पाककृती स्पर्धा २: करीब- करीब लाडू - अस्मिता.

करीब- करीब लाडू

सध्या चिकवावर आलेल्या 'करीब करीब सिंगल'च्या दंगलीला आणि इरफानच्या चाहत्यांना समर्पित.

मी खरेच सुक्यामेव्याचे लाडूच करणार होते, त्याचा पुरेसा गवगवाही केला होता पण अचानक मोदकाच्या साच्यात चेचून त्यांचे मोदक ऐनवेळी केले म्हणून 'करीब- करीब लाडू'.

हे लाडू/ मोदक न भाजलेल्या सुक्यामेव्याला दळून करता येतात, सगळेच त्यातल्या त्यात पौष्टिक असल्याने एनर्जी बार सारखे खाता येतील.

पाककृतीचे घटक -
'पाऊंड केक' नावाचा एक केक असतो. त्यात प्रत्येक गोष्ट एक पाऊंड या प्रमाणात असते म्हणजे - एक पाऊंड मैदा, एक पाऊंड लोणी, एक पाऊंड साखर. हो, असेच असल्याने त्याचे नाव 'पाऊंड केक'. आपल्या प्रसादाच्या शिऱ्याचा अमेरिकन भाऊ!

तसेच ह्या लाडूतही प्रत्येकी एक वाटी बदाम, काजू, पिस्ता, साखर ( थोडी कमी) , किसमिस, एक वाटीपेक्षा कमी साजूक तूप, एक अखंड जायफळ अर्धे किसून, (अखंड असेल तर वास तितका उडालेला नसतो व घमघमते) , चिमूटभर केशर (ऐच्छिक)
१.

असं सगळं मांडून नाही घेतलं तरी चालेल, हे स्पर्धेमुळे लाडात आले आहे. उगा भांडी वाढणार आता !

हे सगळं कच्चंच/ न भाजता, न भिजवता घेतलं आहे. काजू तुकडे आणले कारण नंतर पूडच करायची होती. सगळेच मिक्सर मधून 'घुरकावून' घेतले व टोपात टाकले. त्यातच तूप व पिठीसाखर घालून थोड्याशा पाण्यात भिजवलेले केशर घातले.
२.

हे सगळं हाताने कालवून पुन्हा मिक्सर मधून काढून घेतलं. मिक्सरच्या उष्णतेने तूप पाघळून मिळून येते. तेवढीच 'चीटिंग' करता येते. आदिमानवाला आगीचा शोध लागल्यानंतर जेवढा झाला असेल तेवढाच आनंद मिक्सरची उष्णता वापरून चीट केल्याचा मला झाला.

३.

आता लाडूचेच ठरल्यामुळे लाडू वळून घेतले. काही किसमिस धसमुसळेपणा करत लाडूतून बाहेर येत होते, लाडू बघून झॉम्बीज आठवू नयेत म्हणून फार मोठे किसमिस बाहेर काढून मऊ, लहान व वळणारे तेवढे राहू दिले.
४.

सगळे लाडू झाल्यावर मला सुचले की हे मोदकाच्या साच्यात घालून वळले तर औचित्यपूर्ण का काय होईल व देखणेही दिसेल. शेवटी रूपावर फार काही अवलंबून असते, नुसतं गुणी राहून उपयोग नाही. पाहून 'तोंपासू' व्हायला हवं. शिवाय तुम्हाला कुठे खाता येणार, तुम्ही रूप बघूनच 'वाह, वाह' म्हणणार, त्यामुळे हे करणं भाग होतं. आता झालेतच मोदक अचानक तर 'मौकेका फायदा' घेऊन 'करीब-करीब लाडू' असं नाव दिलं. तुम्ही सुकामेव्याचे लाडूही म्हणू शकता. लाडू मोडून मी प्रत्यक्ष कृतीही एडिट करून 'धन्य- धन्य' झाले, इथलं लेखन एडिटनं पुरेसे नव्हतं. लाडवाचे येथे पुन्हा- पुन्हा दिसणाऱ्या '१ नवीन' च्या मोहाला बळी पडणाऱ्यासारखे झाले.

नंतर अजून एक आयडिया आली, हे तयार मोदक मफिन लायनरमधे ठेवून अजून 'प्रो' दिसतील. पण त्यासाठी ओव्हन खालच्या ड्रॉवरच्या महासागरातील मफिन लायनर शोधले, दुसरं काहीबाही सापडत जुनाट, चपटे झालेले मोठ्या मफिनच्या आकाराचे लायनर सापडून मोदक 'अंगापेक्षा पोंगा' दिसू लागला. ड्रेस कसा फिटिंगचा हवा, उठून दिसतो. त्यामुळे तेही रद्द. फॅशन सेन्स म्हणजे फॅशन सेन्स!
५.

नंतर सगळे एकेक करत लाडू फोडून, दाबून मोदकाच्या साच्यात दाबून भरले व एकेक मोदक केले.
६.

मोदकाची बहिण करंजी आणि करंजीचा भाऊ मोदक- असं आई म्हणायची, ती परंपराच होती आणि बहिण-भाऊ क्यूट वाटतात म्हणून एक छोटीशी करंजी केली. शिवाय भावाला लहानपणी छळून आयुष्यासाठी व जगासाठी 'तयार' करणारी एक तरी बहिण हवीच. मान आहे तो !

७.

८.

ही पाककृती खूप चवदार व जवळजवळ डिंकाच्या लाडू सारखी वाटते. मी कधी सुकं खोबरं किंवा खारकेची पूड घातली नाही मी हे अगदी असेच करते. पिस्ते हवेतच. भाजून घेतल्याने चव बदलते, चुकूनही ते रोस्टेड सॉल्टेड नट्स वापरू नका.

मागच्या वर्षीच्या 'तो बोल मंद हळवासा'चा आज वाढदिवस आहे, तुम्हाला तो अजूनही आठवतोय म्हणून त्याच्यासोबत एक फोटो. त्याला वाढदिवसाच्या शुभेच्छा द्या !

१०.

हे सगळं जॅझ म्युझिक ऐकत करा व झाल्यावर पोटभरेपर्यंत खा नाही तर माझी प्रवेशिका बाद व्हायची. जबरदस्तीने भरवतेय!

सर्व माबोकरांना गणेशोत्सवाच्या शुभेच्छा.
गणपती बाप्पा मोरया !