रात्रीचे

Submitted by मिल्या on 10 April, 2015 - 03:34

मुग्ध एकांत, किती शांत प्रहर रात्रीचे
उलगडूयात, मऊसूत पदर रात्रीचे

दिवसभर सूर्य रुबाबात किती वावरतो
झेलतो चंद्र मुक्यानेच कहर रात्रीचे

सौख्य, ऐश्वर्य, बडेजाव मिरविते दिवसा
केवढे भग्न, किती नग्न शहर रात्रीचे

वेदना रोज, करे संग नव्या देहाशी
पाळते मात्र तिचे पाप ... उदर रात्रीचे

दिवस काढून फणा ताठ डसे गात्रांना
आतल्या आत भिनत जात जहर... रात्रीचे

वीज कापूर, शशी ज्योत, तबक तार्‍यांचे
मेघ चौरंग, धुके धूप, मखर रात्रीचे

मिलिंद छत्रे

Group content visibility: 
Public - accessible to all site users

ह्या गझलेत रदिफेमुळे व्यक्तीकरणावर बंधने आल्याचे जाणवत आहे. शब्दनिवड छानच! मतला आवडला.

बंधने = दिवसा असे असे होते, मात्र रात्री असे असे होते, अश्या स्वरुपाचाच आशय घ्यावा लागल्यासारखे झाले आहे. हे टाळताही आले असते असे वाटते.

दिवसभर सूर्य रुबाबात किती वावरतो
झेलतो चंद्र मुक्यानेच कहर रात्रीचे

सौख्य, ऐश्वर्य, बडेजाव मिरविते दिवसा
केवढे भग्न, किती नग्न शहर रात्रीचे>>>>>> मस्त! छान लिहीलीय.

सॉरी धन्यवाद द्यायला इकडे आलोच नाही परत Sad

सर्वांचे आभार..

बेफी : बंधनांबद्दल तुम्ही म्हणतात ते पटले थोडे पण त्यातही वेगवेगळ्या अर्थ छटा आणायचा प्रयत्न केला आहे. पण हे टाळता आले असते का तर नक्कीच पण त्या दॄष्टीने विचारच नाही केले. तसा विचार करून काही नविन लिहिता येईल का हे तपासून पाहीन

सौख्य, ऐश्वर्य, बडेजाव मिरविते दिवसा
केवढे भग्न, किती नग्न शहर रात्रीचे........ झक्कास