेवाईक त्याला घेऊन आले नाहीत या इंडस्ट्रीत.

बादशाह चे फॅन भरपूर आहेत.. फारएन्ड , वैद्यबुवा, अमितव हि आठवणारी नावे...

तो आमीर सारखा चॉकलेट हिरो नव्हता, ना तो सलमानसारखा शरीरसौष्टव मिरवायचा.
तो अक्षय कुमारसारखा अ‍ॅक्शन हिरो नव्हता, ना सनी देओलसारखा त्याचा ढाई किलो का हाथ होता.
ना अजय सारखी त्याची जुबा केसरी होती
lol

शाहरुखचा एक दुबईमधला व्हिडिओ आहे युत्युब्वर. तो अचानक वेगवेगळ्या ठिकाणी लोकांसमोर अनपेक्षितपणे आल्यावर माणसांची काय अवस्था होते, मुख्यत्वे बाईमाणसांची, ते फार छान टिपलं आहे. त्यात शेवटी तर एक बाई हाटेलात शाहरुख वेटरच्या रुपात आलेला बघून प्रचंड पाघळते आणि तिच्या नवरा आणि मुलांसमोर शाहरुखचा मुका घेते - तो भाग भन्नाट आहे. शाखाप्रेमी महिलांना नक्कीच आवडेल असा व्हिडिओ आहे हा. दोन गोष्टी मान्य करायलाच पाहिजेत: १. ह्या माणसाला स्टारडम कॅरी करणं उत्तम जमतं आणि २. त्याच्या मुलाखती बघताना त्याच्या उत्तम वाक्चातुर्याची जाणीव होते.

ता. क. धाग्याचा विषय भारतीय महिलांचा आहे आणि ह्या व्हिडिओत काही अभारतीय महिलाही आहेत. त्या अवांतराबद्दल क्षमस्व.

चाहते जे स्वतःच्या आनंदासाठी आलेत त्यांच्या जेवणाची व्यवस्था शाहरूखने का करावी >> बरोबर
पण आता जुबा केसरी आहे ना शाहरूखही. सध्या तो पठाणी कपड्यात छान दिसतो, रुबाबदार वाटतो. >> चूक.

वॅाव हपा, काय मस्त विडिओ शेअर केलात.. अंगावर काटा आला.. मलाही कधी शाहरूखला भेटण्याचा योग आला तर असा अचानकच समोर येऊदेत.

हे आहे जे फॅन,चाहते असतात ही लोक मला तरी बिलकुल आवडत नाहीत
उगाचच कोणाच्या तरी घरा समोर गर्दी करायची.रात्र भर वेड्यासारखे तिथे उभे राहायचे..ह्या लोकांचा मला तरी खूप तिटकारा आहे .
ह्या फॅन लोकांची मानसिकता काही तरी विचित्र असते
माझ्या समोर जरी कोणी असा हिरो ,हेरॉईन आली तरी माझा रिस्पॉन्स काहीच नसेल.
जशी बाकी लोक तसाच तो व्यक्ती.

भारी व्हिडिओ.
मरून -५ च्या 'शुगर' गाण्याची आठवण झाली. शुगर बघताना जसं दरवेळी तोंडभरून हसू येतं अगदी तसच तोंड भरून हसू आलं. मस्त केलाय.

मला चक दे इंडिया मध्ये शाहरुख सगळ्यात जास्त आवडला.

मस्त आहे तो व्हिडिओ.

अचानक कुणी सेलिब्रिटी समोर दिसतेय हे अनुभवले आहे.
हैद्राबादला जुन्या विमानतळावर जेट एअरवेज लोंज मध्ये, तर कधी बोर्डिंग वेळी त्यांना एस्कॉर्ट करून घेऊन जाताना आणि बिजिनेस क्लासला अपग्रेड मिळाले असताना क्वचित तिथे.
अशा वेळेस पहिली रिऍक्शन म्हणजे अरे हे कोणीतरी चांगल्याच ओळखीचे समोर आलेय पण पटकन कोण आठवत नाहीये असं होतं काही क्षण मग एकदम डोक्यात फ्लड लाईट पेटतो. दिलीपकुमार सायराबानो, आमिताभ, यांना फारच जवळुन चार पाच फुटावरून अचानक पाहिले, अमिताभशी हस्तालोंदन करता आले अर्धा सेकंदाचे. मी लँड होऊन बस मधून उतरून टर्मिनल मध्ये शिरलो तेवढ्यात अमिताभ आजूबाजुला दोघांसह बोर्डिंगला निघाला होता.
माझ्या मागे तीन चार लोक होते, काहीच गर्दी नव्हती.

