श्रावण आला...

श्रावण आला....

श्रावण मासी हर्ष मानसी हिरवळ दाटे चोहीकडे
क्षणात येते सरसर शिरवे क्षणात फिरुनी उन पडे

बालकवींची ही कविता माहीत नसलेला मराठी माणूस कुणीतरी विरळाच.
चातुर्मासातील आवडता आणि लाडका असा श्रावण महिना आजपासून चालू झाला आहे.
आषाढात चालू झालेल्या वर्षाऋतूने आता उन पावसाचा खेळ खेळायला सुरू केलेला असतो. अर्थात ऋतूंचं गणित आता पारच बिघडलंय म्हणा. पण श्रावणातील श्रावणधारा आणि धरित्रीचं हिरवगार रूप अजूनही तसंच टिकून आहे. श्रावणातील या सुस्नात हिरव्यागार निसर्गाबरोबरच सण, व्रतवैकल्यांची सुद्धा लयलूट असते.
श्रावणी सोमवार आणि शाळेला मिळणारी अर्धी सुट्टी. मंगळागौर, श्रावणी शनिवार. श्रावणातील वारांच्या निरनिराळ्या कहाण्या. त्यांची ती सचित्र कहाण्यांची पुस्तकं. घरातील पूजा. शुक्रवारची जिवतीची पूजा. औक्षण. मिळणारा गूळ चण्यांचा प्रसाद. घरात नैवेद्याचा, चमचमीत पदार्थांचा अन् धूप अगरबत्यांचा घमघमाट...
पंचमीला येणाऱ्या माहेरवाशिणी आणि त्यांची रंगलेली गाणी, नारळी पौर्णिमा, रक्षाबंधन, गोकुळाष्टमी, गोपाळकाला, दहीहंडी, पोळा...असे दणक्यात साजरे केले जाणारे सण. अगदी उत्सवी वातावरण निर्माण होते. ह्या सणांबरोबरच अनेक व्रतवैकल्ये देखील केली जातात.

अशाच श्रावणातील सण, उत्सव, व्रतवैकल्ये, गाणी, कविता, पदार्थ इत्यादी साठीचा हा धागा.

फोटो आंतरजालावरून साभार.