शशक १ - आसू आणि हसू - छंदीफंदी!

स्थळ : बँक, अमेरिका

काउंटरवरच्या बाईने हसून हिंदीत त्याच गाव विचारलं, स्वतःच सागितलं.
साहजिकच त्यालाही जरा आपलेपणा वाटला.
म्हणूनच चेक देताना तो अवघडत बोलून गेला, “आकडा तसा छोटा आहे पण बऱ्याच अवधीने पगाराचा चेक मिळालाय.”
मंदसं हसली आणि तिने विस्मयचकित नजरेने त्याच्याकडे पाहिलं.
“आकडा असू दे, पण पगाराचा चेक मिळालाय,नोकरी आहे ते जास्त महत्वाचं. गुडलक!”
तिच्या धीराच्या शब्दांनी सुखावलेला तो ही “गुडलक” म्हणत वळला.

तशी तिचं हसू मावळलं, “Thank you. I need it badly. Blanket ऑपरेशन कॉस्ट कमी करणार असल्याची नोटीस सकाळीच आलीय.. ही नोकरी जातेय की राहतेय, कोणास ठाऊक..?” पुटपुटत तिने दीर्घ विश्वास सोडला.

तळटीप -
गेल्या २-३ वर्षात इकडे परिस्थिती बदलताना दिसतेय. नवीन लोकांना जॉब मिळायचे प्रॉब्लेम्स, जुन्या जाणत्यांना ai/ नवी तंत्रज्ञान/ कॉस्ट कटिंग या व अशा कारणांमुळे जॉब गमवायला लागतायत. त्यातून सुचलेली ही शशक