'इंडिया मार्च फॉर सायन्स' - निवेदन

Submitted by विज्ञानवादी on 6 August, 2017 - 00:16

नमस्कार,

येत्या बुधवारी, म्हणजे ९ ऑगस्ट, २०१७ रोजी भारतातल्या प्रमुख शहरांमध्ये या देशातले शास्त्रज्ञ, विज्ञानशाखेचे विद्यार्थी, शिक्षक आणि वैज्ञानिक मूल्यांवर प्रेम करणारे नागरिक एकत्र येऊन संचलन करणार आहेत. ’इंडिया मार्च फॉर सायन्स’ असं या संचलनाचं नाव आहे.

मुंबईतला कार्यक्रम दुपारी ४ वाजता ऑगस्ट क्रांती मैदानावर जमून तेथून विल्सन कॉलेजपर्यंत जायचं, असा आहे; तर पुण्यात दुपारी ५ वाजता रेल्वे स्थानकाजवळ असलेल्या गांधी पुत़ळ्यापाशी जमून तेथून कलेक्टर कचेरीजवळील आंबेडकर पुत़ळ्यापर्यंत चालत जायचं, असा कार्यक्रम आहे. याविषयी अधिक माहिती - http://breakthrough-india.org/imfs2017/index.html - या दुव्यावर मिळू शकेल.

या संचलनाला आणि चळवळीला आमचा पूर्ण पाठिंबा आहे.

हे संचलन आम्ही ज्या मागण्यांसाठी करणार आहोत, त्या आमच्या मागण्या पुढीलप्रमाणे आहेत -

(१) भारताच्या सकल राष्ट्रीय उत्पन्नाच्या, म्हणजे जीडीपीच्या, कमीत कमी ३% इतका निधी वैज्ञानिक व तांत्रिक संशोधनास, तर कमीत कमी १०% इतका निधी शिक्षणक्षेत्रास देण्यात यावा.

(२) अवैज्ञानिक आणि प्रतिगामी विचारांच्या, तसंच धार्मिक असहिष्णुतेच्या समाजातल्या वाढत्या प्रसारास आळा घालण्यात यावा. वैज्ञानिक दृष्टिकोन, मानवी मूल्यं आणि शोधक वृत्ती ही संवैधानिक मूल्यं आचरणात आणण्यावर भर देण्यात यावा.

(३) शिक्षणपद्धतीत फक्त वैज्ञानिक पुराव्यांचा आधार असलेल्या विचारांचा अंतर्भाव असावा.

(४) सरकारची धोरणं ही पुराव्यांनी शाबित विज्ञानावर आधारित असावीत.

या मागण्यांमागची आमची भूमिका अशी -

गरज ही शोधाची जननी आहे, असं म्हणतात. पण ते तितकंसं खरं नाही. आज आपल्याला जी विज्ञान आणि तंत्रज्ञान यांतली प्रगती दिसते आहे, ती झाली आहे कुतूहलामुळे. का, कसं आणि कशामुळे हे प्रश्न अत्यंत मूलभूत आहेत आणि या प्रश्नांची उत्तरं शोधणं म्हणजे मूलभूत संशोधन! ज्ञानप्राप्ती हा मूलभूत संशोधनामागचा मूळ हेतू असतो. आपल्या अवतीभवती जे घडतं, त्याचा अर्थ लावण्याचं काम मूलभूत विज्ञान करतं. नव्यानं समोर येणार्‍या घटना आणि त्या घटनांमागचा कार्यकारणभाव शोधण्याचं कुतूहल यांतून विज्ञानाची प्रगती होते. ही प्रगती देशाच्या प्रगतीसाठी अत्यंत महत्त्वाची असते.

सफरचंद झाडावरून खाली का पडलं, असा विचार करताना न्यूटनला गुरुत्वाकर्षणाचा शोध लागला; एका पेट्रिडिशमध्ये सूक्ष्मजंतू वाढत असताना त्या डिशवर चुकून आलेल्या बुरशीनं त्या सूक्ष्मजंतूंची वाढ रोखली आणि या निरीक्षणामागचं कारण शोधताना अलेक्झांडर फ्लेमिंगना प्रतिजैविकांचा शोध लागला; या आणि अशा अनेक सुरस कथा आपण ऐकतो. मात्र नीट विचार करता हे शोध असे एका ओळीत मावतील इतके सोपे नसतात, हे आपल्याला जाणवतं. कारण विज्ञानाच्या मूलभूत शाखांमधलं संशोधन हे पूर्वसुरींच्या संशोधनाचा आधार घेत पुढे जाणारं असतं. आज मूर्त स्वरूपात दिसणारा एखादा शोध हा कित्येक दशकांच्या संशोधनामुळे आपल्यासमोर आलेला असतो. उदाहरणार्थ, फ्लेमिंग यांना पेनिसिलीन हे काही गोळीच्या रूपात हाती लागलं नाही. फ्लेमिंग यांना पेनिसिलीन नैसर्गिकरीत्या तयार करणारी बुरशी सापडली. त्या शोधानंतर त्या बुरशीपासून पेनिसिलीन शुद्ध स्वरूपात वेगळं करणं, पेनिसिलीनची रासायनिक रचना शोधून काढणं आणि प्रत्यक्ष माणसांवर प्रयोग, हे सारं एका माणसाचं काम नव्हतं. १९२८ साली फ्लेमिंग यांनी पेनिसिलीयम या बुरशीचा शोध लावला आणि १९४१ साली पेनिसिलीन हे द्रवरूपात रुग्णाला इंजेक्शन म्हणून उपलब्ध झालं. त्यावर आजही भरपूर संशोधन सुरू आहे.

म्हणजे मूलभूत संशोधनाची मुख्य वैशिष्ट्यं अशी सांगता येतील -

१. ज्ञानप्राप्ती / कुतूहल हा मूळ हेतू. त्यामुळे एखाद्या शोधाचा तत्काळ उपयोग असेलच, असं नाही.

२. अज्ञाताचा शोध घेताना अनेक प्रयोग अयशस्वी होणं – यशाचं अत्यल्प प्रमाण.

३. अनेको वर्षं, किंबहुना निरंतर चालणारं काम.

४. अनेकांच्या सहकार्यानं चालणारं काम.