दिलीपकुमार आणि सायराबानो बोर्डिंग गेट समोर दिसले पण तिथे जर गर्दी होती, ते सगळ्यांना हात दाखवत/नमस्कार करत होते. एक रो सोडून पुढच्या सीटला एकदा करीना होती, एकदा नागार्जुन आणि आमला.
इतर सेलब्रिटिजना अगदी एवढया जवळून नाही पाहिले, १५-२० फुटांवरून असेल

लॉंज मधली गंमत म्हणजे बाजूने अगदी परिचयाचा आवाज येतोय म्हणुन पाहिले तर एखादा सीनेनट.
एकदा अचानक मागून आवाज "एक्स्क्युज मी, मेरा ये जॅकेट ले लू" बघतो तर परेश रावळ उभा, त्याच्या जॅकेट ठेवलेल्या सोफ्याला माझा सोफा भिडलाय, लगेच तो पूढे ओढून त्याच्याशी काही बोलावे म्हणेस्तो तो अदबीने थँक यु म्हणुन जॅकेट घेऊन निघूनही गेला.

सहीए मानव, नाहीतर माझं नशीब ..आजपर्यंत एकच सेलिब्रिटी असा अचानक दिसलाय आणि तो म्हणजे प्रेम चोप्रा थिएटरमधे कोणता तरी हॅारर मूव्ही बघायला गेलेले आणि खूर्चीला मागून सारख्या लाथा पडत होत्या म्हणून वळून बघितलं तर प्रेम चोप्रा

म्हाळसा, काय सिच्युएशन मध्ये दिसला नेमका प्रेम चोप्रा!

म्हाळसा, प्रेमाने लाथ मारली हा शब्दप्रयोग इथे चुकीचा वाटणार नाही.

प्रेमाने लाथ मारली हा शब्दप्रयोग इथे चुकीचा वाटणार नाही.

मी 'तळवलकर्स' मध्ये जस अरोराला पाहीलेले आहे.

१. ह्या माणसाला स्टारडम कॅरी करणं उत्तम जमतं आणि २. त्याच्या मुलाखती बघताना त्याच्या उत्तम वाक्चातुर्याची जाणीव होते. >> good observation

सुपरस्टार srk (DDLJ , KKKG , कुछ कुछ होता है वैगेरे ) ऍक्टर srk (स्वदेस , लव्ह जिंदगी ) वर भारी पडला त्यामुळे हिट चित्रपट खूप आठवतात पण चांगले कमी आठवतात , वैयक्तिक मत !

मस्त व्हिडिओ आहे ह.पा.

क... क... क.. किरण .... म्हटलं की, डोळ्यांसमोर ' डर' मधला शाहरूख येतो... जुही चावलावर एकतर्फी प्रेम करणारा माथेफिरू प्रियकर...! ' जादू तेरी नजर.. खुशबू तेरा बदन' ह्या गाण्यात कुठेही न दिसणारा मात्र हे गाणं ऐकताना, बघताना शाहरूख डोळ्यांसमोर येतोच. डर चित्रपटाचा खरा नायक सनी देओल आहे हे लक्षातच न येऊ देता पूर्ण चित्रपट आपल्या अभिनयाने गाजवणारा शाहरूख खान..!!

शाहरूख खान मला पहिल्यांदा आवडला तो ' दिवाना ' चित्रपटामध्ये .! मला आठवते, गावात एका नातेवाईकांकडे पूजा होती आणि तेव्हा व्हीसीआर वर रात्रभर चित्रपट लावले होते. त्यात ' दिवाना' चित्रपट सुद्धा होता..

त्यातलं ' कोई ना कोई चाहीए .. प्यार करनेवाला... हे गाणं त्याकाळी खूपच हिट होतं. मोटरसायकलवर बसून स्टंट करत गाणं म्हणणारा शाहरूख मला आवडू लागला होता. त्यानंतर ' दिल आशना है.' ह्या चित्रपटात सुद्धा तो आवडला होता.

'दिलवाले दुल्हनिया ले जाएंगे' ह्या चित्रपटाच्या प्रदर्शनाच्या वेळी दूरदर्शनवर त्या चित्रपटाची मेकींग स्टोरी दाखवली होती. त्यावेळी चित्रपटातली गाणी आणि शाहरूख - काजोलची जोडी .. सगळचं सुपरहिट झालं होतं.. !! त्याकाळी शाळेतल्या सगळ्या मुलींना शाहरूख आणि सलमान ही जोडगोळी खूपच आवडायची. ते दिवसच वेगळे होते.. पुन्हा परतुनी न येणारे..!

