पालक-शेंगदाण्याची आमटी

Submitted by स्वाती लाड on 17 November, 2021 - 05:14
प्रत्यक्षात लागणारा वेळ: 
१५ मिनिटे
लागणारे जिन्नस: 

1 जुडी पालकची पाने, शेंगदाणे ½ वाटी अर्धा तास आधी पाण्यात भिजवून ठेवणे, लसूण 4 ते 5 पाकळ्या, कांदा 1 मध्यम आकाराचा बारीक चिरून, 5-6 कढीपत्त्याची पाने, हळद ¼ चमचा, राई ¼ चमचा, मालवणी मसाला 1 ते दीड चमचा, तेल 2 चमचे, मीठ चवीनुसार

पालकची पाने बारीक चिरून घेणे. भिजवलेले शेंगदाणे व चिरलेला पालक थोडे पाणी व अर्धा चमचा मीठ टाकून कूकरला 2 शिट्ट्या काढून शिजवून घेणे.

वाटणासाठी – ¼ वाटी ओल खोबर, ¼ वाटी सुक खोबर किसलेले, 2 मोठे कांदे, 3 ते 4 पाकळ्या लसूण – हे सर्व साहित्य पॅन वर भाजून त्याचे वाटण करून घेणे.

क्रमवार पाककृती: 

कढईमध्ये 2 चमचे तेल टाकून त्यात 3-4 लसूण च्या पाकळ्या ठेचून घालाव्या. लसूण परतल्यावर त्यात राई, बारीक चिरलेला कांदा, कढीपत्त्याची पाने, हळद व मसाला घालून परतून घ्यावे. त्यात वाफवून घेतलेले पालक व शेंगदाणे घालावेत. नंतर त्यात तयार केलेले वाटण व आवश्यकतेनुसार पाणी घालावे. चवीनुसार मीठ घालावे. (आपण पालक शिजवताना थोड मीठ टाकलेले असल्याने नंतर मीठ कमी घालावे). छान उकळी आली की पालक शेंगदाण्याची आमटी तयार.

वाढणी/प्रमाण: 
6 जणांना भातासोबत खाण्यासाठी
अधिक टिपा: 

मालवणी मसाला नसल्यास 1 चमचा लाल तिखट व ¼ चमचा गरम मसाला टाकणे.

माहितीचा स्रोत: 
सासूबाई
पाककृती प्रकार: 
प्रादेशिक: 
शब्दखुणा: 
Group content visibility: 
Public - accessible to all site users

छान. मालवणी मसाला मिळेल पण आणला तर तो वापरून इतरही काही पाककृती लिहा. वालाची उसळ सोडली तर मालवणी मसाला फार वापरला जात नाही. पडून राहतो.
(ते पोह्याच्या आप्पेचा फोटो पण मनावर घ्या हो.)

सीमंतिनी- मालवणी मसाला माझ्या रोजच्या वापरातला आहे. भाजीत लाल तिखट व गरम मसाला टाकणार असाल तर त्याऐवजी मालवणी मसाला वापरू शकता.
पोहयाचे आप्पे मागच्या आठवड्यात बनवले होते पण गरम गरम खाऊन झाले सगळ्यांचे आणि फोटो नाही काढला. पुन्हा केले की फोटो टाकते.

mrunali.samad , धनुडी, पार्वती - हो नक्की करून बघा भातासोबत छान लागते तसेच गरम गरम भाकरीसोबतही छान लागते.

छान सोपी पाकृ. कांदा-लसूण वाटण आणि पुन्हा ईतर जिन्नस तळताना सुद्धा कांदा-लसूण असे केल्याने जास्त रुचकर भाजी होते का? प्रयोग करून पाहतो.