मूलभूत संशोधनाला भरपूर पैसा लागतो. ही त्या देशाची दीर्घकालीन गुंतवणूक असते. मूलभूत संशोधनाचे फायदे लगेच दिसत नसले, तरी प्रत्येक नागरिकाच्या आरोग्यपूर्ण आणि सुखकर, संपन्न जगण्यासाठी संशोधन व त्यावर होणारा खर्च टाळणं शहाणपणाचं नसतं. अमेरिका त्यांच्या सकल राष्ट्रीय उत्पन्नाचा २.७४२% वाटा विज्ञान-संशोधनासाठी राखून ठेवते. चीन आपल्या उत्पन्नाचा २.०४६% भाग संशोधनावर खर्च करतो. जगात संशोधनासाठी सर्वाधिक खर्च करणारा देश दक्षिण कोरिया असून तिथे या खर्चाचं प्रमाण ४.२९२% इतकं आहे. विकसनशील देशांमध्ये ब्राझील त्यांच्या सकल राष्ट्रीय उत्पन्नाच्या १.१५% वाटा संशोधनासाठी राखून ठेवतो. भारतात हे प्रमाण ०.८% इतकं आहे.

भारतानं संशोधनासाठी सकल राष्ट्रीय उत्पन्नाचा ३% भाग राखून ठेवावा, अशी मागणी गेली अनेक दशकं शास्त्रज्ञ करत आहेत. आजवरच्या एकाही सरकारनं ही मागणी पूर्ण केलेली नाही. गेल्या दोन दशकांत हा खर्च वाढवण्याची आश्वासनं तीनदा दिली गेली, मात्र मूलभूत संशोधनाचं महत्त्व आणि त्यासाठी उपलब्ध असणारा निधी यांचं आपल्या देशातलं व्यस्त प्रमाण वारंवार सत्ताधार्‍यांच्या लक्षात आणून देऊनही हा खर्च वाढवण्याच्या दृष्टीनं कार्यवाही झाली नाही. यंदा देशाला स्वातंत्र्य मिळून सत्तर वर्षं पूर्ण होत असताना विज्ञानासाठी भरीव आर्थिक तरतूद नसणं, हे खेदकारक आहे.

त्यातच भारतातल्या प्रमुख संशोधनसंस्थांना मिळणारा निधी कमी होत जातो आहे. संशोधनासाठी उपलब्ध असलेल्या निधीत वाढ करण्याऐवजी देशभरातल्या संशोधनसंस्थांनी आर्थिकदृष्ट्या सक्षम व्हावं आणि संशोधनासाठी लागणारा काही निधी स्वत: उभारावा, असं सरकारचं मत आहे. त्या दिशेनं निधिकपातही लगेच सुरू झाली आहे. सीएसआयआर, म्हणजे वैज्ञानिक आणि औद्योगिक संशोधन परिषद, त्यामुळे सध्या प्रचंड आर्थिक अडचणीत सापडली आहे. या संस्थेकडे संशोधनप्रकल्पांसाठी पुरेसा पैसा नाही. हीच कथा अणुऊर्जा आयोग, विज्ञान-तंत्रज्ञान विभाग, आयआयटी, आयसर, टीआयएफआर यांचीही आहे. या संस्थांमधले अनेक संशोधनप्रकल्प सध्या आर्थिक चणचणीमुळे खोळंबले आहेत. निधिकपातीमुळे आयआयटी, आयसर अशा संस्थांमधली विविध शुल्कही वाढली आहेत.

शास्त्रज्ञांनी दरवर्षी अमूक इतकी उत्पादनं / तंत्रज्ञानं बाजारात आणावी, त्यांनी सरकारी ध्येयधोरणांशी सुसंगत असं संशोधन करावं, असंही शास्त्रज्ञांना सांगण्यात आलं आहे. मुळात उपयोजित संशोधन हे मूलभूत संशोधनाच्या खांद्यावर उभं असतं. क्वांटम भौतिकीच्या सखोल अभ्यासाअभावी आपण लहानांत लहान सेमिकंडक्टर तयार करू शकलो नसतो. पुण्यात डॉ. मुरली शास्त्री यांनी चांदीचे नॅनोकण तयार करून त्यांचा अभ्यास केला नसता, तर ’टाटा स्वच्छ’सारखं कमी खर्चातलं पाणी शुद्ध करणारं यंत्र तयार होऊ शकलं नसतं. पण बाजारपेठेसाठी केवळ काही उत्पादनं निर्माण करणं, हे प्रत्येक शास्त्रज्ञाचं काम नाही. केवळ तंत्रज्ञान-विकास हा मूलभूत संशोधनाचा उद्देश नसतो. शास्त्रज्ञांनी सरकारी धोरणं आणि तत्कालीन सत्ताधीशांच्या आवडीचे राजकीय-सामाजिक कार्यक्रम पूर्ण करण्यासाठीच काम करणं, हे अन्यायकारक आहे. त्याच्या आवडीच्या विषयात मूलभूत संशोधन करणार्‍या शास्त्रज्ञाला अमूकच विषयात संशोधन करायला सांगणं, किंवा त्याला तसं संशोधन करावं लागेल, अशी परिस्थिती निर्माण करणं, हे घातक आहे.

सरकारनं दिलेल्या आर्थिक मदतीवर चालणार्‍या संशोधनसंस्थांमधल्या संशोधनामुळे देशातल्या नागरिकांच्या मूलभूत गरजा पूर्ण करता याव्यात, ही अपेक्षा योग्य आहे आणि देशातल्या अनेक संस्था त्या दिशेनं काम करतही आहेत. मात्र नवी ’स्टार्टअप्स’ सुरू होणं म्हणजे वैज्ञानिक प्रगती नव्हे. शिवाय राष्ट्रीय रासायनिक प्रयोगशाळा किंवा टीआयएफआर अशा मूलभूत संशोधनासाठी नावाजल्या गेलेल्या संस्थांकडूनही असंच आणि इतकंच संशोधन व्हावं, ही अपेक्षा गैर आहे. या संस्थांमधल्या संशोधनावर किती पैसा खर्च झाला आणि त्यातून ’परतावा’ किती मिळाला, असा हिशेबही चुकीचा आहे. मूलभूत संशोधनावर होणारा खर्च आणि त्यातून होणारा ’फायदा’ हा एखाद्या आर्थिक वर्षातल्या नफ्यातोट्याच्या परिमाणात मोजायचा नसतो. त्या संशोधनाचे परिणाम दिसायला बराच कालावधी लागू शकतो, शिवाय त्याचं तत्काळ, ढोबळ मूल्यमापनही शक्य नसतं. कारखान्यांना आणि उद्योजकांना लावले जाणारे निकष मूलभूत संशोधनासाठी वापरणं हे नक्कीच योग्य नाही. या देशासमोर असलेले अन्नधान्याचे, आरोग्याचे प्रश्न किंवा नद्यांची आणि रस्त्यांची स्वच्छता यांसाठी तंत्रज्ञान विकसित करताना मूलभूत विज्ञानाचा बळी जाणं हितावह नाही.

