आईला काय आवडते / What Mom Likes

धन्यवाद अनिंद्य.

एफ. वाय. नंतर सातच्या कॉलेजला जाताना, पहाटे साडेपाचला बाबा मला उठवायचे. मी कॉलेजला चालत जायचे, रहायचो ते एक टोक, कॉलेज दुसऱ्या टोकाला, अर्धा तास तरी लागायचा चालायला. मी कधीच सकाळी खात नाही काही. चहा, दुध पीत नाही पण कॉफी पिते, कॉलेजला निघताना मला हवी तशी कॉफी करून माझ्या हातात बाबा आणून द्यायचे, मला हवी तशी नेसकॉफी करणे फक्त त्यांनाच जमायचं, ती पिऊन मी निघायचे. आई अर्थात बाबांचा डबा करण्यात बिझी असायची. मला नेहेमीचं आईच्या बरोबरीने सकाळी काही कामं स्वत:हून आमच्यासाठी करणारे बाबा आठवतात. सर्वात आधी उठून सर्वांसाठी चहा करणारे आणि मला निघताना कॉफी देणारे.

मी काही गोड करून नेलं किंवा कोकणातले काही विशिष्ट प्रकार करून नेलेकी खूप खुश होतात ते, कालच केळफूल भाजी नेलेली, मागच्या आठवड्यात फणसाची दिलेली. हे सर्व ओगले products रेडीमेड मिळते त्याचं केलं. आईसाठी वडे वगैरे करून पाठवले किंवा रेडीमेड आणलं तर आवडतं तिला तसेच महाशिवरात्रीला उपासाचे भाजणीचे वडे पाठवले होते.

तुमच्या ह्या धाग्यामुळे दोघांबद्दलची कृतज्ञता व्यक्त करता आली, परत एकदा धन्यवाद.

अनिंद्य, छोट्या रायवळ कैऱ्या, नारळाचे दूध, गूळ अशी सामुग्री वापरून कोयाड करतात. मला नक्की कृती माहिती नाही.

माझ्या दोन्ही आईंनी, म्हणजे ए आणि अहो, दोघींनीही माझे बेक्कार लाड केले आहेत. गेली 3 वर्षे भावाच्या बदलीमुळे ए आई माझ्याबरोबर आहे, त्यामुळे तिचे लाड करायची संधी मिळाली, अहो आईचे लाड करायला मी त्यांना माझ्याकडे बोलावते किंवा डबा घेऊन जाते.कोरोनामुळे सध्या दुदर पर्याय जास्त वापरला जातो.
ए आईला ताकाची कढी, कैरीची आमटी, कोलंबी भात, ओल्या काजूची / फणसाची भाजी, सगळी लोणची
अहो आईंना सुक्का अंडा मसाला, चिकन बिर्याणी, वाटाणे भात, हळदीचे लोणचे, थालीपीठ भाजणी
मी केलेल्या स्वयंपाक किंवा पदार्थांचे त्यांनी केलेल्या कौतुकाइतका दुसरा काही आनंद नाही !

माझ्या आई ला पाणीपुरी खूप आवडते पण तिला पाणीपुरी च्या स्टॉल वॉर उभं राहून खायला लाज वाटते. त्या भैया समोर उभं राहून तोंडाचा आ करणं शोभत का वगैरे वगैरे
जेव्हा जेव्हा मी सोबत असते तेव्हा मी तिला मुद्दाम घेऊन जाते, आता हळू हळू संकोच कमी झालाय.

माझ्या आईला मासे फार आवडतात . पण मला माशांचा स्वयंपाक करता येत नाही .
पण बाहेरून कधी जेवण मागवलं किन्वा कुठे बाहेर जेवायला गेलो तर चांगले मासे मिळतील असं नक्की बघतो .
तिने आवडीने , पोटभरून खाल्ले की मग आम्हाला बरं वाटतं .

चितळेची तुपात तळलेली मऊ जिलेबी, मऊ, तुपकट मैसूरपाक, साय घातलेला चहा, गरम गरम पातळ तव्यातल्या पोळ्या, मटणाचे अळणी, बिर्याणी आणि ओले बोम्बील अगदी जीव कि प्राण

छान धागा!

