भरली भोपळी मिरची

Submitted by माझेमन on 28 October, 2020 - 06:23
प्रत्यक्षात लागणारा वेळ: 
२० मिनिटे
लागणारे जिन्नस: 

५-६ भोपळी मिरच्या
मध्यम वाटी ओले खोबरे
अर्धा वाटी बेसन
६-७ पाकळ्या लसूण
२-३ छोटे चमचे साखर
हिंग
हळद
मीठ चवीनुसार

क्रमवार पाककृती: 

1. बेसन कोरडे भाजून रुम टेंपरेचरला आणून ठेवा.
2. भोपळी मिरचीचे दोन उभे तुकडे करून घ्या. बिया काढून टाका.
3. लसूण वाटून किंवा बारीक किसून घ्या.
4. अधिक टीपा वाचून घ्या. नंतरच पुढच्या कृतीकडे वळा.
5. ओले खोबरे, बेसन, लसूण, हिंग, मीठ, हळद, साखर मिक्स करून घ्या.
6. वरील सारण भोपळी मिरचीमध्ये भरून घ्या. सारण हलक्या हाताने भरा. गच्च भरू नका.
7. जाड बुडाच्या कढईत किंवा पसरट भांड्यात थोडे तेल घालून ते तापले की सारण वरच्या दिशेला येईल अशा पद्धतीने भोपळी मिरच्या ठेवा. वरून झाकण ठेवा.
8. भोपळी मिरची पूर्ण शिजली की उलट करून ३-४ मिनीटेच शिजू द्या. जास्त वेळ ठेवाल तर सारण करपेल. याच स्टेजला अधिकचे सारण असेल तर तेही शिजायला टाका.
9. दुसरी बाजू शिजल्यावर गॅस बंद करून भांडे हटवा. भोपळी मिरची तयार.

साधारण भोपळी मिरची म्हटली की मसालेदार भाजी डोळ्यासमोर येते. ही भाजी सौम्य पण अप्रतिम चवीची होते. लहान मुलेही आवडीने खातात.
आदल्या रात्री तयारी करून ठेवली तर अजून लवकर होते/ घाऊक प्रमाणात करता येते.

याच पद्धतीने पडवळ करता येते. पण मी कधी केले नाही.

वाढणी/प्रमाण: 
४
अधिक टिपा: 

सारण चिकट नकोय. त्यासाठी...
1. सारण एकत्र करताना बेसन आणि खोबरे रुम टेंपरेचरला हवे..त्यामुळे सगळे पदार्थ मिक्स होतात. परंतु खोबर्याचा प्रत्येक कण सुटा दिसला पाहिजे. सारण चिकट झाले तर भोपळी मिरची शिजली तरी सारण कच्चे राहते आणि ते नीट शिजवण्याच्या नादात भोपळी मिरची जळून जाते.
2. खोबरे डीप फ्रीझरला ठेवले असेल तर किमान ३-४ तास आधी बाहेर काढून ठेवा
3. पाणी अजिबात घालू नये. खोबर्याचा नॅचरल ओलसरपणा पुरेसा असतो.
4. साखरेऐवजी गुळ नको, गुळाची पावडर चालू शकेल. कुणी गुळाची पावडर वापरली तर प्रतिक्रिया जरूर नोंदवा.
5. या भाजीची चव गोडसर असते. त्यामुळे वरून मिरची/लाल तिखट घालणे अपेक्षित नाही.

माहितीचा स्रोत: 
सासूबाई
आहार: 
शाकाहारी
पाककृती प्रकार: 
भाज्या
प्रादेशिक: 
पारंपारीक मराठी
शब्दखुणा: 
भोपळी मिरची
सिमला मिरची
Groups audience: 
पाककृती आणि आहारशास्त्र
Group content visibility: 
Use group defaults
शेअर करा

Yum

Submitted by वेका on 28 October, 2020 - 07:00

मस्तच साधी सोपी भभोमि पाकृ. यांना ढोबळी मिर्ची म्हणतात काही ठिकाणी. रंगीत ढोबळ्या मिरच्या वापराव्यात. डिश छान दिसेल.

Submitted by किशोर मुंढे on 29 October, 2020 - 09:17

मला यातली 4 नंबर टीप जबरा आवडली
तेल तापत ठेवून मग फ्रीज मध्ये भाज्या शोधणारे उतावळे वीर आम्ही Happy

Submitted by mi_anu on 30 October, 2020 - 01:12

वावे, मृणाली >>> जरूर करून पहा आणि सांगा.

मी_अनू >>>
सारणाची कन्सिस्टंसी हाच या भाजीचा मेक ऑर ब्रेक पॉईंट आहे. या टिपा म्हणजे स्वानुभवातून आलेले कळकळीचे बोल आहेत हो Wink

Submitted by माझेमन on 30 October, 2020 - 08:54

मस्त आहे हे. ऱ्छान लागते.
भोपळी हे नांव नव्हत ठाऊक..
आमच्याकडं हिला ढोबळी मिरची, शिमला मिरची म्हणतात.

Submitted by रानभुली on 26 May, 2025 - 05:21

मस्त रेसिपी आहे!
आमच्याकडे भोपळी मिरचीची भाजी सहसा पिठ पेरुन (कोरडी) आणि क्वचीत प्रसंगी टोमॅटो घालुन (ओली) अशा प्रकारेच बनवली जाते. आता ही 'भरली भोपळी मिरची' बनवुन बघावीच लागणार 👍

Submitted by संजय भावे on 26 May, 2025 - 05:41

आम्ही हिला सिमला मिरची म्हणतो. (काहीजण सिमली मिरच्या म्हणतात!)

सिमला मिरची ही मुगडाळ घालून भाजी, बेसन लावून भाजी, पास्ता, नूडल्स, फ्राइड राइस वगैरे मध्ये आणि चिरुन कच्ची खाण्यासाठी अशी आम्ही वापरतो. हा

प्रकार माहित नव्हता. मस्त दिसतोय. आता करून पाहीन.

शंका: साखर न घालता तिखट variant होऊ शकेल का?

Submitted by वामन राव on 26 May, 2025 - 06:47

साखर न घालता तिखट variant होऊ शकेल का?
>>>>
मला वाटतं की खोबरं आणि साखर घातल्याने येणारी गोडसर सौम्य चव हा USP आहे या भाजीचा. त्यामुळे तिखट व्हर्जन्स ट्राय नाही केली. तिखटापेक्षा थोडं लिंबू घालून आंबटसर चव चांगली वाटेल असं मला वाटतं.

Submitted by माझेमन on 26 May, 2025 - 07:41

मस्त दिसतेय. मला पीठ पेरून किंवा चिंच गूळ गोडा मसाल्याची पण आवडते.

मी पण भोपळी मिरचीच म्हणते. पूर्वी कधीतरी हिला सिमला मिरची का म्हणू लागले लोक काय माहित.

कुणी ढब्बू मिरची पण म्हणतात.

Submitted by अश्विनी के on 26 May, 2025 - 08:29