देश स्वयंपूर्ण व्हावा, नवी तंत्रज्ञानं विकसित व्हावी या अपेक्षापूर्तीसाठी संशोधनाला पाठिंबा देऊन शास्त्रज्ञांना मोकळीक मिळायला हवी. विज्ञान - कला - संगीत - चित्रपट - खेळ अशा कुठल्याच क्षेत्रांतलं ’इनोव्हेशन’ आचार-विचारस्वातंत्र्याअभावी घडू शकत नाही. या बाबतीत रामानुजनचं उदाहरण बोलकं आहे. आगळ्यावेगळ्या पद्धतीनं गणित करणार्‍या रामानुजनला प्रचलित पद्धत शिकवायचा प्रयत्न हार्डीनं केला. परंतु ते मानवत नाही, हे ध्यानात येताच त्यानं पूर्ववत पद्धतीवर भर दिला. अशा परिपक्वतेची व लवचिकतेची आज गरज आहे.

विज्ञाननिष्ठ समाज हा नेहमी प्रगतिशील समाज असतो. ज्या देशांनी मूलभूत संशोधनात गुंतवणूक केली ते देश नेहमीच प्रगत झाले आहेत. अर्थात आपल्याला प्रगत व्हायचे असेल तर मूलभूत विज्ञानांतील गुंतवणुकीला पर्याय नाही.

मूलभूत संशोधनासाठी लागणाऱ्या पायाभूत सुविधांच्या कमतरतेमागे निधीचा अभाव हे महत्त्वाचं कारण असलं, तरी त्या अभावामागे असलेलं वैज्ञानिक दृष्टीचा अभाव हे कारण अधिक गंभीर आहे. मूलभूत संशोधन महत्त्वाचं का, याचं उत्तर जर सामान्य जनतेला माहीत असेल, तर शास्त्रज्ञांना समाजातून आपोआप प्रोत्साहन मिळेल, शिवाय सरकारदेखील त्याकडे अधिक गांभीर्यानं बघेल. यासाठी मूलभूत संशोधनाला लोकाश्रय मिळायला हवा. विज्ञानाविषयी भारतीयांचा अत्यंत उदासीन असा दृष्टिकोन बदलण्याची नितांत गरज आहे. अर्थात याचं काही अपश्रेय शासनाच्या आणि खुद्द संशोधकांच्या माथी आहे. त्यांनी पुढाकार घेऊन आपलं संशोधन लोकांपर्यंत नेलं पाहिजे.

एकीकडे मूलभूत विज्ञानाकडे अक्षम्य दुर्लक्ष होत असताना छद्मविज्ञानाला राजाश्रय मिळणं ही गंभीर बाब आहे. या देशाच्या प्रगतीसाठी महत्त्वाची धोरणं आखणार्‍या, निर्णय घेणार्‍या आणि निधिवाटप करणार्‍या संस्था आणि संस्थाचालक छद्मविज्ञानाचा पुरस्कार करताना दिसून येतात. विज्ञानाशी संबंध नसलेल्या बिगरसरकारी संस्थाही सरकारी संशोधनसंस्थांच्या कामकाजात ढवळाढवळ करून छद्मविज्ञानाचा प्रचार करताना, त्यासाठी निधी मिळवताना दिसतात. विज्ञानाचा प्रचार आणि प्रसार होणं हे जागृत आणि सक्षम समाजाच्या जडणघडणीसाठी एक अत्यावश्यक बाब आहे. हे घडण्यासाठी सामान्य नागरिकांना विज्ञान म्हणजे नेमकं काय, हे समजणं जसं महत्त्वाचं आहे, त्याचप्रमाणे त्यांना कुठले दावे केवळ शास्त्राचा देखावा करीत आहेत, हे ओळखता येणंही गरजेचं आहे. धार्मिक आणि सांस्कृतिक परंपरांतील कालबाह्य, अतार्किक आणि प्रसंगी क्रूर अशा प्रथांना वैज्ञानिक अधिष्ठान मिळवून देण्याचा प्रयत्न सतत होतो आहे. त्याचबरोबर वेद-पुराण आणि महाकाव्यं यांतला प्रत्येक संदर्भ हा शास्त्रीय आधारावरच उभा आहे, हे ठसवण्याचा जोरकस प्रयासही चालू आहे.

छद्मविज्ञानी संस्था आणि त्यांचे दावे यांचं सर्वांत महत्त्वाचं लक्षण म्हणजे त्यांच्या राजकीय, धार्मिक अथवा सांस्कृतिक मतांचा त्यांच्या निष्कर्षांवर असलेला जबरदस्त पगडा. या मतांप्रमाणे संशोधनाचे निष्कर्ष आले नाहीत, तर त्यांच्यात अक्षम्य फेरफार केले जातात किंवा अस्तित्वात असलेल्या सिद्धांतालाच नाकारलं जातं. संशोधन करताना त्याचा निकाल आधीच ठरवून मग सुरुवात करण्याचा हा उरफाटा उद्योग आहे. आधीच ठरलेल्या निष्कर्षांना पूरक असलेली निरीक्षणं घेऊन केलेल्या वैज्ञानिक तपासणीमुळे झालेल्या नुकसानाची कितीतरी उदाहरणं आहेत.

छद्मविज्ञान हे ज्ञान आणि सत्य यांच्या मूलभूत संकल्पनेवरच हल्ला चढवत असतं. त्याचप्रमाणे खऱ्या शास्त्रीय संशोधनांवर जो पैसा आणि मनुष्यबळ खर्च होणं अपेक्षित आहे, त्याचा अपव्यय अशा निरर्थक ’शोधां’मुळे केला जातो. 'आपल्या महान, पुरातन परंपरेला सगळंच ठाऊक होतं, आपल्या पूर्वजांनी सगळेच शोध लावले होते', अशी भ्रामक अहंगंड जपणारी आणि स्वकष्टानं नवी ज्ञाननिर्मिती करण्यापासून परावृत्त करणारी घातक वृत्ती समाजात बोकाळणं, हा छद्मविज्ञानाचा सगळ्यांत मोठा धोका आहे.