किती छान धागा. माझ्या आईला मी केलेले रवा बेसन लाडू फार आवडतात तसेच गोडाचा शिरा आणि पास्ता पण माझ्या हातचा आवडतो. तीला sugar आहे पण. सो बेसिकली सगळे गोड पदार्थ आवडतात
मातोश्रींचा बर्थडे होळीच्या दिवशी असतो त्यामुळे पुरणपोळी तर होतेच पण यंदा अजून काहीतरी तिच्या आवडीचे करेन . एवढा एकच दिवस आहे जेव्हा तिला तिच्या आवडीचे खायला आमची मुभा असते ( पथ्यामुळे )

आईला माझ्या हातची उंधियुची भाजी आणि सुरळीच्या वड्या आवडतात.
मी तिच्या भेटीत आवर्जून करते

.. खूप छान बाफ. मातृदिनाला काढायला हवा होता. ... हो, तेंव्हा सुचले नाही.
>>>>>
बरे झाले तेव्हा काढला नाही. उगाच ते दिड दिवसाचा गणपती पुजल्यासारखे झाले असते. आईच्या आवडीवर बोलायला मातृदिनाचा मुहुर्त कश्याला हवाय. फार आवडला धागा. त्यामिनित्ताने जे लोकं आईच्या आवडीचा मुद्दाम विचार करत नसतील ते देखील करू लागतील.

@ टॉपिक, आमच्याकडे लहानपणापासूनच तीनचार लोकांचे छोटे कुटुंब. त्यामुळे एकत्रच टोप मांडून जेवायची पद्धत असल्याने आणि लिमिटेड पदार्थ आपण कमी घेत दुसर्‍याला जास्त वा ज्याला तो आवडतो त्याला जास्त मिळावा हे बघितले जात असल्याने खाण्यापिण्याच्या एकमेकांच्या आवडी जपल्या जातातच. उदाहरणार्थ कोलंबी असली की आईला लहान साईजच्या आवडत असल्याने आपल्या ताटातील बारक्या बारक्या कोलंबी वेचून आईच्या ताटात सरकावणे, तसेच चिवडा वाटीत घेतला की त्यातील आईच्या आवडीचे शेंगदाणे काढून आईच्या हातावर प्रसादासारखे ठेवणे अश्या गोष्टी सहज घडतात. मला स्वयंपाक येत नसल्याने मुद्दाम तिला काही करून घातले असे होत नाही, पण बाहेरून ऑर्डर करताना तिलाच पहिले काय खाणार विचारले जाते, स्पेशली ती बरेच वार पाळत असल्याने ती नॉनवेज खाणार नसेल तर मला वर्षाचे ३६५ दिवस नॉनवेज चालत असूनही वेजच मागवले जाते. कारण आई आवडीने नॉनवेज खाणारी असूनही जर वारामुळे वेज खाणार असेल तर आपल्यालाही नॉनवेज ऑर्डर करून खाण्याची मजा कशी येणार..

बाकी आईला आईस्क्रीम भयंकर आवडते, भले ते बोलून तिने कधीच दाखवले नाही. पण मध्यरात्रीही तिला आईसक्रीम खाणार का विचारले तर विचार केल्यासारखे करून, "दे थोडीशी" असे म्हणते. त्यानंतर मी मोठा वाडगा भरून दिला तरी तो मस्त साफ करते. मग मी अजून अर्धा भरतो तो सुद्धा स्वाहा होतो
बाकी तिचे नेहमीचे जेवण किती आहे हे ठाऊक आहे. त्यामुळे कुठला पदार्थ असल्यावर ती जास्त जेवते याची कल्पना आहे. स्पेशली बाहेरून काही ऑर्डर करतो तेव्हा सर्व्ह करणे ही माझीच ड्युटी असल्याने लक्षात येते.

माझ्या आईला गुलाबजाम आणि मी केलेला मसालेभात खूप आवडतो
आणि अहो आईंना मी केलेल्या भाकरी खूप आवडतात
आमरस हा दोन्ही आयांचा आवडता पदार्थ आहे

माझ्या आईला उशिरापर्यंत झोपायला आवडतं.. जशी तीने नोकरी सोडली तशी ती ९ः३०च्या आधी उठलेली कधी आठवत नाही , अगदी सणालाही फार काही वेगळं नसतं.. माझा बाबा पण तीला उठवायला जायचा नाही त्यामुळे आम्हीही तीला हवं तितकं मनसोक्त सकाळी झोपू देतो

