मराठी कार्यक्रम - चित्रपट/ नाटक ह्याव्यतिरिक्त ..!

Cनाटक, चित्रपट, मुलाखती , वेब सिरीज यांवर धागे आहेत.
हा एक धागा नाटक/ चित्रपट / मुलाखती सोडून इतर मराठी कार्यक्रमांची ओळख/ परीक्षण करून देण्यासाठी.

सध्या ललितलेखनात टाकला आहे कारण मला कुठे ठेवावा हे उमगलं नाही. कोणाला जास्त योग्य कॅटेगरी/ गट सुचल्या जरूर कळवावे. धन्यवाद!

***

अपूर्वाई, काव्य-स्वर-सुरांचा त्रिवेणी संगम!

श्री गणेशाला वंदन करून सुरू झालेला हा कार्यक्रम - खरं तर सोहळा - साडेतीन तास प्रेक्षकांना/ श्रोत्यांना गुंतवून ठेवत, भावनांच्या हिंदोळ्यावर झुलवत, हास्याची कारंजी उडवत अखेर
विठ्ठलाच्या पायाशी येऊन संपला.. तोच मुळी अजून एखादी कविता/ जुगलबंदी/ मेडली जमून गेली असती अशी हुरहूर लावतच.
शरयू आणि विक्रम भट (तबला )यांच्यातील भूलभुलैया गाण्याच्यावेळी झालेली जुगलबंदी, शरयू दाते आणि कीबोर्ड वरील दर्शना जोग यांनी मिळून सादर केलेली लताबाईंच्या गाण्यांची अंतर्मुख करणाri शांत स्वरातील मेडली, सोशल मीडियावर लोकप्रिय झालेलं, “भरतीचा मज नाही, ओहोटीची लाज नाही” हे गाणं/ काव्य, अमर ओक यांची ऐहिकापलीकडील जगाची झलक दाखवणारी, परमात्म्याचा स्पर्श झालायंस वाटणारी सुरेल सुरावट ही काही मला जाणवलेली ठळक वैशिष्ट्ये.

झांजारलं हा खरोखरच काव्य सर आणि ताल यांचा अभुतपूर्व (?) आविष्कार वाटला.
ते शब्द, ती शब्दफेक, ते काव्यवाचन, मुरलीचे स्वर, ऑक्टोपॅड वरील ठेका ( रोहन वानगे यांचा ) यांच्या सुरेख मिलाफाने ती झांजर वेळ, यमुना नदी, त्यात हरवलेली ती कृष्णमय राधा अवघं चित्र डोळ्यासमोर तरळलं, आणि क्षणभर आपणही जणू त्याचा भागच आहोत असं काहीस जाणवून गेलं.

हा त्यांचा अमेरिकेतील अकरावा कार्यक्रम/ प्रयोग होता. अजून दोन कार्यक्रम शिल्लक आहेत. तुमच्या शहरात आला असेल तर नक्की बघा.
भविष्यात इतरत्रही ह्या कार्यक्रमांचे प्रयोग व्हावेत आणि काव्य- सुरांमध्ये न्हाऊन निघताना ती झांजरवेळ अधिकाधिक रसिकांना अनुभवता यावी ह्या शुभेच्छा!

असे दर्जेदार कार्यक्रम आमच्यापर्यंत पोहोचविचल्याबद्दल Five Dimensions चे मनापासून आभार!