भारतीय वैज्ञानिक परंपरेत अभिमान बाळगावा, अशा अनेक गोष्टी आहेत हे सत्य कुणीच नाकारणार नाही. परंतु त्या गोष्टींबद्दल न बोलता भलत्याच गोष्टींचा अभिमान बाळगावा, असा अभिनिवेश समाजात बोकाळला आहे. उदाहरणार्थ, डायोफंटाईन इक्वेशन्स सोडवण्यामध्ये ब्रह्मगुप्त आणि भास्कराचार्य यांसारखे भारतीय गणिती पाश्चात्य गणितज्ञांपेक्षा काही शतकं आघाडीवर होते. परंतु ब्रह्मगुप्ताची 'कुट्टक' किंवा भास्कराचार्यांची 'चक्रवाल' पद्धत यांविषयी भारतीयांना किंवा आपल्या नवीन पिढीला काहीच माहिती नाही. याउलट 'वैदिक'ही नसलेल्या व 'गणित'ही नसलेल्या काही क्लृप्त्या 'वैदिक गणित' मानून त्यालाच आपला वारसा मानण्याचं खूळ समाजात वेगानं पसरतं आहे. चरकसंहितेचा आधार घेऊन सूक्ष्मकणांवर आणि भस्मांवर संशोधन करणार्‍या नॅनोशास्त्रज्ञांचं, किंवा आवळ्याच्या रसामुळे गॅमा किरणांपासून होणारी हानी कमी होऊ शकते, असं संशोधन करणार्‍या भाभा अणुशक्ती संशोधन केंद्राच्या शास्त्रज्ञांचं काम बघण्या-वाचण्यापेक्षा आपण ’गणपती आणि प्लास्टिक सर्जरी’ यांबद्दल बोलतो. याची परिणती आपल्या खर्‍याखुर्‍या ठेव्यावर प्रेम करणारी संयत राष्ट्रभक्ती सोडून एक भलताच आक्रमक व अनिष्ट राष्ट्रवाद वेगानं मूळ धरू लागण्यात होत आहे.

छद्मविज्ञानाला नाकारणं म्हणजे धर्माला नाकारणं आणि तसं करणं म्हणजे देशद्रोह अशीही विचारधारा मूळ धरू पाहत आहे. विज्ञानाची सांगड सातत्यानं धर्म आणि अध्यात्म यांच्याशी घातली जात आहे. धार्मिक दृष्टिकोन आणि वैज्ञानिक दृष्टिकोन या दोन समांतर धारा आहेत, आणि त्या तशाच असाव्यात. धार्मिक ग्रंथांमधल्या साहित्यांत विज्ञान शोधण्याच्या प्रयत्न सगळ्याच धर्मांमध्ये केला जातो. पण विज्ञान आणि धर्म यांच्या आपल्या आयुष्यातल्या भूमिका वेगवेगळ्या आहेत. विज्ञानाचा परीघ मोठा आणि सर्वसमावेशक आहे. त्याची तुलना कोणत्याही धर्माशी करून आपण विज्ञानाचं कार्य आणि व्याप्ती या दोहोंवर अन्याय करतो. पण विज्ञान आणि धर्म या दोहोंसाठी हानिकारक असा एक मानवी दुर्गुण आहे - असहिष्णुता.

अ‍ॅरिस्टोटल म्हणाला होता - एखादी गोष्ट पटत नसली तरी तिचा सगळ्या बाजूंनी विचार करणं, हे सुविद्य मनाचं लक्षण आहे. असहिष्णुता ही जशी सगळ्या धर्मांच्या मूलभूत शिकवणींवरच घाला घालते, तशीच ती वैज्ञानिक तपासाच्या पायावरही आघात करते. धार्मिक असहिष्णुतेमुळे हिंसाचार होतो, शांतता भंग होते. बौद्धिक असहिष्णुतेमुळे विज्ञानाचं नुकसान होतं. विज्ञानाची व्याप्ती मोठी असली तरी वैज्ञानिक होण्याआधी बरेचदा माणसाच्या मनावर धार्मिक संस्कार झालेले असतात. त्यातूनच विज्ञान आणि धर्म यांची सांगड घालायचा मोह निर्माण होतो. पण धार्मिक शिकवणीनं मन खुलं झालं असेल, तरच ते विज्ञानाला पोषक बनू शकतं. धार्मिक शिकवणीनं बंद झालेलं असहिष्णू मन हे विज्ञानासाठी धोकादायक आहेच, शिवाय धार्मिक संस्कारांच्या अंतिम ध्येयाला, म्हणजे वैयक्तिक मनःशांती आणि समाधान यांनासुद्धा असं मन पोषक नाही.

सहिष्णुतेचा एक महत्त्वाचा भाग म्हणजे स्वत:च्या श्रद्धेला असलेली संशयाची किनार. ही संशयाची किनार आपण स्वत:च द्यायची असते. स्वत:च्याच श्रद्धेकडे किंचित संशयानं, कणभर अविश्वासानं पाहणं म्हणजे तारेवरची कसरत. पण ही कसरत कशी करायची, हे विद्न्यानाकडून शिकता येतं. अशी धार्मिक श्रद्धा आपोआप सहिष्णुतेचा कित्ता गिरवते.

सारासार आणि तारतम्यानं विचार करणं या गोष्टी वैज्ञानिक दृष्टिकोनाचा गाभा होत. आपल्या आसपास होणार्‍या घटनांचे अर्थ लावताना त्यात हा सारासार विचार करता आला पाहिजे. हा अर्थ लावताना आपले पूर्वग्रह व आपल्या श्रद्धा खुलेपणानं मान्य करणं आवश्यक आहे. एखादं अनुमान काढताना आपली गृहितकं कोणती, ही बाबतर सतत तपासून पाहावी लागेल. त्या गृहितकांवर कोणी आक्षेप घेतला, तर त्या आक्षेपांना उत्तर देता आलं पाहिजे. उत्तर देणं व प्रतिक्रिया देणं यांत महदंतर आहे. प्रतिक्रिया देण्यात केवळ स्वतःच्या मतांच्या कातडीचा बचाव आहे. उत्तर देण्यात इतरांनी मांडलेल्या मुद्द्यांवर मनन अपेक्षित आहे. या मननात ’आपण ज्या गोष्टींना पुरावा समजतोय त्यांना पुरावा का मानले जावे?’, ’आपली गृहितकं कोणती?’, ’आपण जो निष्कर्ष काढला आहे, त्याच्या मर्यादा कोणत्या?’ या प्रश्नांची उत्तरं शोधणं अंतर्भूत आहे... हे खरं संशोधन होय. या गोष्टी विज्ञानजगतात कराव्या लागतात, त्यामुळे आपण त्यांना वैज्ञानिक दृष्टिकोन म्हणतो आणि या खंडनमंडनातून निघतं त्याला (आणि त्यालाच) संशोधनाचा दर्जा प्राप्त होतो.

