शब्दाचे योग्य रूप कोणते?

इथे (तेलगुबहुल) देशी कंपनीत काम करत असताना वारंवार सांगूनही अनेक ठिकाणी माझ्या नावाचं स्पेलिंग Swathi करत असत. त्यांच्या मते मलाच माझ्या नावाचं इंग्रजी स्पेलिंग माहीत नव्हतं आणि ते सुधारणं हे त्यांचं आद्य कर्तव्य (karthavya?!) होतं!

दक्षिणी लोकांत, t म्हणजे 'ट' आणि th म्हणजे त असे ऐकलेले आहे.

थ असेल तेव्हा कस लिहितात दक्षिणेत.

म्हणजे आपण त आणि ट साठी t वापरतो तसे ते त आणि थ साठी th वापरतात का.

असावे अन्जू प्रश्न रास्त आहे. मला माहीत नाही.
---------------
स्वादिष्ट -चूक, स्वादिष्ठ - बरोबर हे माहीत नव्हते.
दुराभिमान - चूक, दुरभिमान - बरोबर, हेही माहीत नव्हते.
देशवासीयांना - चूक देशवासींना- बरोबर ..... हे सुद्धा
सुतोवाच - सूतोवाच

गणपतीच्या आरतीत कोणीतरी चूकीचे रुप 'शिवसूत' का 'महेशसूत' असे काहीतरी असे मागे वापरलेले. माझ्या मते ते चूकीचे होते. लिहील्यानंतर काहीच प्रतिक्रिया नाही.

आश्विनी नावाबद्दल.

त्यांना विचारायला पाहिजे काय नाव आहे ते. इथे दोन्ही नावं व्याकरणदृष्ट्या मला बरोबर वाटतात त्यामुळे व्याकरण नाझीगिरी करायची पण संधी हुकली.

अश्व + क्तिन् (इन् ) प्रत्यय = अश्विन् म्हणजे ज्याच्याकडे अश्व आहे/आहेत असा. त्याचे स्त्रीरूप अश्विनी.

अश्विनचा मुलगा आश्विन आणि मुलगी असेल तर आश्विनी. जनकाची मुलगी जानकी, भगीरथाने आणलेली भागीरथी इत्यादी ठिकाणी पहिल्या स्वराची वृद्धी होते. तसेच अश्विनची मुलगी आश्विनी.

"अश्विनची मुलगी आश्विनी" हे पटण्यासारखे आहे. पण "स्वादिष्ट" आणि "देशवासीयांना" हे शब्द चुकीचे कसे? माझ्या मते दोन्ही शब्द बरोबरच आहेत.

एक प्रश्न अनेक दिवसांपासून सतावतोय :

मला “क ळ ले” की मला “ क ळा ले” ? कोणते रूप बरोबर ?

मान्यवर मराठी लेखकांना दोन्ही रूपे वापरतांना बघितले आहे, म्हणून अजूनच गोंधळ.

जाणकारांनी प्रकाश टाकावा प्लीज

कळले - हेच शिकलेले आहे. घरातही बोललेले आहे. बाकी टेक्निकॅलिटी करता कॉलिंग - हपा, अनिंद्य व कुमार

कळले हेच बरोबर आहे

सोल सोलले

वळ वळले

कळावे सोलावे वळावे असे शब्द आहेत पण त्याचा अर्थ वेगळा आहे.

काही अकारान्त धातूंना भूतकाळाचे प्रत्यय जोडण्यापूर्वी अन्त्य 'अ' ऐवजी 'आ' असा आदेश (मूळ अक्षराबद्दल दुसरें योजिलें जाणारें अक्षर (प्रतिनिधि); बदली येणारा वर्ण. ) होतो
जसे - नीघ- निघाला, पळ - पळाला, म्हण - म्हणाला , उड - उडाला, बूड - बुडाला

संदर्भ - व्याकरणात भरपूर्न मार्क्स मिळवा - स.ध. झांबरे

माझ्या मते कळले आणि कळाले दोन्ही चालावे.
असेच गळले आणि गळाले.

यात अर्थभेद आहे, असेही वाटत नाही.

एका तळ्यात होती बदके पिले सुरेख गाण्यात आहे ना ओळ ' त्याचे तया कळाले तो राजहंस एक'

शतजन्म शोधताना गाण्यात देखील ' विझाल्या' आहे. बहुतेक वृत्ताची गरज म्हणून वापरत असतील

भरत, एकदम योग्य नियम आणि उदाहरणे!
कळाले इतकं ही चुकीचं नाही हे समजलं. कळाले.

सर्वांना थँक्यू.

@ भरत,

… यात अर्थभेद आहे, असेही वाटत नाही…..

होय. म्हणून जास्तच कन्फ्यूजन होत होते माझे. अर्थभेद असता तर लक्षात ठेवायला सोपे झाले असते

..कळले आणि कळाले दोन्ही चालावे….

ओके. बहुतेकदा “कळले” असेच वापरतो पण दुसरेही चुकीचे नाही हे समजले. थँक्यू.

BTW, परीक्षेत झांबरे काकांना “भरपूर्न” मार्क्स मिळाले असतील का ?

@ मेधा,

…विझाल्या …

कवितांमधे कवीलोक शब्दांबाबत थोडी लिबर्टी घेतात म्हणून आणि कविता मला समजत नाहीत म्हणून लक्षात आले नसतेच.