शशक १ – निवड – प्राचीन

शशक १ – निवड – प्राचीन

ती सकाळपासून अस्वस्थ होती.
कोण तो गावचा पाहुणा, त्यानं तिला झिडकारलं होतं...
कडवट मनानं तिनं स्वतःला न्याहाळलं. “नसेन मी उजळ, पण म्ह्णून असं रंगावरून हिणवायचं की काय !
स्नेहमय साथ मिळाली, तर मीही उजळपणे मिरवू शकतेच की..” तिच्या मनाची ग्वाही.
नकळत ‘त्याचा’ हेवा वाटला.
“कसा बरं हा आबालवृद्धांचा लाडका! आहे खरा मनमिळाऊ, त्यामुळे उन्हांपावसांत त्याची सोबत हवीशी..
आपण मात्र उच्चभ्रू वातावरणात जास्त रमतो, रमवतो. पण आपले फार नखरे नाहीत, एखादा जायफळी वळसा पुरेसा. त्याला मात्र मसाल्यांचा सोस..”.

"आज लंघन करा. फक्त कोरी कॉफी घ्या.”डॉक्टरांनी सांगितलं.
गावचा पाहुणा चक्क उद्गारला, "बरं झालं ही घरी आहे!”

आणि तिने विस्मयचकित नजरेने त्याच्याकडे बघितले.