जोपर्यंत समाजमानसिकतेमध्ये वैज्ञानिक दृष्टिकोन मोठ्या प्रमाणात स्वीकारला जात नाही, तोपर्यंत समाजशास्त्र, मानव्यशास्त्रे इत्यादी विद्वत्‌शाखांमध्येही मूलगामी, समाजोपयोगी आणि आंतरराष्ट्रीय दर्जाचं संशोधन व त्याचे उपयोजित फायदे निर्माण होणं अशक्य आहे. विज्ञानसंशोधनाला पाठिंबा देताना त्यात सामाजिक व मानव्यशास्त्रेही अंतर्भूत आहेत, हे विसरता कामा नये. कारण वर्ण्य-विषय वेगळे असले, तरी संशोधन व ज्ञाननिर्मितीची प्रक्रिया यांचे निकष व घटक समानच असतात.

वैज्ञानिक दृष्टिकोन बाळगणं हे सर्वसामान्य नागरिकाला नक्कीच जमू शकतं. किंबहुना, असा दृष्टिकोन बाळगून सारासार विश्लेषण करता येणं, ही आपल्या हितासाठी आवश्यक गोष्ट ठरते. शास्त्रीय दृष्टिकोनाअभावी तरतमभाव येत नाही. सर्वसामान्य नागरिक म्हणून आपल्याला सर्वच शास्त्रांचं ज्ञान नसतं, ते आवश्यकही नाही. आवश्यक आहे ती शास्त्रीय विचार करण्याची क्षमता आणि त्याहीपुढे जाऊन तसा विचार सातत्यानं करण्याची सवय. ज्या समाजाच्या नागरिकांना अशा पद्धतीच्या सारासारबुद्धीचं महत्त्व पटत नाही, त्या समाजाला अज्ञानामध्ये जखडून ठेवणं सोपं असतं, कारण अशा समाजाला वि-ज्ञान व छद्मज्ञान यांत फरक करता येत नाही. शास्त्रीय दृष्टिकोन न बाळगणारं राष्ट्र भावनिकतेच्या आहारी जाण्यात सुख मानतं. अशा राष्ट्राच्या अस्मितांची जपणूक न होता त्या अस्मितांचं रूपांतर दुराग्रहांमध्ये होतं. विज्ञान वापरणं म्हणजेच वैज्ञानिक विचारपद्धतीतून येणारी सारासारबुद्धी वापरणं नव्हे. केवळ विज्ञान वापरणारा समाज ज्ञानाधिष्ठित राहतो, पण ज्ञानोपासक बनत नाही. आपल्या संशोधनाचं, आपल्या मतांचं साक्षेपी खंडन होणं, हा आपल्या बुद्धीवर घेतला गेलेला संशय नसून सत्यान्वेषणाची ती अतिशय सशक्त पद्धत आहे. हे कळलं नाही तर ज्ञान / सत्य ’असं असतं’ आणि ’असं असायला पाहिजे’ यांतला फरकसुद्धा कळत नाही. हा भेद जेव्हा एखाद्या नागरिकसमूहाला कळेनासा होतो, त्या नागरिकसमूहात, पर्यायानं त्या राष्ट्रात 'सत्य काय' हे उचित व यथायोग्य अन्वेषणाआधीच ठरवलं जातं. अशा सत्यासाठी 'सत्यमेव जयते'चा घोष करणं ही त्या राष्ट्रानं स्वतःचीच केलेली घोर फसवणूक ठरते.

आपल्या राज्यघटनेतलं ५१अ हे कलम आपल्याला ज्यांच्यामुळे स्वातंत्र्य मिळालं त्यांचा आदर्श बाळगायला, आपल्या देशातल्या वैविध्यपूर्ण संस्कृतीचं जतन करायला, पर्यावरणाचं संवर्धन करायला, धर्म-जात-भाषा-प्रांत यांत भेद न करता बंधुभाव वृद्धिंगत करायला सांगतं. घटनेचं हेच कलम वैज्ञानिक दृष्टिकोन आणि शोधक वृत्ती विकसित करणं, हे आपलं मूलभूत कर्तव्य असल्याचं आपल्याला सांगतं.

भारतीय राज्यघटनेत सांगितल्याप्रमाणे या देशात वैज्ञानिक दृष्टिकोन विकसित होण्यासाठी प्रयत्न केले जावे, प्रश्न विचारण्याची, शंका घेण्याची प्रत्येकाला मुभा असावी, धर्म-जात-वंश-भाषा-लिंग यां भेदांपलीकडे जाऊन आचार-विचारस्वातंत्र्य असावं, अशी आमची इच्छा आहे.

आमच्या या मागण्यांसाठी आम्ही व आमच्यासारखे अनेक शास्त्रज्ञ - शिक्षक - विद्यार्थी - वैज्ञानिक मूल्यांचा आदर राखणारे नागरिक येत्या बुधवारी, म्हणजे ९ ऑगस्ट, २०१७ रोजी देशभरात संचलनात सहभागी होणार आहेत.

आमचा हा लढा कोणत्याही एका सरकारविरुद्ध किंवा राजकीय पक्षाविरुद्ध नाही. आमची बांधिलकी वैज्ञानिक दृष्टिकोनाशी, लोकशाहीशी आणि सहिष्णुतेशी आहे. आम्हांला ज्यांबद्दल मनस्वी आदर आणि प्रेम आहे, अशा वैज्ञानिक मूल्यांसाठी आम्ही रस्त्यावर उतरणार आहोत.

आपला पाठिंबा आम्हांला मिळाल्यास व आपणही या संचलनात सहभागी झाल्यास आमच्या लढ्यास बळकटी येईल.

धन्यवाद.

