पक्षीनिरीक्षण - Cedar Waxwing!

तर मागच्या आठवड्यात लॉटरीच लागली. एखादा नवीन पक्षी त्याहीपेक्षा अगदीच अनपेक्षित पक्षी आला की मी म्हणते लॉटरी लागली! ( गंमत जंमत सिनेमातल्यासारखे ) माझ्यासाठी असा एखादा पक्षी बर्ड बाथवर येणे, इतक्या जवळून न्याहाळता येणे हे लॉटरीसमानच आहे!

तर शनिवारी दुपारी अचानक सिडर वॅक्सविंग (Cedar Waxwing) या पक्ष्याने नव्हे, पक्ष्यांच्या थव्याने बर्ड बाथला भेट दिली! ती दहा पंधरा मिनिटे जादूई होती. अचानक अनपेक्षित आनंदाचा धक्काच. तेव्हा खरं तर बर्ड बाथवर एकाच वेळी ४ गोल्डफिंच धूमाकूळ घालत होते आणि ते बघण्यात, शूट करण्यात मी मग्न होते. आणि एका सेकंदात अचानक तिथे एक Cedar Waxwing अवतरला. तो बहुतेक म्होरक्या असावा, कारण त्यामागोमाग सहा-सातजण आले. काही males आणि काही females किंवा पिल्लं (juveniles) होती. थाळीमध्ये उतरुन, त्यात टाकलेल्या फांदीच्या झुल्यावर बसून त्यांनी मनसोक्त आंघोळ केली!

जमेल तितके मोबाईलमध्ये शॉर्ट्स शूट केले. घाईने ते ठेवून कॅमेर्‍यातून जमतील तसे फोटोही काढले. (आणखी दोन हात असते तर बरं झालं असतं, सगळी आयुधं एकाच वेळेला वापरता आली असती. बर्ड वॉचिंगमध्ये ऐसे मौके बार बार नही आते!)

कमाल म्हणजे, ती वेळ काय स्पेशल होती माहित नाही, पण त्या काही मिनिटांमध्ये बाकी प्रकारच्या पक्ष्यांनाही अगदी तेव्हाच बर्ड बाथवर यायचं होतं. काही हाऊसफिंच होतेच पण त्याच्या काही मिनिटे आधी दोन अमेरिकन रॉबिन्स येऊन गेले. आता ते कसे काय आले हे नवलच आहे कारण आता ऑक्टोबरच्या शेवटाला बहुतेक रॉबिन्सनी दक्षिणेकडे स्थलांतर केले असणार. हे शेवटी राहिलेल्या बॅचमधले असतील कदाचित. हे कमी की काय म्हणून नेमक्या त्याच वेळेला दोन प्रकारचे Warblers येत होते - Yellow-rumped आणि Townsend's warbler (female). (आता टाऊनसेन्ड्ज हे एक स्वतंत्र देखणे प्रकरण आहे. Warblersबद्दल स्वतंत्र लिहिन तेव्हा फोटोवरुन कल्पना येईल). तर ते थाळ्यांच्या आसपास, वर फांदीवर नाचत होते की कधी खाली उतरायला मिळतंय. पण Waxwingsच्या थव्यामध्ये पाचर मारता येत नव्हती बहुतेक. गोल्डफिंच मात्र बिनधास्त Waxwingsच्या अगदी बाजूला धीटपणे उतरुन आंघोळ करत होते. हे सर्व शॉर्टसमध्ये कैद केलेय. नक्की बघा.
https://youtube.com/shorts/XunUeJjSuZI?si=0X7fAu8xBWVmkiSD
https://youtube.com/shorts/Q-8eLPtObDQ?si=J_1EHqmZUEyt8mOf

Cedar Waxwing हा पक्षी दिसायला गंमतीशीर आहे. देखणाही. डोळ्यांवर काळी फित बांधली असावी तशी कापडी पट्टी बांधल्यासारखे किंवा गॉगल्स घातल्यासारखे दिसतात ते. शेपटीचे टोक पिवळेजर्द दिसते आणि पंखांच्या शेवटाला काही लाल ठिपके! डोक्यावर तुरा.

अशी लॉटरी सारखी लागत नाही. मागे एकदा मी घरी नसताना घरच्या मेंबर्सना लागली होती जेव्हा Western Tanager (Male) हा सुंदर पक्षी येऊन गेला होता. सिडर वॅक्सविंग्ज आले हेही आश्चर्यच, कारण हे फळं, खास करुन बेरी टाईप फळं खाणारे पक्षी आहेत आणि माझ्या आजूबाजूला अशी झाडेही नाहीत बहुतेक. आता परत येतील की नाही, माहित नाही, पण हा पाण्याचा स्रोत ते विसरले नाहीत तर बरं!

माझी पक्ष्यांची लिस्ट आता आणखी एकाने वाढलीय!
Happy birding!

क्रमशः

या सिरीजमधील आधीचे लेखः
छंद पक्षीनिरीक्षणाचा - Window birding!
पक्षीनिरीक्षण - फिंच!
पक्षीनिरीक्षण - Hermit Thrush आणि अमेरिकन रॉबिन