'' करण- अर्जुन' चित्रपटातलं 'जाती हूँ मै ' म्हणणारी काजोल आणि ' जल्दी है क्या' असं म्हणत तिला विनवणी करत थांबवणारा शाहरूख ... त्या गाण्यातली दोघांची केमिस्ट्री जबरदस्त होती.

' कभी हा कभी ना ' मध्ये त्याला बिलकूल भाव न देणाऱ्या अॅनाच्या पाठी- पाठी फिरणाऱ्या शाहरूखला पाहून मला त्याच्याविषयी तेव्हा खूप सहानुभूती वाटायची.

त्यातलं 'वो तो है अलबेला... हजारो में अकेला..' तसंच ऐ काश के हम होश में अब आने ना पाए..' ही गाणी मला तेव्हाही आवडायची .. आणि आजही ऐकायला आवडतातच...!

' येस बॉस' मधलं ' मैं कोई ऐसा गीत गाऊँ के आरजू जगाऊँ.. अगर तुम कहो.. ' कित्ती ती प्रेयसीची गोड प्रेम आराधना... !! त्या गाण्यातला शाहरूख पाहून त्याच्यासारखाच आपला प्रियकर असावा असं एखाद्या प्रेमात पडू पाहणाऱ्या नवतरुणीला न वाटणे म्हणजे नवलच..!

बाजीगर मधला ' किताबे बहुतसी पढी होगी तुमने ' मधला शिल्पा शेट्टी सोबत नाचणारा भोळ्या- भाबड्या चेहऱ्याचाच शाहरूख मला आठवतो. आजही ते गाणं मी जीममध्ये मी आवडीने ऐकते.

दहावीची परिक्षा संपल्यानंतर आम्ही सगळ्या मैत्रिणी ' परदेस' चित्रपट पाहायला पालघरला गेलो होतो. संध्याकाळी पावणे सहाची ट्रेन पकडायला चित्रपट संपायला दहा - पंधरा मिनिटे असताना थेअटरमधून आम्हांला निघावे लागले होते. त्यामुळे चित्रपटाचा शेवट हुकला होता आणि आज मला त्या हुकलेल्या शेवटाची हुरहुर वाटते. ' 'ये दिल दिवाना.. दिवाना..., दिवाना है ये दिल ' ह्या गाण्यात वेगाने कार चालवणारा शाहरूख असो किंवा 'जरा तस्वीरसे तू निकल के सामने आ..' अशी प्रेयसीला व्याकूळ साद घालणारा आणि मग ' जाने कहा से आ गई है वो' म्हटल्यावर फुलणाऱ्या चेहर्‍याचा शाहरूख असो किंवा मग 'दो दिल मिल रहे है चुपके चुपके..' असं गाणारा शाहरूख असो .. फक्त आणि फक्त शाहरुखच डोळ्यासमोर येतो..

'दिल तो पागल है' मधला स्वप्नाळू प्रियकर असो की डुप्लीकेट मधला डबल रोल वाला शाहरूख ..!! शाहरूख नेहमीच आवडलायं..

' कुछ- कुछ होता है' मध्ये अंजलीला मिठीत घेताना टिनाचा हात धरून ठेवणाऱ्या राहुलचा मात्र मला राग आला होता. कोण जाणे.. पण त्या चित्रपटात मला तो स्वार्थी वाटला होता.

'मोहब्बते ' मधला अमिताभसमोर तेवढ्याच ताकदीने उभा राहणारा , ' एक लडकी थी दिवानी सी .. एक
लडके पे वो मरती थी..' म्हणणारा त्याचा दुखावलेला प्रियकर मला खूप आवडला होता. शाहरूखची त्या चित्रपटातली वेशभूषा मला खूप आवडली होती.

' कभी अलविदा ना कहना' चित्रपट थेअटर मध्ये पाहिला होता. त्यावेळी लग्नाळू वय असल्यामुळे ते विवाहबाह्य संबंध वगैरे प्रकरण काही झेपलं नव्हतं. चित्रपटातली गाणी बाकी आवडली होती... त्यातलं ' मितवाँ'' हे आवडतं गाणं..!

' वीर- झारा' मधला पाकिस्तानी प्रेयसीसाठी सीमेपार तुरुंगात सडणारा प्रेम 'वीर' आणि चित्रपटातली गाणी सगळचं सुंदर...!

' देवदास ' मधला शाहरूखचा देवदास आवडला होता पण त्या चित्रपटात त्याचा अभिनय अंमळ नाटकी वाटला होता.
देवदास मधल्या माधुरी आणि ऐश्वर्यांना विसरून चालणार नाही. मला ऐश्वर्याची पारो खूप आवडली होती.