डॉ. आदित्य कर्नाटकी (भास्कराचार्य)
डॉ. आरती रानडे (रार)
केतन दंडारे (अरभाट)
डॉ. चिन्मय दामले (चिनूक्स)
डॉ. जिज्ञासा मुळेकर (जिज्ञासा)
वरदा खळदकर (वरदा)
डॉ. सई केसकर (सई केसकर)
सत्यजित सलगरकर (आगाऊ)

***

या मसुद्यातल्या डॉ. चिन्मय दामले यांच्या मतांशी मायबोली.कॉमचा संबंध नाही. ती त्यांची वैयक्तिक मतं आहेत.

***
Group content visibility: 
Public - accessible to all site users

बाडीस उर्फ बाय डिफॉल्ट सहमत.

*

लेखातील मजकूर काटेकोर व उत्तम असला, तरी कुणीतरी लेमन भाषेत, व्हॉटसअँप भाषेत छोटा सारांश लिहावा असे सुचवितो.

अवॉर्ड वापसी वाल्यांची केली तशी तुमची अश्लील नाचक्की व हीन पातळीचा भक्त उन्माद सहन करण्याचे बळ तुम्हा शास्त्रज्ञास लाभो, ही शुभेच्छा.

>>>> (१) भारताच्या सकल राष्ट्रीय उत्पन्नाच्या, म्हणजे जीडीपीच्या, कमीत कमी ३% इतका निधी वैज्ञानिक व तांत्रिक संशोधनास, तर कमीत कमी १०% इतका निधी शिक्षणक्षेत्रास देण्यात यावा.

हा अतिशय महत्वाचा विषय आहे. सर्वच सरकारांकडून दुर्लक्षिला गेला आहे, रिसर्च, शिक्षण व इनोव्हेशनची स्विस इकोसिस्टिम भारतात नेता यावी यासाठी सध्या मी थोडेफार प्रयत्न करत आहे आणि सरकारचा प्रतिसादही सकारात्मक वाटला त्यामुळे तुम्ही काही कन्स्ट्रक्तिव करणार असाल तर सहभागी होता येईल म्हणून वाचायला गेलो.

पण जसे जसे पुढे मूळ लिंक वाचत गेलो तसे तसे धार्मिक असहिष्णुता वगैरे विषय एकांगीपणे यात घुसडलेले आढळले.

थोडक्यात काय तर एवोर्ड वापसी गँगची मोदी विद्वेषाची जुनीच दारू विज्ञानाच्या नव्या बाटलीत भरून पुनर्विक्रीचा हा प्रयत्न आहे. शुभेच्छा !!!

>>>मतांशी मायबोली.कॉमचा संबंध नाही

डिस्क्लेमर म्हणून ठीक आहे पण जेंव्हा माबो प्रशासनातील आयडी सातत्याने सरकार/मोदी/संघ विषयक विखारी अपप्रचार आणि डाव्यांचा पुरस्कार हा वैयक्तिक आयडी तसेच मायबोलीच्या उपक्रमामधून ( उदा. मागचा गणेशोत्सव ) करतांना दिसून येतात तेंव्हा आता हेच मायबोलीचे धोरण आहे असे वाटणे स्वाभाविक आहे.

>>पण जसे जसे पुढे मूळ लिंक वाचत गेलो तसे तसे धार्मिक असहिष्णुता वगैरे विषय एकांगीपणे यात घुसडलेले आढळले.
थोडक्यात काय तर एवोर्ड वापसी गँगची मोदी विद्वेषाची जुनीच दारू विज्ञानाच्या नव्या बाटलीत भरून पुनर्विक्रीचा हा प्रयत्न आहे. शुभेच्छा !!!
संपूर्ण अनुमोदन.

>>डिस्क्लेमर म्हणून ठीक आहे पण जेंव्हा माबो प्रशासनातील आयडी सातत्याने सरकार/मोदी/संघ विषयक विखारी अपप्रचार आणि डाव्यांचा पुरस्कार हा वैयक्तिक आयडी तसेच मायबोलीच्या उपक्रमामधून ( उदा. मागचा गणेशोत्सव ) करतांना दिसून येतात तेंव्हा आता हेच मायबोलीचे धोरण आहे असे वाटणे स्वाभाविक आहे.
+१०००.
अशामूळे या आंदोलनामागील हेतू व क्रेडीबिलिटी यावर प्रचंड मोठे प्रश्णचिन्ह आहे. अन्यथा उपस्थित केलेला मुद्दा अतीशय योग्य आहे/होता.

[रस्त्यावर ऊतरून काहिही साध्य होत नसते हे अताशा सर्वांना समजले आहे. आणि ईतक्या ऊच्च विद्याविभूषीत वर्गाला तसे करावेसे वाटणे ही आपल्या लोकशाही साठी प्रचंड मोठी चिंताजनक बाब आहे. असो. हे.मा.वै.म. ]

प्रत्येक परिच्छेद नीट वाचून समजून घेत मग विचार करून इथे लिहीत आहे. पहिले मला जाणवले म्हणजे जवळजवळ सर्व मुद्दे नेमकेपणाने लिहीलेले आहेत. हा लेख जर अनेकांच्या विचारांतून आलेला असेल तर याचे एकत्रीकरण व संकलन करणे हे प्रचंड अवघड काम आहे. ते करून पुन्हा एकसंध लेख उतरला आहे. याबद्दल ज्यांनी ही मेहनत घेतली त्यांना ही पहिली पोच Happy

मला दोन ठळक मुद्दे दिसले:
१. मूलभूत संशोधनाबद्दलचे सरकारचे धोरण, आणि
२. अवैज्ञानिक दृष्टिकोन, असहिष्णुता, "शास्त्राने सिद्ध झालेले" म्हणजे नक्की काय असते हे माहीत नसणे ई.

आता मूलभूत संशोधनासाठी निधी सरकारकढून वाढवून मिळण्याची मागणी - यात काहीही वाद नाही. भारताला महासत्ता व्हायचे असेल तर विकसित देशांइतके मूलभूत संशोधन आपल्याकडे होणे जरूरीचे आहे. त्याकरता किमान त्या देशांच्या इतका निधी मिळणे गरजेचे आहे. तो एका झटक्यात उभा करण्याकरता जे आर्थिक नियोजन करावे लागेल ते अवघड असेल, तर ४-५ वर्षांत तो वाढत जाउन ३% इतका होईल असे काहीतरी करायला हवे. त्यामुळे त्या मागणीला पूर्ण पाठिंबा.

