वेड्या पावसानं ...

Submitted by पुरंदरे शशांक on 12 July, 2016 - 02:03

वेड्या पावसानं ...

जीव वेडावला बाई कसा वेड्या पावसानं
अंग ओलावत जाई मन चिंब थरारून

असा भरारा पाऊस दिशा जाती काजळून
मना चाहूल कुणाची जरा जाते उजळून

टप टप पावसाची लय जातसे भिनून
एक शिरशिरी आंत नकळत खुणावून

येतो पाऊस माहेरा जरा थांबून थांबून
कळ आतली उगाच उठे दाटून दाटून

कुणा लुभावे पाऊस कुणा घेतो कवळून
डोळा लागला पाऊस कढ अंतरी पिऊन ....

विषय: 
काव्यलेखन
लेखनसुविधा
शब्दखुणा: 
पाऊस
पाऊस कविता
Groups audience: 
गुलमोहर - कविता
Group content visibility: 
Public - accessible to all site users
शेअर करा

"असा भरारा पाऊस दिशा जाती काजळून
मना चाहूल कुणाची जरा जाते उजळून" ...विरोधाभास अर्थपूर्ण उतरलाय . चालीत ऐकायला गोड वाटेल ही कविता .

Submitted by भुईकमळ on 14 July, 2016 - 03:23

अप्रतीम...

"असा भरारा पाऊस दिशा जाती काजळून
येथे
"असा भरारा पाऊस दिशा जाती झाकोळून

असे केले तर जास्त संयुक्तिक होईल असे वाटते
रात्रीने दिशा का़जळतात तर पावसाने झाकोळतात...

अर्थात अधिकार तुमचा...

राजेंद्र देवी

Submitted by राजेंद्र देवी on 13 September, 2017 - 01:45

राजेंद्रजी, खूप सूक्ष्म व मार्मिक निरीक्षण... अगदीच सुयोग्य... मनापासून धन्यवाद..... असेच लक्ष असूद्या...

मात्र संपादन करता येत नाहीये !!!

Submitted by पुरंदरे शशांक on 13 September, 2017 - 05:28

येतो पाऊस माहेरा जरा थांबून थांबून
कळ आतली उगाच उठे दाटून दाटून
कुणा लुभावे पाऊस कुणा घेतो कवळून
डोळा लागला पाऊस कढ अंतरी पिऊन ....
व्वाह्... सुंदर कविता!

Submitted by सत्यजित... on 14 September, 2017 - 13:31