आईला विविधभारती लावून गाणी ऐकणे अतिप्रिय होते. तिच्या डिमेन्शियातही मी बाबांना म्हणे गाणी लावून ठेवत जा. तिच्या स्मृती नक्की गाण्यांशी दाटपणे निगडीत असतील. काही नाही तर तिला गाण्यांचे शब्द तरी आठवतीलच.
ती विशेष आस्तिक नव्हती पण संध्याकाळी पोळ्या करताना - रामरक्षा म्हणे.
रामाची धूपारती पाठ होती तिला. 'धूपदीप झाला आता कर्पूर आरती| छत्रसिंहासनी बैसिले जानकीपती बैसिले अयोध्यानृपती'
-------------
भडंग, चिवटसा पोह्यांचा चिवडा, कांदेपोहे, दडपे पोहे आवडत तिला. मी ते केले असते आज. साडेतीन-चार वाजता, चहा लागेच. उन्हात कुठे बसस्टॉपवरती उभे राहीलो की ती मला तिच्या सावलीत उभी करत असे.

<<उहात कुठे बसस्टॉपवरती उभे राहीलो की ती मला तिच्या सावलीत उभी करत असे>>>
अगदी अगदी... आणि आता मी देखील नकळतपणे माझ्या मुलीला असेच करते.

>>>>>बाकी आईला आईस्क्रीम भयंकर आवडते, भले ते बोलून तिने कधीच दाखवले नाही. पण मध्यरात्रीही तिला आईसक्रीम खाणार का विचारले तर विचार केल्यासारखे करून, "दे थोडीशी" असे म्हणते. त्यानंतर मी मोठा वाडगा भरून दिला तरी तो मस्त साफ करते. मग मी अजून अर्धा भरतो तो सुद्धा स्वाहा होतो Happy

हाहाहा मलाही आईसक्रीम अतिप्रिय!!

आईला दही वडा किंवा व्हेज ऑ ग्रॅतीन खूप आवडते.
मिरची ठेचा पण आवडतो.

माझ्या आईला आंबे खूप आवडायचे . इतकं की जूनच्या शेवटापर्यंत ती आंबे खायचे सोडत नसे.
दुसर एक म्हंजे तिला व्हिक्टोरियन पद्धतीची घरे खूप आवडत. आमचं घरही तसेच सजवल होत तिने

ठेव बाजूला तुझ्यातला देव आई
जेवले आहेत सगळे, तू जेव आई.... >>>>> सुंदरच.

भारीच ! माझ्या आईला veg manchurian खूप आवडतात. खूप वर्ष आईला काय आवडतं हेच माहिती नव्हतं कारण ती सतत आमचाच विचार करायची आमच्याच आवडीनिवडी बघायची पण आता आम्ही दोघं मोठे झालो आणि त्यांच्या आवडीनिवडी जपायला लागलो. आई वडील दोघांना शुगर आहे, एकदा नवऱ्याने दोघांना amul चे sugarfree icecream आणले तेव्हाचा त्यांचा आनंद खूप सुखावून गेला.

लहानपणी आईला काय आवडतं हे विचारलंच नाही.... ती नोकरी आणि दोन मुलं एका हाती वाढविण्यातच बिचारी थकुन जायची. पण नंतर माझं लग्न झाल्यावर तिला मी केलेले बटाटे वडे, सोलकढी खूप आवडते हे न सांगता माझ्या लक्षात आलं.... एकंदरीतच तळलेले चटपटीत पदार्थ तिला आवडतात पण वयपरत्वे आता जास्त खात नाही. पण गंमत म्हणजे खूप वेळ साग्रसंगीत एखादी रेसिपी करण्यात गुंतले असेल तर तिला आवडत नाही. झटपट काय ते आटपावं या पठडीतली ती आहे!

माझ्या आईला काय आवडत हे लक्षात येण्याएवढी मी नक्कीच मोठी होते ती गेली तेव्हा ,पण त्यावेळी ही अक्कल नव्हती, तो विचार नव्हता , maturity नव्हती. त्यामुळे आपल्या आईला काय आवडत होतं हा मी विचार करते ( म्हणजे ह्या धाग्यासाठी नाही एरवी ही हा विचार मनात येतो कधी कधी ) तेव्हा मी एक ही गोष्ट सांगू शकत नाही , आपल्या आईला काय आवडत होत हे आपल्याला जरा ही माहीत नाही ह्या विचाराने मी जास्तच उदास होते , अपराधी पणाची भावना मनात दाटून येते.

तरुण मुला मुलींनो , आपल्या आईच्या आवडी निवडी लक्षात घ्या आणि तिला आवडणाऱ्या गोष्टी देऊन तिला आनन्द द्या आणि तुम्ही ही आनंदित व्हा.

ममो +१

मनिमोहोर, प्रतिसाद बुल्स आय आहे .