त्यातलाच एक पॉइण्ट आहे - की शास्त्रज्ञाला त्याच्या/तिच्या आवडीच्या कामात संशोधन करू देणे महत्त्वाचे. याच्याशीही पूर्ण सहमत. शास्त्रज्ञांचे काम बहुतांश क्रिएटिव्ह प्रकारचे असते. ज्या गोष्टींची त्याला आवड आहे त्या विषयाबाबत तो दिवसरात्र विचार करतो, स्वतःच्या फावल्या वेळातही त्याला त्याबद्दलच विचार डोक्यात येत असतात. अशीच तयारी संशोधनाकरता आवश्यक असते आणि ती आवडीच्या विषयातच असू शकते. अशा वेळेस सरकारने कोणती धोरणे डोक्यात ठेवून त्याबाबतीत मूलभूत संशोधनाला वाव द्यावा, व अशा संस्थांची accountability काय असावी हे प्रश्न डोक्यात साहजिकपणे येणार - कारण जर एक वर्षांत तुमच्या संशोधनातून काही लोकोपयोगी निर्माण करून दाखवा असे म्हणणे जर चुकीचे असेल, तर मग एक वर्षासाठी निधी उभा करताना तो कोणाला द्यायचा हे कसे ठरवणार हा प्रश्न सर्वसामान्य माणसाला पडेल. पण हा प्रश्न आज निर्माण झालेला नाही. अनेक देशांत अनेक वर्षे वेगवेगळ्या विषयांवर मूलभूत संशोधन सुरू आहे. तेथे जे निकष वापरले जातात तसे आपल्याकडेही वापरले जात असणार. त्यावर आत्ता प्रश्नचिन्ह उभे करण्याची गरज नाही.

बाकी मुद्द्यांबद्दल अजून लिहायचे आहे. जमेल तसे लिहीतो.

जीएस, योग - जर असहिष्णुतेच्या मुद्द्याबद्दल तुम्हाला आक्षेप असेल, तर तो थोडा बाजूला ठेवून संशोधनाच्या मुद्द्यावर जेथे सहमती असू शकते त्याबद्दल लिहा. नंतर पुढे तुमच्या मताच्या विरोधी मत आहे म्हणून सगळा लेख का डिसमिस करता? तुम्ही जर सरकारातील लोकांना पटवून देउन काही करायचा प्रयत्न करत असाल, तर त्याबद्दल माहितीसुद्धा इथे महत्त्वाची आहे.

लेख वाचुन एक सुचवावेसे वाटते. लेखाचे शिर्षक बदलावयास हवे. हा मार्च फक्त सायन्स करिता आहे असा (गैर)समज होतो आहे. सायन्स, लोकशाही व सहिष्णुता ह्या तिन्ही करिता हा मार्च आहे हे स्पष्ट आहे तर ते तसे लिहावे.

विज्ञानाच्या अवघड वाटेवर चालणार्या सगळ्यांना पाठिंबा तर आहेच. ह्या मार्च करता पण तो आहे.

माझी देखील पहिली रिऍक्शन जीएस सारखीच होती. मात्र आर्थिक उजव्या विचारसरणीच्या व आजच्या परिस्थितीत सर्वात उत्तम पर्याय (माझ्या मते) असलेल्या या सरकारच्या काळात विज्ञान क्षेत्रात होणारा हस्तक्षेप चिंता करण्यासारखाच आहे. सोशल मीडिया, व्हाट्सअप वर एक नजर टाकल्यास अवैज्ञानिक गोष्टींना मिळणारा 'सांस्कृतिक' व 'राजकीय' पाठिंबा धिक्कार करण्याच्या लायकीचा आहे.
लेखाच्या सुरुवातीला मांडलेल्या चारही मुद्द्यांना व त्यांच्या मागणीसाठी काढलेल्या या मोर्चाला मनापासून पाठिंबा.

कोणताही पूर्वग्रह न ठेवत हा लेख दोन तीनदा पूर्ण वाचून काढला. यात कोठेही मोदी विद्वेषाचा भाग दिसला नाही. प्रस्तुत सरकारच्या धोरणांवर वस्तुनिष्ठ टीका म्हणजे मोदी विद्वेष असा नवा शब्दप्रयोग आला असेल तर कल्पना नाही. शिवाय लेखात कोठेही "काँग्रेस च्या जमान्यात सारे ठिक ठाक होते, आत्त परिस्थिती बिघडत आहे" असा सूर नाही. सत्तर वर्षात मूलभूत संशोधनासाठी असलेली बजेट ची टक्केवारी कमीच राहिली यात त्यतल्या जास्तीत जास्त वर्षे सत्तेत राहिलेल्या काँग्रेसचे अपश्रेय अध्याहृत आहे.

अर्थात नव्या सरकार मुळे संशोधानाच्या प्राधान्यक्रमात झालेला बदल व त्यात "आय आय टी दिल्ली मध्ये पंचगव्यावर संशोधन !" अशा बातम्या पहाता त्यावर टीका होणे सांयुक्तिक व गरजेचे आहे.

एकदम बरोबर @ विकु

पण त्यानंतर इथे सुरू झालेला भक्तीसंगीताचा कार्यक्रम पाहता, मी म्हटले
>>
अवॉर्ड वापसी वाल्यांची केली तशी तुमची अश्लील नाचक्की व हीन पातळीचा भक्त उन्माद सहन करण्याचे बळ तुम्हा शास्त्रज्ञास लाभो, ही शुभेच्छा.
<<
ते लगोलग सिद्धही झाले आहे Lol

थोडक्यात काय तर एवोर्ड वापसी गँगची मोदी विद्वेषाची जुनीच दारू विज्ञानाच्या नव्या बाटलीत भरून पुनर्विक्रीचा हा प्रयत्न आहे. शुभेच्छा !!!
+१

मार्चला पाठींबा आणि शुभेच्छा.

वरच्या पेशवे यांच्या >>लेखा मधे अनेक इम्प्लिकेशन्स आहेत जी अत्ताच्या सरकारसंबधात आहेत असे वाटते. तर ताकाला जाऊन भांडे लपविण्याने काय साध्य होणार आहे. कॉल स्पेड अ स्पेड. विज्ञानाची कास धरणार्यांकडुन इतके नक्कीच अपेक्षीत आहे. >> शी सहमत. स्पेंडीगचा मुद्दा स्पष्ट करणारा परिच्छेद सोडता उरलेल्या सगळ्या मुद्द्याचा संदर्भ सध्याच्या सरकारच्या निर्णयांचा निषेध करणारा आहे. विच इज ओके. मला भारतातील मूळ मार्चचा उद्देश आणि त्यामागची कारणमीमांसा माहित नाही पण या लेखात तरी सध्याच्या परिस्थितीचा निषेध / सुधारणा असा सूर आढळला.

