फ्रेंच फ्राईझ

शास्त्रिबुवांच्या हातातली बासरी, फ्रेंच फ्राईजमधे चांगलीच वाजली. जोशीकाकूंच्या आॅडिटनंतर फ्रेंच फ्राईजमधे उत्साहवर्धक काहीच घडले नव्हते. त्यामुळे ही बासरी घराघरात वाजायला लागली. तशी तिनी पहिली किंचाळी फोडल्यानंतर त्याच्यात बरीच सुधारणा होउ लागली होती. आता सहा भोकांमधली दोन तरी आवाजी होती. बाकिच्यांची अजूनही विपश्चना सुरू होती. ती बहुतेक शास्त्रिबुवांचे गुरु विपश्चनेला गेल्यामुळे असावी अशी आपली आमची अटकळ. पण त्या दोन बोलत्या भोकांनी शास्त्रिबुवांना भलतीच तरारी आलेली. नुसती बुवांनाच नाही, तर अख्ख्या फ्रेंच फ्राईजला तरतरी आलेली.

फ्रेंच फ्राईजच्या ग्राउंड फ्लोअरवर, हाफचड्ड्या आणि टी शर्टांचा सुकाळ होता. हे आपले फुल्ली ड्रेस्ड कलपकाकांचे मत. अर्थात शॅंटीआॅंटिला ते कायमच ओव्हरड्रेस्ड वाटायचे. सोसायटिची तर मीटिंग, त्याला कशाला प्यांट आणि शर्ट? कलपकाकांना तरी सगळ्या बायकांनी साड्या घालून यावे असे मनापासून वाटायचे. पण ते फक्त त्यांनाच. त्यामुळे आजही, फक्त कलपकाका फुल्ली ओव्हरड्रेस्ड होते. बाकि सगळे हाफ्प्यांटी आणि टीशर्ट, अगदी साळकाया माळकाया पण. सुट्टिच्या दिवशी केली ना मीटिंग. टिनाच्या आईचे ठाम मत होते, की मीटिंग ही सुट्टिच्या दिवशी असता कामाच नये. त्यामुळे तावरेकाकांनी मग ती एकदा मंगळवारी ठरवली.