' जोश' मधला टपोरी शाहरुख असो, 'चलते-चलते ' मध्ये राणीला मनवताना स्वयंपाक घरात भांडी धुणारा शाहरूख असो ( ह्या चित्रपटात राणी खूपच सुंदर वाटलीयं मला... आणि त्यातली गाणीही खूप छान आहेत ऐकायला) किंवा मग 'ताबीज बना के पहनू उसे... आयत की तरह मिल जाए कही' असे म्हणत ट्रेनच्या छतावर मलायकाच्या सोबतीने ठुमके लगावणारा 'छैय्या छैय्या ' गाण्यातला शाहरूख असो
सगळ्या भूमिका त्याने मनापासून जगल्या आहेत.

' कल हो ना हो' चित्रपटगृहात पाहत असताना चित्रपटाचा शेवट आणि शाहरुखचा अभिनय पाहून अश्रूंचे लोट माझ्या डोळ्यांतून वाहले होते कारण कुटूंबातल्या जवळच्या व्यक्तीला गमावल्याचे दुःख अगदी ताजे होते त्यावेळी..!!

'ओम शांती ओम' हा चित्रपट मी दिपिका आणि त्यातल्या गाण्यांसाठी चित्रपटगृहात जाऊन पाहिला होता. हा चित्रपट दिपिकामुळे हिट झाला असावा असं वाटते .. जरी शाहरूख खान त्यात असला तरीही..!

' चेन्नई एक्स्प्रेस ' हा त्याचा चित्रपटगृहात मी पाहिलेला शेवटचा चित्रपट..! दिपिका आणि शाहरूख दोघेही अर्थात आवडले होते त्या चित्रपटात..!

मी शाहरूखचा प्रत्येक चित्रपट पाहिलायं किंवा पाहतेच किंवा खूप आतुरतेने त्याच्या चित्रपटाची वाट पाहते एवढी काही मी त्याची अती वेडी चाहती नाही, मात्र त्याचे जे काही चित्रपट पाहिलेत त्या चित्रपटातल्या त्याच्या भूमिका आणि त्याचे अभिनय कौशल्य मला मनापासून आवडलेयं.

प्रत्यक्ष आयुष्यात शाहरूख खानचा आणि माझा दुरान्वये संबंध येण्याची सुतराम शक्यता नाही , त्यामुळे व्यक्तीगत आयुष्यात तो शाहरूख खान म्हणून कसाही असला तरीही आपल्या कसदार अभिनयाने , चित्रपटातल्या त्याच्या भूमिकेने, त्याच्या चित्रपट गीतांनी माझ्या भूतकाळातल्या आभासी जगातल्या एका कोपर्‍याला जिवंत ठेवणारा शाहरूख खान मला नेहमीच आवडतो.

तसा तो वादांपासून शक्यतो दूर राहत असावा असं वाटते. एक सामान्य मुलगा पाठीशी कुणीही 'गॉडफादर' नसताना चित्रपट सृष्टीतला' बादशहा ' बनतो तेव्हा त्याचा त्या पदापर्यंत पोहचण्याचा प्रवास नक्कीच थक्क करणारा तसाच कौतुकास्पद आहे. त्याच्या ह्या यशात निर्माते आणि दिग्दर्शक असणाऱ्या चोप्रा कुटुंबाचं योगदान मोलाचं आहे हे तो नि:संशयपणे मान्य करेलच. त्याच्यामधलं अभिनयकौशल्य अचूक हेरून त्यांनी दिलेल्या संधीचं त्याने सोनंच केलं.

शाळेत असताना आठवते की, एका स्त्रीने शाहरूख खान हा माझा हरवलेला मुलगा आहे असा दावा केला होता. त्यावेळी हे प्रकरण खूप गाजलं होतं. तेव्हा त्याच्या विषयी खूप कुतुहल वाटलं होतं.

अभिनेते सुधीर जोशी यांच्या एका लेखात वाचलेला किस्सा अंधुकसा आठवतो .. एकदा ते नाटकाच्या दौर्‍यासाठी दिल्लीला गेले होते. मुंबईला परतताना ट्रेनमधे एक उत्साही तरुण डब्यात इथे तिथे फिरत होता.. त्यांनी कुणाला तरी विचारले की, हा मुलगा कोण आहे तेव्हा त्यांनी सांगितलं की, काल जे नाटक पाहिलं होतं त्यात ह्याचा अमुक- अमुक रोल होता... तोच मुलगा पुढे जाऊन चित्रपट सृष्टीतला ' बादशहा' बनला.

प्रतिसाद अंमळ लांबत चाललायं त्यामुळे आता लिहायचे थांबवते ..नाहीतर 'अति तेथे माती ' व्हायची नाही का..?? ( ऋन्मेष, हे तुम्हांला उद्देशून नाही लिहिलं बरं मी...( ह. घ्या.)