वर विकु म्हणतात, पंचगव्य संशोधनावर निषेध झाला पाहिजे! लेखातलं >>अ‍ॅरिस्टोटल म्हणाला होता - एखादी गोष्ट पटत नसली तरी तिचा सगळ्या बाजूंनी विचार करणं, हे सुविद्य मनाचं लक्षण आहे. >> हे वाक्य त्यांनी वाचलं नसावं. कुणा शास्त्र अभ्यासाकावर सक्तीने हेच करा याचा
लिमिटेड ... हो लिमिटेडचं निषेध झाला तर मी समजू शकतो. पण कुणीही खरा वैज्ञानिक कुठली गोष्ट सिद्ध करण्या आधीच निष्कर्ष काढत नाही.

या पुढील काही वाक्यांचा आणि सायन्स मार्चचा काय संबंध असं झाल. विज्ञान आणि हिंसाचार किंवा शांतता याचा दूरान्वयेही संबंध नाही. विज्ञान शांतता राखा कधी पासून सांगायला लागलं. ?
>>असहिष्णुता ही जशी सगळ्या धर्मांच्या मूलभूत शिकवणींवरच घाला घालते, तशीच ती वैज्ञानिक तपासाच्या पायावरही आघात करते. धार्मिक असहिष्णुतेमुळे हिंसाचार होतो, शांतता भंग होते. बौद्धिक असहिष्णुतेमुळे विज्ञानाचं नुकसान होतं. विज्ञानाची व्याप्ती मोठी असली तरी वैज्ञानिक होण्याआधी बरेचदा माणसाच्या मनावर धार्मिक संस्कार झालेले असतात. त्यातूनच विज्ञान आणि धर्म यांची सांगड घालायचा मोह निर्माण होतो. पण धार्मिक शिकवणीनं मन खुलं झालं असेल, तरच ते विज्ञानाला पोषक बनू शकतं. धार्मिक शिकवणीनं बंद झालेलं असहिष्णू मन हे विज्ञानासाठी धोकादायक आहेच, शिवाय धार्मिक संस्कारांच्या अंतिम ध्येयाला, म्हणजे वैयक्तिक मनःशांती आणि समाधान यांनासुद्धा असं मन पोषक नाही. >> या आणि अशाच वाक्यांनी हा लेख अनेकांना प्रीची वाटतोय. जो मलाही वाटला.

अर्थ डे ला जगभरात जेव्हा असे मार्च झालेले तेव्हा मी इथल्या लोकल सॅन फ्रॅन्सिस्कोच्या मार्चला मुलांना घेऊन गेलेलो. पोरांना घेऊन जाण्याचा उद्देश त्यानिमित्ताने त्याच्याशी त्या विषयावर चर्चा करता येईल हा होता. मी का जातोय असा प्रश्न जाताना स्वतःला केला तेव्हा उत्तर नव्याने निवडून आलेला ट्रंप आणि त्याच्या वातावरण बदल पॉलिसीचा निषेध/ फंडिंग कट हा होता. तिकडे गेल्यावर अनेक लोक ट्रंपचा निषेध टाईप पोस्टर मला देऊ करत होते, जी मी घेतली नाहीत. तिकडे बोलणारे वक्तेही, कॅटेगोरिकली याचा ट्रंपशी संबंध नाही असं सांगत होते, जे मला पटत गेले. या अशा मोर्चानी नव्या पिढीत सायन्स आणि त्यासंबधीत मुद्द्याची चर्चा एकूणच समाजात त्याची जागृती असाच असावा.

हा मार्च बुधवारी का आहे? सुट्टीच्या दिवशी का नाही? जेणेकरून जास्त लोक येऊ शकतील.
जेव्हा जगात असे मार्च झाले तेव्हा भारतात का नाही केला? त्याने देशात आणि जगाच्या माध्यमात जास्त पब्लिसिटी मिळाली असती, आणि सरकारवर जास्त चांगल्या प्रकारे दडपण आलं असतं असं मला वाटतं.

वैज्ञानिक तत्वांचा आणि सरकारचा काही संबंध नसतो. नसावा तरी. विज्ञानाला आवश्यक पैशाचा आणि सरकारचा मात्र असतो. वैज्ञानिक मुल्यांवर विश्वास असल्यास मोर्चांच्या या हाकेला सकारात्मक उत्तर द्या.

या विषयावर जुलैमध्ये माझा एक लेख प्रकाशित झाला. त्या लेखाची प्रत खालील दुव्यावर मिळेल:
March for Science, March for Progress

सर्व शास्त्रज्ञांना आणि मार्चमध्ये सामिल होणार्‍यांना शुभेच्छा..

माबो प्रशासनातील आयडी सातत्याने सरकार/मोदी/संघ विषयक विखारी अपप्रचार आणि डाव्यांचा पुरस्कार हा वैयक्तिक आयडी तसेच मायबोलीच्या उपक्रमामधून ( उदा. मागचा गणेशोत्सव ) करतांना दिसून येतात तेंव्हा आता हेच मायबोलीचे धोरण आहे असे वाटणे स्वाभाविक आहे >> Lol माबोवरचा वैयक्तिक आयडी आणि प्रशासन यामधे काहीच फरक नाही का?

१. या मसुद्यातल्या डॉ. चिन्मय दामले यांच्या मतांशी मायबोली.कॉमचा संबंध नाही. ती त्यांची वैयक्तिक मतं आहेत. >>>>> ती मते लेखात वेगळ्या रंगात (हिरव्या / निळ्या / जांभळ्या अक्षरात) ठेवली तर लोकांना नेमक्या मुद्द्यावर त्यांच्याशी वेगळा संपर्क साधता येईल. इथे सरमिसळ होणे टळेल.

२. विज्ञानवादी मेंबरनी आपल्या नावापुढे आपण मुंबई / पुणे कुठल्या ठिकाणी उपस्थित असू ते दिल्यास, संचलन संपल्यावर भेटून सविस्तर बोलताही येईल या विषयावर.

३. लेखात मांडलेले मुद्दे तत्वतः बरोबर आहेत, पण बाकीही काही गोष्टी लक्षात घेणे गरजेचे आहे. त्याबद्दल नंतर....

Pages