भुजंगप्रयात वृत्त

मला सावली सावली वाटते ना
असे भोवताली तरी का दिसेना
तुझ्यावाचुनी श्वास राही अधूरा
जसे कृष्ण राधा जसे शाम मीरा...

मनी वाजते सावळी रोज वीणा
दिवा लावते.. लावलेला कळेना
किती जीवघेणी तुझी प्रेमबाधा
जसे शाम मीरा जसे कृष्ण राधा...

तुझी आठवण वेड लावी जीवाला
मनाची व्यथा रोज सांगू कुणाला
तुझी आठवण..स्पर्श..ओला शहारा
जसे कृष्ण राधा जसे शाम मीरा...

जसे कृष्ण राधा जसे शाम मीरा
झरु दे कधी श्रावणातील धारा
विझू दे सख्या तापलेला निखारा
जसे कृष्ण राधा जसे शाम मीरा...

नको चांदण्याचे नको सागराचे
नको उंच माडी सुशोभित घराचे
प्रिये स्वप्न पाहू तुझ्या आवडीचे
नदीकाठच्या एकट्या झोपडीचे...

कधी गार वारा कधी ऊन येइल
कधी पावसाने चुडा चिंब होइल
सरी झेलताना भिजू धुंद होऊ
करु सोबतीने तळे ओंजळीचे...
प्रिये स्वप्न...

परसबाग छोटी घरे पाखरांची
उघडताच ताटी फ़ुले कर्दळीची
कधी झोपलो जर तुझ्या पायथ्याशी
मला छत मिळावे तुझ्या ओढणीचे ...
प्रिये स्वप्न..

जिथे चूल आहे तिथे दाट हिरवळ
सदा दरवळावा चुलीतून दरवळ
मला भूक नाही तरी वेड आहे
सुगंधी तुझ्या हातच्या भाकरीचे...
प्रिये स्वप्न...

तुझा हात हाती बसायास माती
नभाची रजाई उजेडास वाती