कळले ताई ?

Submitted by रसप on 16 July, 2013 - 04:02

शाळेसाठी
जातानाचा
डोंगरातला
रस्ता होता
आठवतो का
आता ताई ?

घोट्याइतके
खळखळ पाणी
असलेला तो
ओढा लागे,
त्याच्यानंतर
माळावरच्या
चिखलामधली
पायवाटही
थबथब थबथब..!!
आठवते का ?

रोज तिथूनच
दूर-दूरच्या
शाळेसाठी
चालत जाणे
तरी कधीही
कंटाळाही
आला नाही
आठवते का ?

बरेच चालुन
गेल्यावरती
शाळा येई
तू आनंदी
अन् मी दु:खी
रोज व्हायचो
आठवते का ?

कितीकितीदा
माझ्या बाई
माझ्याबाबत
तक्रारींचा
तुझ्याचपाशी
पाढा वाचत
पण तू कधिही
आईला ना
सांगितले ते
आठवते का ?

मला आठवे
तेच नेहमी
म्हणून अजुनी
आयुष्याच्या
ह्या रस्त्यावर
माझ्यासोबत
तू नसल्याच्या
तक्रारींना
कुणाकडेही
कधीच मीही
मांडत नाही
कळले ताई ?

....रसप....
१६ जुलै २०१३
http://www.ranjeetparadkar.com/2013/07/blog-post_16.html

Group content visibility: 
Public - accessible to all site users

क्या बात है....

रणजित - इतक्या कमी शब्दात इतकी प्रभावी मांडणी - हॅट्स ऑफ दोस्ता ...

क्या बात है जितू
विषयही कित्ती क्यूट आशयही
निर्यमकी कविता या प्रकारात आता तू मास्टर झाला आहेस अगदी (तरी "रोज होत असू" ऐवजी "रोज व्हायचो" असे केलेस तरी चालेल Happy )

"रोज होत असू" ऐवजी "रोज व्हायचो">> मान्य !
वृत्तभंगच आहे तो ! बदल करतोय.

धन्यवाद वैभू..

छानच!

रसप , दिल तोड दिया !

आयुष्याच्या
या रस्त्यातून
अर्ध्यातून तू
जाशील सोडून
घेतल्याविना
परवानगीही
कायमचे अन
दूर कुठेही
नव्हते माहीत
मलाही राजा
जगणे होईल
अशीही सजा ..

हे एका ताईकडून, तिच्या अकाली कायमचे सोडून गेलेल्या पाठच्या भावासाठी.रडवलेत.

पुन्हा पुन्हा
वाचावी ऐशी
कविता लिहिली
झुळझुळणार्‍या
झर्‍यासारखी
वाहत गेली
मनावरुन ती
रसप तुमची
कविता आणिक
शैली तुमची
फार भावली
जाणवले का? Happy

रसप, काल भावनेच्या भरातला प्रतिसाद होता.. खूप काही आठवले अन उचंबळले, माझा राजस देखणा मराठी फिल्मचा हीरो आठवला .सर्वांचे आभार सहवेदनेबद्दल.

आता कवितेच्या आकृतीबंधाबद्दल, जो अमेझिंग आहे.त्याला डोंगरातल्या छोट्या पायवाटेवरून दुडदुडत चाललेल्या छोट्या ताई- भावाच्या गतीचीच लय आहे. ही लय आपल्यालाही त्यांचे बाळबोट पकडून आपल्या भूतकाळात नेते इतकी प्रभावी आहे.

कवितेला यमकाच्या कधीकधी जाचक वाटणार्‍या बंधनातून सोडवणे सोपे नाही. अन तिच्या घाटदार सौंदर्यात बाधा न येऊ देता हे करणे अजूनच कठीण.तुम्हाला ते जमले आहे.

उत्तरोत्तर अनेक सूक्ष्मभव्य आशय असेच प्रकट करत रहा Happy

Pages