प्रसन्नवडी (आपापल्या जबाबदारीवर करा!)

मी तर म्हणते या फंदात पडूच नका!
काही गाणी नसतात का, ऐकायला सोप्पी वाटतात आणि साधं गुणगुणायला लागलं तरी तारांबळ उडते - हे त्यापैकी प्रकरण आहे.
अजूनही मागे वळा.

पण तरीही तुमचा हट्टच असेल, तर क्रमवार कृती ही अशी:

१. ओल्या नारळाचा चव किंवा डेसिकेटेड / ग्रेटेड वगैरे खोबरं वापरणार असाल, तर बेसन + खोबरं + दूध + साखर + दुधाची भुकटी हे सगळं एकत्र ब्लेन्ड करून घ्या.
मी कोकोनट पावडर वापरली, त्यामुळे ही ब्लेन्डिंगची स्टेप वगळली.
या रेसिपीत शॉर्टकट हा एवढाच एक घेण्यासारखा आहे.

२. फोन लांबच्या टेबलावर सायलेन्टवर पालथा घाला. मेसेजेस, मायबोली, फेसबुक वगैरे बघायची ही वेळ नाही. पार्लरला जायचा तर विचारही मनात आणू नका.

३. हे सगळं मिश्रण आणि तूप एकत्र करून जाड बुडाच्या मोठ्या भांड्यात मध्यम आचेवर ढवळायला लागा. भांड्याचं बूड जाडच. आच मध्यमच. थोडी कमीही चालेल, पण जास्त चालणार नाही.
खोबरं आणि दूध करपायला अतिशय उत्सुक असतं हे लक्षात असू दे. ही रेसिपी म्हणजे त्यांच्यातला आणि आपल्या पेशन्समधला खेळ आहे. आपल्याला जिंकायचं आहे.

४. ढवळत रहा.

५. ढवळत रहा.

६. ढवळत रहा.

७. आता मिश्रण आळायला लागेल, गोळा जमायला लागेल, आता लागेल, आता लागेल... असं तुम्हाला वाटेल. पण तसं होणार नाही. तेव्हा ढवळत रहा.

८. मिश्रणाचा रंग पालटायला लागेल. पण ते अजूनही गोळाबिळा होणार नाही. ढवळत रहा.

९. यापेक्षा तुपावर बेसन भाजून सरळ लाडू वळले असते तर बरं झालं असतं असं तुम्हाला वाटेल. पण आता ती वेळ गेलेली आहे, तेव्हा ढवळत रहा.

१०. कंटाळून तुम्हाला हे मिश्रण मायक्रोवेव्हमध्ये ठेवावंसं वाटेल. बाकी वड्यांची मिश्रणं नाही का चुटकीसरशी आळतात त्यात?! ही चूक चुकूनही करू नका*!! ढवळत रहा.

११. आता भांड्याच्या कडा कोरड्या व्हायला लागतील आणि मिश्रण आळलं नाही तरी ढवळताना कडा सोडायला लागेल.

१२. अभिनंदन! तुम्ही जिंकलात. ढवळणं थांबवा, आच बंद करा.

१३. आता आपलं नेहमीचंच - वेलचीपूड चांगली मिसळून घ्या, तुपाचा हात लावलेल्या थाळीत मिश्रण ओता, पसरा, वरून सुक्यामेव्याची पूड थापा, वड्या कापा आणि गार करायला ठेवा.